1 አሳ አይፈይነ እስራኤለ አሳ ኡባ አይፈይ ጎዳ ፄልያ ግሾ፥ ሳድራካ ቢታይነ ዳማስቆ ካታማይ ꬋያናይሳ፥ ጎዳይ ኦድዳ ፕርዳ ቃላይ ሀይሳ። 2 ቃስ ሀ ፕርዳይ ሀድራካ ዛዋ ግድዳ ሀማታ ካታማነ ቃራ ግድዳ ፅሮሳነ ስዶና ካታማታ ቦላ ሀ ፕርዳይ ጋካና። 3 ፅሮሳ ካታማይ ባዉ ምኖ ሚፃ ግምብስ። ቃስ ብራነ ዎርቃ ቢታዳ ዶርስ። 4 ሽን እ ሺሽዳባ ኡባ ጎዳይ ኤካና፤ እያ ሻሉዋ አባን ሆላና፤ ካታማይ ታማን ሜተታና።

5 አስቃሎና ካታማይ ሄሳ በእድ ያያና፤ ጋዛ ካታማይ ኡንኤታና፤ ኤቅሮና ካታማይ ኡፋይስ ꬋያና። ጋዛ ካዎይ ꬋያና፤ አስቃሎና ካታማይ ካይሳ ግዳና። 6 አሽዶዳ ካታማን ዋላሀ አሳይ ዳና።

ጎዳይ ሀይሳዳ ያጌስ፦ “ፍልስፄመታ ኦቶሩዋ ታኒ ዉርሳና። 7 ታኒ ኤንታ ዶናፐ ሱꬅ፥ ኤንታ አቻፈ ቱናባ ድጋና። ኤንታፈ አትዳይሳት ኑ ፆሳ አስ ግዳና፤ ቃስ ይሁዳ ያራፐ እሱዋ ግዳና። ኤቅሮና አሳይ ያቡሰ አሳዳ ታ አሰ ግዳና። 8 ሄሳፈ ጉየ፥ ኦላንቾት ኦይኮናዳ፥ ታኒ ታ ኬꬃ ናጋና። ታኒ ታ ሁጰን ናግያ ግሾ፥ ዛሪድ ኦንካ ታ አሳ ኡንኤና” ያጌስ።

9 ነኖ፥ ፅዮነ ካታመ፥ ኡፋይታ! ነኖ፥ የሩሳላመ ካታመ፥ እልላ! ሄኮ፥ ፆንዳ ነ ፅሎ ካዎይ ኔኮ ዬስ። ነ ካዎይ አሽከ ግድድ፥ ሀረ ቦላ፥ አꬍድ ሀረ ማራ ቦላ ኡትድ ኔኮ ዬስ።

10 ታኒ ፓራ ጋረታ እስራኤለፐ፥ ኦላ ፓራታ የሩሳላመፐ ꬋይሳና፤ ኦላ ዶንግያ መንረꬃና። ነ ካዎይ ካዎተꬃታስ ሳሮ አዋጃና፤ እ አባስ ጋፃፐ ህን ጋፃ ጋካናዉ ኤፍራፂሳ ሻፋፐ ዶምድ ሳኣ ጋፃ ጋካናዉ ሃራና።

11 ታኒ ኔራ ሱꬃ ጫቁዋ ግሾ፥ ቃሸትዳ ነ አሳታ ሃꬅ ባይና ኦላፈ ከሳና። 12 ህንተኖ፥ ስንꬃን ኡፋይስ ደእያ ቃሾ አሳቶ፥ ህንተ ሚፃ ስምተ። ካሰይሳ ግሾ ዳኮ ሻሎ ህንተዉ እማናይሳ ሀች ታኒ ህንተዉ አዋጃይስ። 13 ታኒ ይሁዳ ዶንገዳ፥ እስራኤለ ዶንገ ቶራዳ ጎኤታና። ፅዮነ፥ ታኒ ነ ናይታ ግርከ ናይታ ቦላ ደንꬃና፤ ነና ዎልቃማ ኦላንቹዋ ማሻ መላ ኦꬃና።

14 ሄ ዎደ ጎዳይ ኤንታ ቦላ ቆንጫና፤ እያ ዶንገ ቶራይ ዎልአንꬃዳ ዎልአማና። ኡባ ሃርያ ጎዳይ ሞይዘ ፑናና፤ ዱገሀ ባጋ ጎተዳ ደንዳና። 15 ኡባፈ ዎልቃማ ጎዳይ ኤንታ ግሾ ኦለታና። ኤንቲ ባንታ ሞርከታ ዉርሳና፤ ያምባርሻን ኦለይሳታ የꬋና። ኤንቲ ባንታ ሞርከታ ሱꬃ ዎይነ ኡሻዳ ኡያና፤ ሱꬅ ከረን ኩምያዳ ኩማና፤ ኤንቲ ያርሾ በሳን ጉክያ ሱꬃዳ ጉካና።

16 ሄ ጋላስ ሄንꬃንቾይ ባ ዶርሳታ አሸይሳዳ ጎዳይ ኤንታ ፆሳይ ኤንታ አሻና። ካላቻ ቦላ ደእያ አሌቆዳ ኤንቲ ጎዳ ቢታን ጶላና። 17 ኤንቲ ዋንድ ሎኦነ ፑላንቾ ግዳንደሻ! ናአተꬃ ናይታ ካꬃይ፥ ጌላኦ ናይታ ዎይነ ኡሻይ አጭሳና።