1 ኡባፈ ዎልቃማ ጎዳይ ሀይሳዳ ያጌስ፦ “ሄ ዎደ ዳዊታ ኮቻታነ የሩሳላመን ደኤይሳታ ናጋራፐነ ቱናተꬃፈ ጌሽያ ፑልቶይ ꬉቃና። 2 ሄ ዎደ ታኒ ኤንቲ ናምአንꬆ ቆፈቶና መላ ኤቃታ ሱንꬃ ቢታፈ ꬋይሳና። ቃስ ናበታነ ቱና አያናታ ቢታፈ ꬋይሳና። ታኒ ኡባፈ ዎልቃማ ጎዳይ ሀይሳ ኦዳይስ። 3 ቃስ ኦንካ፥ ታኒ ናበ ጊኮ፥ እያ አዋነ አይያ እያ፥ ‘ኔኒ ጎዳ ሱንꬃን ዎርዶ ኦድያ ግሾ፥ ሀይቃናዉ በሴስ’ ያጋና። እ ትንብተ ኦድያ ዎደ እያ አዋይነ አይያ እያ ጫድድ ዎꬋና። 4 ሄ ዎደ ታኒ ናበ ግያ ኦንካ ባ በእዳ ቆንጨꬃን ዬላታና። ቃስ አሰ ጭማናዉ እክሰይ ደእያ ማኦ ማኤና። 5 ሽን እ፥ ‘ታኒ ናበ ግድከ፤ ናአተꬃፈ ዶማዳ ቢታ ኦꬅያ አስ’ ያጋና። 6 እስ አስ፥ ‘ያትን፥ ሀ ነ ቦላ ደእያ ማዱንꬃይ አይቤ?’ ያግድ ኦይችኮ፥ እ፥ ‘ሀይስ ታኒ ታ ላገታ ሶን ማዱንፅዳይሳ’ ያጋና” ያጌስ።

7 “ማሻዉ ደንዳ፥ ታዉ ማታ ግድዳ ታ ዶርሳታ ሄንꬃንቹዋ ቦላ ባርካ! ዶርሳት ላለታና መላ ሄንꬃንቹዋ ዎꬋ። ታኒ ጉꬃ ዶርሳታ ቦላ ታ ኩሽያ ደንꬃና” ያጌስ ኡባፈ ዎልቃማ ጎዳይ።

8 “ቢታ ኡባን ደእያ ሄꬑ ኩሸ አሳፐ ናምኡ ኩሸይ ሾጨትድ ሀይቅን፥ እስ ኩሸ ፃላል አታና። ታኒ ጎዳይ ሀይሳ ኦዳይስ። 9 ሀ አትዳ ስኮ አሳ ታኒ ታማን የጋና፤ ብር ታማን ጌያዳ ኤንታ ጌሻና፤ ዎርቀይ ፓጨትያዳ ፓጫና። ሄሳፈ ጉየ፥ ኤንቲ ታ ሱንꬃን ዎሳና፤ ታኒ ኤንታ ስአና። ታኒ ኤንታ፥ ‘ታ አሰ’ ጋና፤ ኤንቲ፥ ጎዳይ፥ ‘ኑ ፆሰ’ ያጋና” ያጌስ።