1 ሄኮ፥ ጎዳ ፕርዳ ጋላሳይ ዬስ፤ ሄ ዎደ ህንተ ፄልሽን፥ ህንተፈ ቦንቅዳባ ህንተ ስንꬃን ሻከታና። 2 ካዎተꬃታ ኡባ ጎዳይ የሩሳላመ ቦላ ኦላስ ሺሻና። ካታማይ ኦይከታና፤ ኬꬃይ ቦንቀታና፤ ማጫ አሳ ዎልቃን ኢሳና። ካታማ አሳፐ ባጋይ ድኤትድ ባና፤ ሽን አትዳ አሳይ ካታማፐ ከየና። 3 ሄሳፈ ጉየ ጎዳይ ከይድ፥ ካሰ ኦላ ጋላስ ኦለተይሳዳ ካዎተꬃታ ኦላና። 4 ሄ ጋላስ እያ ቶሆት የሩሳላመፐ ዶሎሀ ባጋራ ደእያ ሻማሆ ዙማ ቦላ ኤቃና። ሻማሆ ደረይ ዶሎሀፐ ዉሎሀ ጋካናዉ ናምኡ ከይድ ጳልቀትን፥ ዳሮ ግታ ዛንጋራይ መታና። ዙማፐ ባጋይ ፑደሀ ባጋ፥ ቃስ ባጋይ ዱገሀ ባጋ ሸርእ ጋና። 5 ሄ ዛንጋራይ ብድ አፄላ ጋካና፤ ህንተ ሄ ዛንጋራራ ባቃት አꬍድ አታና። በን ይሁዳ ካዋ ኦዝያነ ላይꬅ ቢታይ ቃፅን፥ ህንተ ማይዛት ባቃትድ አትዳይሳዳ ህንተ ባቃታና። ሄሳፈ ጉየ፥ ጎዳይ ታ ፆሳይ ባ ጌሻታ ኡባራ እስፈ ያና።

6 ሄ ዎደ ሜጎይ፥ ሻችነ ꬉም ዴና። 7 ሄ ዎደ ቃምነ ጋላስ ባዋ፥ ጎዳይ ፃላል ኤርያ ዱማ ጋላስ ግዳና፤ ሄ ጋላስ ቃማይ ፖኦ ግዳና።

8 ሄ ዎደ ደኦ ሃꬃይ የሩሳላመፐ ጎጋና፤ እያፐ ባጋይ ማፅነ አባን ገላና፤ ቃስ ባጋይ መደትራነ አባን ገላና። ሄ ሃꬃይ ባልጎነ ቦነ ጎግሸ ዳና። 9 ጎዳይ ቢታ ኡባ ቦላ ካዎታና፤ ሄ ዎደ እስ ጎዳ ፃላል ዳና፤ እያ ሱንꬃ ፃላላ ፄጋና።

10 ግብአፐ ዶምድ የሩሳላመ ዱገሀ ባጋራ አꬍድ እርሞና ካታማ ጋካናዉ ደእያ ቢታ ኡባይ ደምባታና። ሽን የሩሳላመይ ብንያመ ፐንግያፈ ብድ፥ በን ፐንግያ ግናራ ዞዘ ፐንግያ ጋካናዉ፥ ቃስ ሀናንኤላ አዱሳ ግምብያፈ ብድ፥ ካዎ ዎይነ ጉምእያ በሳ ጋካናዉ ባ በሳን ꬎቁ ግድ ዳና። 11 የሩሳላመይ አስ ደእያ በሲ ግዳና፤ ህዛፐ ጉየ ꬋየና፤ እያን ደእያ አሳይ ህርግ ባይና ሳሮ ዳና።

12 ጎዳይ የሩሳላመ ኦላናዉ ደንድዳ አሳ ኡባ ቦላ ጋዶ ኤሀና። ኤንቲ ኤቆን ደእሽን፥ ኤንታ አሾይ ዎቃና፤ ኤንታ አይፈይ ባ ኦላን፥ ኤንታ እንፃርሳይ ባ ኮቶኑዋን ዎቃና። 13 ሄ ዎደ ጎዳይ ኤንታ ዎልቃማ ዳጋማ ዳጋንꬃና። አሳ ኡባይ እሶይ እሱዋ ኩሽያ ኦይክድ ኦለታና። 14 ይሁዳ አሳይ የሩሳላመ ባጋ ግድድ ኦለታና። ዩሹዋን ደእያ ካዎተꬃታ፥ ታይቦይ ባይና ሻሉዋ፥ ዎርቃ፥ ብራነ ማኡዋ ድእድ ሺሻና። 15 ሀ ጋዱዋ ዳንያ ጋዶይ ፓራታ ቦላ፥ ባቁሎታ ቦላ፥ ግማለታ ቦላ፥ ሀረታ ቦላነ ሞርከት ዱንካንዳ በሳን ደእያ መሄ ኡባ ቦላ ያና።

16 ሄሳፈ ጉየ፥ የሩሳላመ ኦልዳ ካዎተꬃታፐ አትዳ ኡባይ ካዋ፥ ኡባፈ ዎልቃማ ጎዳ ጎይናናዉነ ሻቃራ ባኣለ ቦንቻናዉ ላይꬃን ላይꬃን የሩሳላመ ባና። 17 ሳአን ደእያ አሳፐ ኦንካ ካዋ፥ ኡባፈ ዎልቃማ ጎዳ ጎይናናዉ የሩሳላመ ቦና እፅኮ፥ ኤንታዉ እር ቡከና። 18 ግብፀ አሳይ ብድ ጎይኖና እፅኮ፥ ሻቃራ ባኣለ ቦንቻናዉ ቦና እፅዳ አሳ ቦላ ጋክዳ ጋዶይ ኤንታ ቦላ ያና። 19 ሻቃራ ባኣለ ቦንቻናዉ ቦና እፅዳ ግብፀይነ ሀራ ካዎተꬃት ኡባይ ሴረታና ሴራይ ሀይሳ።

20 ሄ ዎደ ፓራታ ቆን ደእያ ሻሾትያ ቦላ፥ “ጎዳስ ጌይዳይሳ” ጌተትያ ማላ ፁፈይ ፃፈታና። ፆሳ ኬꬃን ደእያ ካꬅያ ኦቶይ ያርሾ በሳ ማታን ደእያ ሳንያ መላ ጌሽ ግዳና። 21 የሩሳላመንነ ይሁዳን ደእያ ኦቶ ኡባይ ኡባፈ ዎልቃማ ጎዳስ ጌሽ ግዳና። ያርሾ ያርሽያ አሳ ኡባይ ሄ ኦቶታ ኤክድ፥ ያርሾ አሹዋ ኤንታን ካꬃና። ሄ ዎደ ኡባፈ ዎልቃማ ጎዳ ኬꬃን አይ ዛልአንቾይ ዴና።