11
Dawiti Isra7eele Bolla Kawotis
(1 Same 5:1-10)
1 Hessafe guye, Isra7eele asa ubbay issife Kebroonan de7iya Dawitako bidi, “Nuuni ne suuthunne ne asho. 2 Kase Saa7oli kawo gididi de7iya wodeka, Isra7eele asaa olas kaalethiday nena. Goday ne Xoossay, ‘Ta asaa Isra7eele neeni heemmana; enta bolla neeni kawotana’ ” yaagis. 3 Isra7eele cimati ubbay kawa Dawitako yida wode I entara Kebroonan Godaa sinthan caaqis. Goday Sameela baggara odida qaalada Dawiti Isra7eele bolla kawotanaada enti iya tiyidosona.
4 Dawitinne Isra7eele asa ubbay Yerusalaame katamaa bidosona. He wode Yaabuse asay he bessan de7iya gisho he katamay Yaabuse geetetees. 5 Yaabuseti Dawitako, “Neeni ha katamaa gelanaw danda7aka” yaagidosona. Gidoshin, Dawiti Xiyoonen de7iya enta miixaa oykin, Xiyooney Dawita Katama geetetis. 6 Dawiti ba olanchota, “Yaabuseta koyrottidi oliya oonika toora mocona gidana” yaagis. Xaruya na7ay Iyo7aabi koyrottidi olidi halaqa gidis. 7 Dawiti he miixan de7ida gisho he katamay Dawita Katama geetetis.
8 Dawiti Miilope doomidi he katamaa zaaridi keexis; attida baggaa Iyo7aabi zaaridi keexis. 9 Ubbaafe Wolqaama Goday iyara de7iya gisho Dawiti minni minni bis.
Mino Gidida Dawita Asata
(2 Same 23:8-39)
10 Mino gidida Dawita asati haysafe kaallidi xaafetidosona. Goday Isra7eeles gida qaalada Dawiti kawotana mela ha asati Isra7eele asaara daro maaddidosona. Qassi iya kawotethaa minthidosona.
11 Mino gidida Dawita asati haysafe kaallidi de7eyisata. Entafe heedzati daro eretidaysata. Heedzatape koyroy Hakmoona addiya Yashobi7aama; I issi toho olan heedzu xeetu asaa ba tooran wodhis. 12 Iya kaalley, heedzu mino asatape issoy Ahoha addiya Dooda na7a Alaazara. 13 Filisxeeme asay oletanaw Pasdamima geetetiya bessaa shiiqida wode Alaazari Dawitara de7ees. Isra7eele olanchoti Filisxeeme asata sinthafe baqatiya wode Alaazari banga gaden de7ees. 14 Inne iya asati gadiya giddon Filisxeeme asaara oletin, Goday gita xoono immidi enta ashshis.
15 Filisxeeme olanchoti Raafayme zangaaran dunkaanida wode hastamu halaqatape heedzati Dawiti de7iya Adulaama gongoluwan de7iya zaallako bidosona. 16 He wode Dawiti miixan de7ees; Filisxeeme olanchotape issi cugay Beeteleme olidi oykis. 17 Dawiti haathe uyanaw amotidi, “Beeteleme pengiya matan de7iya pulto haathaafe tana ushshanay oone!” yaagis. 18 Heedzu mino asati Filisxeemeti dunkaanida bessaa kanthi bidi Beeteleme pengiya matan de7iya pulto haathaafe duuqidi Dawitas ehidosona. Shin Dawiti uyonna ixidi haatha Godaa sinthan tigis. 19 “Ha haatha ushshi taape haako! Banta shempuwa bayzidi ehida ha asata suuthaa taani uyo? Enti banta shempuwa aathidi immidi ehidosona” yaagis. Hessa gisho, Dawiti haatha uybeenna. Heedzu mino asati hessa oothidosona.
20 Iyo7aaba ishay Abisi hastamu olanchotas halaqa. I ba tooran heedzu xeetu asaa wodhidi, ika ha heedzatada eretida asi gidis. 21 Abisi heedzatara taybetonna ixikoka, I heedzatape aadhidi bonchetida asi; I entaw halaqa gidis.
22 Qabxeela addey Yoodahe na7ay Banayi mino asi; I mino ooso oothis. I nam7u eretida Moo7abe asata wodhis. Qassi shachi wodhida issi gallas olla giddo gelidi gaammo wodhis. 23 Banayi ichashu wadha gidiya Gibxe addiya wodhis. Gibxe addiya kushen wandaraashe mela toori de7ees; shin Banayi xam7a oykidi addiyako bidi iya kushiyan de7iya toora dafi ekidi iya tooran iya wodhis. 24 Yoodahe na7ay Banayi haysa oothis. Iya sunthay he heedzataysada eretis. 25 I hastamata giddon daro bonchetis; shin I heedzata taybuwan deenna. Dawiti iya bana naageysata halaqa oothis.
26 Mino asati Iyo7aaba ishaa Asaheela, Beeteleme addiya Dooda na7aa Eliyaana, 27 Harooda addiya Samoota, Piloona addiya Selesa, 28 Tequhe addiya Esika na7aa Ira, Anatoota addiya Abi7ezera, 29 Kusata addiya Sabaka, Ahoha addiya Elaya, 30 Naxoofa addiya No7eeranne Banaha na7aa Heleda, 31 Biniyaamen de7iya Gib7a addiya Rabaya na7a Etaya, Pir7atoona addiya Banayasa, 32 Ga7aasa Zangaara matape yida Uraya, Araba addiya Abi7eela, 33 Barhuuma addiya Azmoota, Sa7alboona addiya Abi7eela, 34 Gizoona addiya Hasema, Harara addiya Shaage na7a Yoonataana, 35 Harara addiya Sakara na7a Ahi7aama, Ure na7aa Elfala, 36 Makeera addiya Hefeera, Piloona addiya Akiya, 37 Qarmeloosa addiya Hexira, Ezbaya na7aa Na7iraya, 38 Naatana ishaa Iyyu7eela, Hagira na7aa Mibhaara, 39 Amoone addiya Xeleqa, Xaruya na7aa Iyo7aaba ola miishiya tookiya Ba7eroota addiya Nahiraya, 40 Yatira addiya Iranne Gareeba, 41 Hite addiya Ooriyoona, Ahilaya na7aa Zabada, 42 Robeela koche gidida Shiiza na7aa Adina. I Robeela kochata halaqa; hastamati iyara issife de7oosona. 43 Hara mino asati Ma7ika na7aa Hanaana, Mitaane addiya Iyosaafexa, 44 Astaroota addiya Ooziyana, Aro7eera addiya Hotama nayta Shama7anne Yi7eela, 45 Shimira na7aa Yidi7eelanne iya ishaa Tiixa addiya Yooha, 46 Mahaawa addiya Eli7eela, Elnaama nayta Yiribayanne Yoshawa, Moo7abe addiya Yitima, 47 Xooba addiya El7eela, Obeedanne Ya7isi7eela.