ምልክያሳ ማፃፋ
ጋꬃ ቆፋ
ምልክያሳ ጌተትያ ሱንꬃ ብርሸꬃይ “ኪተትዳይሳ” ጉሱ። ሀ ናበይ፥ ፆሳራ ጫቅዳ ጫቁዋ ምንꬅድ ናግያ ናበ። ኤቃ ጎይኖይ ዳርዳ ዎደ ባና ናግዳ ናበ (2:10-12)፤ ማች አዝና ብለተꬅ ካዎትዳ ዎደ ባ አማነተꬃ ምንꬅድ ኦይክዳ ናበ (2:13-16)፤ አሳይ አስራታነ እሞታ ካይሶትያ ዎደ ቦረትያ ኤንታ ኦሱዋን ዋላከቶና ባና ፆሳስ እምዳ አስ።
ምልክያሳ ማፃፋን፥ ናበይ ምንꬅድ ቆፍሰይ፥ ካህነታ ግድን አሳይ ፆሳራ ጫቅዳ ጫቁዋ ዛሪድ ኦራꬃናዉ በሴስ ግድ ኦዴስ። ፆሳ ደረይ ባ ዱሳን ግድን ባ ጎይኑዋን የዳ ፓራ ግድድ፥ ጎዳ ኦገፐ ጋፃ ከይዶሶና። ካህነትነ ደረይ በሲያ ያርሾ እሞናነ ፆሳይ ኤንታዉ እምዳ ዎጋን ቦና እፅድ እያ ጭማናዉ ቆፕዶሶና። ሄሳ ግሾ፥ ፆሳይ ኦገ ጊግሳናዉነ ባ ጫቅዳ ጫቁዋ አዋጃናዉ ባ ኪታንቹዋ ኮይሮት ኪትድ፥ ባ አሳ ቦላ ፕርዳናዉነ ኤንታ ፅልሳናዉ ያና።
ምልክያስ ባ ኪታ ፃፍዳ ዎደ ድኦፐ ስምዳ አይሁደ አሳይ አያና ዳቡራንነ ኢታ ኦገን ደኦሶና። አሳይ ፆሳ ሲቁዋነ ኡፋይሳ ቃላ ስꬍድ፥ ፆሰ ኪተተꬅ አይኮካ ማደና ግድ ቀልቅሶሶና። ኤንታ አማኖይ ዳቡርያ ዎደ ጎይኖ ዎጋን ቀል ግድ፥ ናጋራ ኡባ ኦꬅዶሶና። ሄሳ ግሾ፥ ምልክያስ፥ ካህነታስነ አሳስ ካልያ ትንብተ ቃላ ኦድስ።
1. ፆሳይ ፕርዳናዉ ያናፐ ስን ባንታ ናጋራፐ ስማና መላ ኤንታ አኬክሴስ
2. ፆሳ ቦንቾይነ አንጆይ ኤንታ ቦላ ዮና መላ ꬉበ ግድዳ ኪተተꬃ እፁዋ ድጋና መላ ኤንታዉ ኦዴስ
3. ሱረ ዎዛናንነ ቱማተꬃን ፆሳኮነ እያ ጫቆ ቃላኮ ስማና መላ ኦዴስ።
ማፃፋ አይፈ ቆፋታ
ጎዳይ እስራኤለስ አሳ ዶስያ ዶሱዋ (1:1-5)
ፆሳ ፕርዳይ ካህነታ ቦላ ያና (1:6—2:9)
ጫቆ ቃላይ መቅስ (2:10-17)
ጎዳ ዩሳ (3:1-4)
ፆሰ ጭሞ ኮሸና (3:5-15)
አማነትያ አሳ ዎይቶነ ኢታ አሳ ሴሮ (3:16—4:6)
1
ያይቆባ ዶሰተꬃ፥ ኤሳዌ እፀተꬃ
1 ጎዳይ ምልክያሳ ባጋራ እስራኤለ አሳስ ኦድዳ ትንብተ ቃላይ ሀይሳ።
2 ጎዳይ ባ አሳኮ፥ “ታ ህንተና ዶሳስ” ያጌስ።
ሽን ህንተ፥ “ነ ኑና አይብን ዶሳዲ?” ያጌታ።
ጎዳይ ዛሪድ፥ “ኤሳዌይ ያይቆባ እሻ ግደነዬ? ሽን ታኒ ያይቆባ ዶሳስ፤ 3 ኤሳዌ እፃስ። ታኒ ደረይ ዳርያ ኤሳዌ ቢታ ባይሳ ኦꬃስ፤ እያ ላታ ዎርካናት ጉፕያ መላ ቢታ ኦꬃስ” ያጌስ።
4 ኤሳዌ ኮቸ ግድዳ ኤዶመ አሳይ፥ “ኑ ካታማት ላለትኮካ፥ ኑ ኤንታ ዛሪድ ኬፃና” ያግኮካ፥
ኡባፈ ዎልቃማ ጎዳይ፥ “ኤንቲ ዛሪድ ኬፃና፥ ሽን ታኒ ላላና። አሳይ ኤንታ፥ ‘ሀ ቢታይ ኢታ ቢታ፤ ሀ አሳይካ ጎዳይ መርናዉ ሀንቀትዳ አሰ’ ያጋና” ያጌስ።
5 ሄሳ ህንተ፥ ህንተ አይፈን በእድ፥ “ሄኮ፥ ጎዳይ እስራኤለ ቢታፈ ካረንካ ዎልቃማ” ያጋና።
ቦረትዳ ያርሾ
6 ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ታ ሱንꬃ ካዉሽያ ካህነቶ፥ ናእ ባ አዋ፥ አይለይ ባ ጎዳ ቦንቼስ። ያትን፥ ታኒ ህንተዉ አዋ ግድኮ፥ ህንተ ታና ቦንችያ ቦንቾይ አዉኔ? ታኒ ህንተዉ ጎዳ ግድኮ፥ ህንተ ታዉ ያይያ ያሻይ አዉኔ? ህንተ ታ ሱንꬃ ካዉሽደታ። ህንተ ዛሪድ፥ ‘ኑኒ ነ ሱንꬃ ዋትድ ካዉሽዶ?’ ያጌታ።
7 “ህንተ ታ ያርሾ በሳን ቱና ካꬅ ዎታ። ቃስ፥ ‘ኑኒ ነና ዋትድ ቱንስዶ?’ ያጌታ። ህንተ፥ ‘ጎዳ ያርሾ በሳይ ካትዳባ’ ያግድ ታና ቱንስደታ። 8 ህንተ ቆቀ መሄ ያርሽያ ዎደ ሄስ ቆሆ ግደነዬ? ህንተ ሀርጋንቾ ዎይኮ ዎበ መሄ ያርሽያ ዎደ ሄስ ቆሆ ግደነዬ? ህንተ ሄሳ መላ መሄ ህንተ ሀላቃስ እምያኮ፥ እ ሄሳ ኤካናባነ እያን ኡፋይታናባ ህንተዉ ዳኒ? ያጌስ ኡባፈ ዎልቃማ ጎዳይ።
9 “ሀእ ፆሳይ ህንተዉ ቃታና መላ እያ ዎስተ። ዎና ህንተ ሄሳ መላ እሞታ እያዉ እምን፥ እ ህንተና ማዳኔ?” ያጌስ ኡባፈ ዎልቃማ ጎዳይ።
10 “ህንተ ታ ያርሾ በሳን ሀዳ ታማ ኤꬆና መላ ፆሳ ኬꬃ ፐንግያ ጎርድያ እስ አስ በንትዳ ግደረነሽን! ታ ህንተናን ኡፋይትከ፤ ህንተ እምያ እሞታካ ኤክከ” ያጌስ ኡባፈ ዎልቃማ ጎዳይ።
11 “አው ዶልያሶፐ ዉልያሶ ጋካናዉ ታ ሱንꬃይ ካዎተꬃታ ግዶን ዎልቃማ። ኡባ በሳን ታ ሱንꬃስ እፃነ ጩይሳናነ ጌሻ ያርሾ ያርሻና፤ ታ ሱንꬃይ ካዎተꬃታ ግዶን ዎልቃማ” ያጌስ ኡባፈ ዎልቃማ ጎዳይ።
12 “ሽን ህንተ፥ ‘ጎዳ ያርሾ በሳይ ቱና፤ እያን ያርሸትያ ካꬅካ ካትዳባ’ ያግድ እያ ካዉሽደታ። 13 ቃስ ህንተ፥ ‘ሀይስ ጮ ዳቡርስ’ ያግድ፥ ቅꬍድ ጩትደታ።
“ህንተ ቦንቅድ ኤህዳባ ዎይኮ ዎበ ዎይኮ ሀርጋንቾ መሄ ያርሼታ፤ ያትን፥ ታኒ ሄሳ ህንተ ኩሸፐ ኤካናዉ በሲ? 14 ታኒ ግታ ካዎ፤ ታ ሱንꬃይካ ካዎተꬃታ ግዶን ቦንቸትዳይሳ ግድያ ግሾ፥ ፆሳስ እማና ግድ፥ ዶርዳ ማራዘይ እያ መህያ ግዶን ደእሽን፥ እያ አግድ፥ ቦረትዳ ማራዘ ያርሾ ሽሺያ አስነ ጭምያ አስ ባደትዳባ ግዶ” ያጌስ ጎዳይ።