1 “ሀእካ ካህነቶ፥ ሀ ኪታይ እመትዳይ ህንተሳ። 2 ህንተ ስኦና እፅኮ፤ ታ ሱንꬃ ቦንቻናዉ ህንተ ዎዛናን ታ ቃላ ዎꬆና እፅኮ፥ ታ ህንተ ቦላ ባደꬅ የዳና፤ ህንተ አንጁዋ ታኒ ባደꬃን ላማና። ህንተ ህንተ ዎዛና ታና ቦንቻናዉ ጊግስቦና ግሾ፥ ታ ህንተና ባዳስ” ያጌስ ኡባፈ ዎልቃማ ጎዳይ።

3 “ታኒ ህንተ ኮቻ ሴራና፤ ህንተ ያርሾ መሄ ኦሻ ህንተ ሶምኦን ላላና፤ ህንተካ እያራ እስፈ ሆለታና። 4 ሄ ዎደ ታ ሌወራ ጫቅዳ ጫቆይ፥ ምንድ ዳና መላ ሀ ኪታ ኪትዳይ ታና ግደይሳ ህንተ ኤራና” ያጌስ ኡባፈ ዎልቃማ ጎዳይ።

5 “ታ እያራ ጫቅዳ ጫቆይ ደኦነ ሳሮተꬃ ጫቆ፤ እ ታዉ ያያና መላ ደኦነ ሳሮተꬃ እያዉ እማስ፤ እካ ታዉ ያይስ፥ ታ ሱንꬃ ቦንችዳ መላ ደእስ። 6 ቱማ ትምርተይ እያ ዶናን ደእስ፤ እያ እንፃርሳንካ ዎርዶይ በንትቤና። እ ታራ ሳሮተꬃንነ ሱረተꬃን ሄመትስ፤ ቃስ ዳሮታ ናጋራፐ ዛርስ። 7 ካህነይ፥ ኡባፈ ዎልቃማ ጎዳይ ኪትዳይሳ ግድያ ግሾ፥ እያ መተርሻይ ኤራተꬅ ናጋናዉ ኮሼስ፤ አሳይ ኤራተꬅ እያ ዶናፐ ታማራናዉ በሴስ” ያጌስ ኡባፈ ዎልቃማ ጎዳይ።

8 “ሽን ህንተ ታ ኦግያፐ ጋፃ ከይደታ፤ ህንተ ትምርትያን ዳሮታ ꬉብደታ፤ ታኒ ሌወራ ጫቅዳ ጫቁዋ መንꬅደታ። 9 ሄሳ ግሾ፥ ህንተ ታ ኦግያን ቦና እፅድ፥ ህንተ ትምርትያን አሳ ግዶን ሻሄተꬅ መꬍያ ግሾ፥ ታ ህንተና አሳ ኡባ ስንꬃን ካታናዳነ ካዉያናዳ ኦꬃስ” ያጌስ ኡባፈ ዎልቃማ ጎዳይ።

10 ኑ ኡባስ እስ አው ደኤስ ግደኔ? ኑና እስ ፆሳይ መꬍበነዬ? ያትን፥ ኑ እሶይ እሱዋስ አማነቶና እፅድ፥ ኑ ማይዛታ ጫቁዋ አይስ መንꬃኔ? 11 ይሁድ ጭምስ፤ እስራኤለንነ የሩሳላመን ቱናባይ ኦሰትስ፤ ይሁድ አላጋ ፆሳ ማጫ ናይታ ኤክድ፥ ጎዳይ ዶስያ ፆሳ ኬꬃ ቱንስስ። 12 ሄሳ ታማርሰይነ ካልያ ኦንካ፥ ኡባፈ ዎልቃማ ጎዳስ ያርሾ ኤህያኮካ፥ ጎዳይ እያ ያይቆባ ዱንካንያፐ ꬋይሶ።

13 ቃስ ህንተ ኦꬅያ ሀራባይ አይበ ጊኮ፥ ጎዳይ ህንተ ያርሹዋኮ ፄሎና ግሾ ዎይኮ ኡፋይሳን ኤኮና ግሾ ያርሾ በሳ አፉꬃን፥ ዬሆንነ አዛኖን ኩንꬄታ። 14 ህንተ፥ “እ ኑ ያርሹዋ አይስ ኤከኔ?” ያግድ ኦይቼታ። ሄስ ሀንዳይ፥ ህንተ፥ ህንተ ናአተꬃ ማቸራ ጫቅዳ ጫቁዋ መንꬅዳ ግሾነ ጭምዳ ግሾሳ፤ እያ ነ ምየነ ነ ጫቆ ማቾ ግድያ ግሾ ጎዳይ ማርካ። 15 ጎዳይ ህንተዉነ ህንተ ማቸታስ እስ አሳተꬅነ እስ አያን ዳና መላ ኦꬅቤኔ? ሄሳ አይስ ኦꬅዴ? ፆሳ ያይያ ኮቸ ዳና መላ ኮይዳ ግሾሳ። ሄሳ ግሾ፥ ህንተ አያና ናግተ፤ ህንተ ናአተꬃ ማቸታ ጭሞፍተ።

16 “ታኒ ጎዳይ፥ እስራኤለ ፆሳይ፥ አዝን ባ ማችዉ የዳናይሳ እꬃይስ፤ ባ ማኡዋ ኢታ ኦሶን ካምያ ኦናካ ታ እፃይስ። ሄሳ ግሾ፥ ህንተ አያና ናግተ፤ ህንተ ናአተꬃ ማቸታ ጭሞፍተ” ያጌስ ኡባፈ ዎልቃማ ጎዳይ።

17 ህንተ፥ ህንተ ኦዳን ጎዳ ሳለꬅደታ።

ህንተ ዛሪድ፥ “ኑኒ እያ ዋትድ ሳለꬅዶ?” ያጌታ።

ህንተ እያ ሳለꬅዳይ፥ “ኢታ ኦꬅያ ኡባይ ጎዳ ስንꬃን ሎኦ፤ እካ ኤንታን ኡፋይቴስ” ያጉሳና፤ ዎይኮ፥ “ፅሎ ፕርድያ ፆሳይ አዉን ደኢ?” ያጉሳና።