1 ባልጎይ ጋክያ ዎደ ጎዳይ እራ እማና መላ ዎስተ። ጎዳይ እራ ቶክዳ ሻራ ኪቴስ፤ አሳስ እራ እሜስ፤ ጎሻን አታክልተ ዶልስስ። 2 ኤቃት ሀዳባ ኦዶሶና፤ ማሮት ዎርዶ ቆንጨꬅ በኦሶና፤ አሙሄይሳት ዎርዶ አሙሆ ኦዶሶና፤ ሀዳ ምንꬆ ምንꬆሶና። ሄሳ ግሾ፥ አሳይ ꬋይዳ ዶርሳዳ ቶይላቶሶና፤ ኤንታ ሄምያ አስ ባይና ግሾ፥ ኤንቲ ቆሄትዶሶና።

3 ጎዳይ ሀይሳዳ ያጌስ፦ “ታ ሀንቆይ ሄንꬃንቾታ ቦላ ኤፅ ከይስ፤ ሄ ካለይሳታ ታኒ ሴራና። ኡባፈ ዎልቃማ ጎዳይ ባ ዉድያ ይሁዳ ሄሜስ። እ ኤንታ ኦላስ ጊግዳ ዎልቃማ ፓራ መላ ኦꬃና። 4 ይሁዳ አሳ ግዶፈ ቁስተ ሹቻ መላ፥ ዱንካነ ꬍሸ መላነ ኦላ ቶራ መላ ሀንዳ ካለይሳት ከያና። 5 ባንታ ሞርከታ ኦግያ ኡርቃዳ የꬍያ ምኖ ኦላንቾታ መላ ግዳና። ጎዳይ ኤንታራ ደእያ ግሾ፥ ኤንቲ ኦለትድ ፆናና።

6 “ታኒ ይሁዳ አሳ ምንꬃና፤ ዮሰፋ አሳ አሻና። ታኒ ኤንታዉ ቃትያ ግሾ፥ ኤንታ ዛራዳ ኤሀና። ኤንቲ ታኒ ካሰካ ኤንታ የጋቦና አሳ መላ ግዳና። ታኒ ጎዳ ኤንታ ፆሳ ግድያ ግሾ፥ ኤንታ ዎሳ ስአና። 7 እስራኤለ አሳይ ምኖ ኦላንቾ መላ ግዳና፤ ዎይነ ኡይዳ አሳዳ ኤንታ ዎዛናይ ኡፋይታና። ኤንታ ናይት ሄሳ በእድ፥ ሀሹ ጋና፤ ኤንታ ዎዛናይ ጎዳን ኡፋይታና።

8 “ታኒ ታ አሳ ሱይቃዳ ፄጋና፤ ኤንታ እስፈ ሺሻና። ታኒ ኤንታ ዎዛና፤ ኤንቲ ካሰይሳዳ ዳራና። 9 ታኒ ኤንታ ካዎተꬃታ ግዶን ላልኮካ ኤንቲ ባንታ ደእያ ሃሆ ቢታን ግድድ ታና ሀሳያና። ቃስ ኤንትነ ኤንታ ናይቲ ደኦን ዳናነ ባንታ ቢታ ስማና።