1 Isra7eele bayra na7aa Robeela yeletay haysafe kaallidi xaafetidaysa. Robeeli bayra na7a; shin ba aawa hiixa tunisida gisho, bayratetha maatay Isra7eele na7aa Yoosefa naytas imetis. Hessa gisho, iya yeletay bayratetha maara naagidi xaafetibeenna. 2 Yihudi ba ishatape aadhidi mino; bayratethay Yoosefas imetidaba gidikoka, Isra7eele asaa haareysi Yihudape keyis. 3 Isra7eele bayra na7aa Robeela adde nayti Henooha, Pala, Hesiroonanne Karma.

4 Iyyu7eela na7ay Shamaya; Shamaya na7ay Googa; Googa na7ay Same7a; 5 Sama7a na7ay Mika; Mika na7ay Raya; Raya na7ay Bi7eela. 6 Bi7eela na7ay Asoore kawoy Telgeltelfelisoorii di77idi efida Bi7eera; Bi7eeri Robeela kochata halaqa. 7 Bi7eera dabboti, banta yeleta mazgaben xaafida Robeela yarata halaqati Iyyu7eelanne, Zakaryaasa. 8 Bi7eeli Azaaza na7a; Azaazi Shama7a na7a; Shama7i Iyyu7eela koche. Iyyu7eela kochati Aro7eera kataman, Nebo biittaninne Ba7aal-Ma7oona biittan de7idosona.

9 Robeela kochatas mehey Galadan darida gisho, enti yaape doloha bagga bidi, Efraxiisa shaafa gakanaw de7iya mela biittan uttidosona. 10 Saa7ola laythan Aggaara yaratara Robeela yarati oletidi xoonidosona. Galadape doloha baggara de7iya Aggaara yarata biittan uttidosona.

11 Gaade kochati Robeela kochatape pudeha baggan, Salka gakanaw de7iya Baasane biittan uttidosona. 12 Iyyu7eeli koyro yaratas halaqa; Safaami nam7antho yaratas halaqa. Yanaynne Safaami Baasanen uttida yaratas halaqa. 13 Enta dabboti, banta soo asan asan, Mika7eela, Masulaama, Saaba, Yoraya, Yaqkana, Zu7enne Ebeera. Enti kumethi laapuna. 14 Haysati Abikaala nayti Buza kochata. Buzi Yedaya yelis; Yedayey Iyesaya yelis; Iyesayi Mika7eela yelis; Mika7eeli Galada yelis; Galadi Idaya yelis; Idayi Huura yelis; Huuri Abihaala yelis. 15 Enta soo asaa halaqay Guna na7aa na7aa Abdi7eela na7aa Aka. 16 Enti Galadaninne Baasanen, yan de7iya katamataninne Saarona biittan mehey heemetiya bessatan uttidosona. 17 Hayisata yeletay Yihuda kawa Iyo7atama wode Isra7eele kawa Iyorbaama wode mazgaben xaafetis.

18 Robeela kochaafe, Gaade kochaafenne Minaase kochaa baggaafe gondalle oykeysati, mashshe danceysatinne donge dukeysati minonne olan loohidaysati 44, 760. 19 Enti Aggaara yaraara, Ixura yaraara, Nafesaranne Nodabaara oletidosona. 20 Enti he asaara oletishe Xoossako waassida gisho, maado demmidosona. Enti Xoossan ammanetida gisho, I entaw woosetis. Hessa gisho, Aggaara yaratinne entara de7iya harati enta kushen gelidosona. 21 Banta morketape ishatamu mukulu gimaleta, nam7u xeetanne ishatamu mukulu dorsata, nam7u mukulu haretanne xeetu mukulu asaa di77idi efidosona. 22 Olay Xoossaba gidida gisho daroti hayqidosona. Di7etetha wodey gakanaw he biittan de7idosona.

23 Minaase kochaafe bagga yaray Baasanepe doomidi, Ba7aal-Armoona, Saniranne Armoona zumaa gakanaw de7iya biittan uttidosona; enti he biittan daridosona. 24 Enta soo halaqati Efera, Yish7a, Eli7eela, Azri7eela, Ermiyaasa, Hodawanne Iyodi7eela. Haysati enta soo asan eretidaysata, xaalanne wolqaama.

25 Shin banta mayzata Xoossaas ammanetibokona; Xoossay enta sinthafe dhaysida he biitta xoossata goyinnidosona. 26 Hessa gisho, Isra7eele Xoossay Asoore kawa Pooha (hessika Telgeltelfelisoora) ayyaana denthethidi Robeela kochaa, Gaade kochaanne Minaase kochaafe baggaa di77idi, Halaha, Habooranne Haara biittanne Gozaana Shaafa efis. Enti hachi gakanaw yan de7oosona.