1 “ሄኮ፥ ታ ስንꬃን ኦገ ጊግሳና መላ ታ ኪታንቹዋ ካሰታዳ ኪታና። ህንተ ኮያ ጎዳይ ቆፖና ደእሽን ባ ኬꬃ ያና። ህንተ ኡፋይሳን ናግያ፥ ጫቆ ኪታንቾይ ያና” ያጌስ ኡባፈ ዎልቃማ ጎዳይ።

2 ሽን እ ብራ ሴርስድ ጌሽያ ታማ መላነ ማኡዋ ሜጭያ ሳሙና መላ ግድያ ግሾ፥ እ ያ ጋላሳን ዳንዳእ ኤቃናይ ኦኔ? ቃስ እ ቆንጭያ ዎደ እያ ስንꬃን ኤቃናዉ ዳንዳኤይ ኦኔ? 3 እ ብራ ሼሽያነ ጌሽያ አሳዳ ኡታና። እ ሌወ ኮቻታ ብራዳነ ዎርቃዳ ጌሻና። ሄ ዎደ ኤንቲ ጎዳስ ፅሎተꬃን ያርሾ ያርሻና። 4 ሄ ዎደ ይሁዳነ የሩሳላመ ያርሾይ በን ዎደታነ አꬍዳ ላይꬃዳ ጎዳ ኡፋይስያባ ግዳና።

5 “ሄሳፈ ጉየ፥ ፕርዳስ ታኒ ህንተኮ ያዳ፥ ብታንቾታ፥ ላመይሳታ፥ ዎርዶን ጫቀይሳታ፥ ኦሳንቾታ ዳሞዘ ድገይሳታ፥ አምኤታነ ይኦታ ኡንኤይሳታ፥ በታንቾታስ ፕርዳ ድገይሳታነ ታዉ ያዮናይሳታ ቦላ ኤሶን ማርካታና” ያጌስ ኡባፈ ዎልቃማ ጎዳይ።

6 “ታኒ ጎዳይ ላመትከ፤ ሄሳ ግሾ፥ ህንተኖ ያይቆባ ኮቻቶ፥ ህንተ ꬋይበከታ። 7 ህንተ ማይዛታ ዎደፐ ዶምድ፥ ታ ዎጋፐ ካረ ከይደታ፤ እያ ናግበከታ። ሀእ ታኮ ስምተ፤ ታንካ ህንተኮ ስማና” ያጌስ ኡባፈ ዎልቃማ ጎዳይ።

ሽን ህንተ፥ “ኑኒ አይ ኦገን ስምኖ?” ያግድ ኦይቼታ።

8 “አስ ፆሰ ካይሶቲ? ሽን ህንተ ታና ካይሶትደታ።”

ቃስካ ህንተ፥ “ኑኒ ነና ዋትድ ካይሶትዶ? ያጌታ።

“ህንተ አስራታንነ እሞታን ታና ካይስደታ። 9 እስራኤለ አሳ ኡባይ ታና ካይሶትዳ ግሾ፥ ህንተ ባደትዳይሳታ። 10 ታ ኬꬃን ካꬅ ዳና መላ አስራታ ኡባ ሻለን የግተ። ያትድ፥ ታኒ ሳሎ ማስኮትያ ዶያዳ አንጆ ህንተዉ ፓላህሳዳ እሞና እፅኮ ሄሳን ታና ፓጭተ” ያጌስ ኡባፈ ዎልቃማ ጎዳይ።

11 “ካꬅ ሞና መላ ታኒ ህንተ ግሾ፥ ጎንዱዋ ሴራና፤ ጋደን ደእያ ዎይነ አይፈይካ ቆቆፈተና። 12 ህንተ ቢታይ ዳናዉ እንጀትያ ቢታ ግድያ ግሾ፥ ካዎተꬃት ኡባይ ህንተና አንጀትዳይሳታ ያጋና” ያጌስ ኡባፈ ዎልቃማ ጎዳይ።

13 ጎዳይ ሀይሳዳ ያጌስ፦ “ህንተ ታ ቦላ ምኖ ቃላ ኦደትደታ። ያትድ ቃስ፥ ‘ኑኒ ነ ቦላ ዎይግድ ምኖ ቃላ ኦደትዶ?’ ያግድ ኦይቼታ።

14 “ህንተ፥ ‘ፆሳስ ኦይስ ሀዳ፤ እያ ኪታ ናግድ፥ ኡባፈ ዎልቃማ ጎዳ ስንꬃን አዛንያ አሳዳ ስመረተꬅ ኑና አይ ማድዴ? 15 ሀእካ ኑኒ ኦቶረይሳታ አንጀትዳይሳታ ጎስ፤ ኢታ ኦይሳት ዱረቶሶና፤ ሀር አቶሽን ኤንቲ ፆሳ ፓጭሸካ ከስ ኤኮሶና’ ያጌታ” ያጌስ ፆሳይ።

16 ሄ ዎደ ጎዳስ ያየይሳት እሶይ እሱዋራ ኦደትዶሶና፤ ጎዳይካ ሀይዝድ ስእስ። ጎዳስ ያየይሳትነ እያ ሱንꬃ ቦንቸይሳት ዶገቶና መላ ኤንታ ሀሳይስያ ማፃፋይ እያ ስንꬃን ፃፈትስ። 17 “ኤንቲ ታባ ግዳና፤ ታኒ ኦꬅያ ጋላስ ኤንቲ ታዉ ቡዞ ሚሸ ግዳና፤ አው ባዉ ኦꬅያ ባ ናአ ማረይሳዳ ታኒ ኤንታ ማራና። 18 ሄ ዎደ ህንተ ስሚድ ፅሉዋነ ናጋራንቹዋ ግዶን፥ ፆሳስ ኪተተይሳነ ኪተቶናይሳ ግዶን ደእያ ዱማተꬃ በአና” ያጌስ ኡባፈ ዎልቃማ ጎዳይ።