1 Yihuda kochati Paaresa, Hesiroona, Karma, Hooranne Sobaala.

2 Sobaala na7ay Rayi Yahaata yelis; Yahaati Ahumayanne Lahada yelis. Haysati Xor7ata yarata. 3 Exaama adde nayti Izira7eele, Yishmanne Yidibaasha; enta michiya Haxilelpoono. 4 Panu7eeli Gadoora yelis. Exeri Husha yelis. Huuri ba aaye Efraatas bayra na7a; Huuri Beeteleme aawa. Haysati Huura yarata.

5 Tequhe aawa Ashihuuras Heelonne Na7ira geetetiya nam7u macheti de7oosona. 6 Na7ira Ahuzama, Hefeera, Teminanne Ashitaara Ashihuuras yelasu; haysati Na7iri nayta. 7 Heela adde nayti Dereta, Yixhaaranne Etnaana. 8 Qooxe adde nayti Anuba, Xobebanne Aharheela.

9 Yaabexi ba ishatape aadhidi bonchetida asi. Iya aayiya, “Taani iya iita iqethan yelida gisho, iya sunthay Yaabexa” gada xeegasu. 10 Yaabexi Isra7eele Xoossaa xeegidi, “Abeeti Xoossaw, tana anja; ta zawa dalgisa. Ne kushey taara gido; tana azzanthonna mela qohiyabaape naaga” yaagidi woossin Xoossay iya woosa si7is.

11 Shuha ishay Kaluba Mahira yelis; Mahiri Eshtoona yelis. 12 Eshtooni Beet-Raafa, Pasehanne Irnahasha aawa Tahina yelis. Tahini Nahaasa katamaa asaa yelis. Haysati Reka biittan de7idosona.

13 Qeneza adde nayti Gotoniyalanne Saraya; Gotoniyala adde nayti Hatatanne Ma7onotaya. 14 Ma7onotayi Ofira yelis. Sarayi Iyo7aaba yelis. Iyo7aabi Kushe Hiillata Zangaara geetetiya bessan de7iya asaa yelis.

15 Yoofone na7aa Kaaleba nayti Ira, Eelanne Na7aama. Ela na7ay Qeneza.

16 Yihali7eela nayti Ziifa, Zifaha, Tirayanne Asar7eela.

17 Ezira adde nayti Yetera, Mereeda, Eferanne Yaalona. Mereedi Gibxe kawa na7iw Bitiya ekin iya Mayraamo, Shamayanne Yishiba yelasu. Yishibi Eshtamoo7a yelis. 18 Yihuda biittafe ekida machiya Gadoora aawa Yereda, Sooko aawa Hebeeranne Zanoha aawa Yaqit7eela yelasu. 19 Nahama miche, Hodiya mache nayti Gariman de7iya Qa7ila aawanne Ma7ikan de7iya Eshtamoo7a aawa.

20 Shimoona nayti Amnoona, Irna, Benihananne Tiloona.

Yishi7a nayti Zoheetanne Benzoheeta.

21 Yihuda na7aa Seela kochati Leeka aawa Era, Mareesa aawa Le7adanne Beet-Ashibe7a kataman de7iya liino ma7o daddeyisata yarata. 22 Harati qassi Yoqima, Iyo7aasa, Yashubileheema, Moo7abe haarida Sarafanne Kozeba kataman de7iya asata. Ha yeletaa mazgabey benipe doomidi de7ees. 23 Haysati Naxa7imaninne Gadeeran de7iya meqa miishe medhiya asata. Enti kawa ooso oothanaw iyara issife de7idosona.

24 Simoona nayti Nemu7eela, Yamina, Yariba, Zaaranne Saa7ula. 25 Saa7ula na7ay Saluma; Saluma na7ay Mibsaama; Mibsaama na7ay Masmaa7a; 26 Masmaa7a na7ay Hamu7eela; Hamu7eela na7ay Zakura; Zakura na7ay Same7a. 27 Same7i tammanne usupun adde naytanne usupun macca nayta yelis. Shin iya ishati daro na7a yelibookona. Yihuda kochaada Simoona kochay daribookona.

28 Simoona kochati Barsaabe katamaninne Molada, Haxar-Shu7aala, 29 Baala, Exema, Tolada, 30 Batu7eela, Horma, Xiqilaaga, 31 Beet-Markaboota, Hoxar-Susima, Beet-Biranne Sha7aarima katamatan de7idosona. Dawiti kawotana gakanaw haysati katamata gididi de7idosona. 32 Qassi enta gutati Exaama, Ayna, Irmoona, Tokenanne Ashshana. Enti kumethi ichashu katamata. 33 Ba7aale gakanaw ha katamata yuushuwan de7iya gutati ubbay entan gujetoosona. Haysati enti de7iya bessatanne banta yeletaa maara mazgaben xaafidi oykidosona.

34 Simoona yarata halaqati haysafe kaallidi xaafetidaysata. Enti Mashobaaba, Yamileka, Amasiyaasa na7aa Iyosiya, 35 Iyyu7eelanne Yoshiba na7aa Iyyu. Iyyu aawa aaway Asa7eela na7a Saraya. 36 Hara halaqati qassi Eliyo7ana, Yayqooba, Yashohaya, Asaya, Adi7eela, Yasmi7eela, Banayanne 37 Ziiza. Ziizi Shifa na7a; Shifi Aloona na7a; Alooni Yadaya na7a; Yadayi Shimira na7a; Shimiri Shamaya na7a. 38 Simoona yarata halaqati haysata.

Enta aawata kochay darishe bis. 39 Enti banta mehiyas heemmiya bessi koyishe Gadoora geliya bessaa matan de7iya zangaarape doloha baggara de7iya bessaa gakanaw bidosona. 40 Yan araddanne lo77o heemmiya bessi demmidosona; he biittay wopatethinne saroy kumida dalga biitta. Beni wode he biittan de7idaysati Kaama kochaa. 41 Haysafe qommon sunthay xaafetida Simoona kochati Yihuda kawa Hizqiyaasa wode Gadoora biitta bidi yan de7iya Kaama kochaanne Ma7uuna asata olidi dhaysidosona. He biittan enta mehiyas heemmiya bessi de7iya gisho, Simoona kochati hachi gakanaw yan uttidosona.

42 Simoona kochaafe ichashu xeetu asay Sayre zuma bidosona. Enta halaqati Yishi7a nayta Palaxa, Naara, Rafayanne Uzi7eela. 43 Baqatidi attida Amaaleqa asaa dhaysidi enti hachi gakanaw he biittan de7oosona.