1 Dawiti Qiisa na7aa Saa7olape baqatidi Xiqilaagan uttida wode iyako yida asati haysafe kaallidi xaafetidaysata. Enta kase Dawita olan maaddida mino asata giddon de7oosona. 2 Enti dongen dukeyisata; qassi ushacha kusheninne haddirsa kushen yambaranawnne donge dukanaw danda7oosona. Enti Biniyaame koche gidida Saa7ola kochata. 3 Enta halaqay Ahi7ezera; iyape kaallidi Iyo7aasa; enti Gib7a addiya Shama7a na7a.

Harati qassi Azmaawe nayta gidida Yizi7eelanne Palaxa, Baraka, Anatoote addiya Iyyu, 4 hastamata giddon wolqaama gididi, enta kaalethiya Gaba7oona addiya Yishima7iya, Ermiyaasa, Yahazi7eela, Yohaana, Gedaara addiya Yozabaata, 5 Eluzaya, Yarmoota, Balaya, Samara, Harifa addiya Safaaxa, 6 Qore koche gidida Elqaana, Yishiya, Azari7eela, Yoo7ezeranne Yashobi7aama, 7 Gadoora addiya Yirohaama nayta Yo7eelanne Zabada.

8 Dawiti bazzon de7iya miixan de7ishin, Gaade kochaafe guutha asati iyako yidosona. Enti minonne olas giigidaysata; gondallenne toora oykanaw danda7eyisata. Enta som7oy gaammo som7o mela; enti dere huuphera gupiya gen7e mela eesotoosona. 9 Enta halaqay Exera; nam7anthoy abdiyu; heedzanthoy Eli7aaba; 10 oyddanthoy Mismaana; ichashanthoy Ermiyaasa; 11 usupunthoy Ataya; laapunthoy Eli7eela; 12 hospunthoy Yohaana; uddufunthoy Elzabaada; 13 tammanthoy Ermiyaasa; tammanne issanthoy Makibanaya. 14 Haysati Gaade kochaa olanchotas halaqata. Entafe ziqay mato halaqa; dhoqay qassi shaalaqa gidis. 15 Yordaanose shaafay, gaxape gaxa gakidi kixida koyro ageenan pinnidaysati haysata. Enti zangaaran dolohanne wuloha baggan de7iya asaa ubbaa yedethidosona.

16 Biniyaame kochaafenne Yihuda kochaafe guutha asati Dawiti de7iya miixa bidosona. 17 Dawiti entara gahetanaw keyidi, “Hinte tana maaddanaw saro taako yidaba gidiko ta wozanay hintera gidana. Shin hinte tana ta morketas aathidi immanaw yidaba gidiko, hintena erite! Taani oothida iitabay bayna gisho nu aawata Xoossay hessa be7o; I hintena pirdo!” yaagis.

18 Hessafe guye, hastamata halaqa Amasaya bolla Xoossa Ayyaanay wodhin,

19 Dawiti Filisxeemetara gididi Saa7ola olanaw bida wode, Minaase kochaafe guutha asati Dawitara gahetidosona. Shin Filisxeemeta halaqati Dawitinne Dawita asay bantara boonnada diggidosona. Dawitinne Dawita asay, enta kawa Saa7olas aathidi immaneko gidi yayyida gisho Filisxeemeti zoretidaape guye enta guye zaaridosona. 20 Dawiti Xiqilaaga simmida wode Minaase kochaafe Dawita maaddanaw keyida asati Adina, Yozabaata, Yidi7eela, Mika7eela, Yozabaata, Elihanne Xiltaya. Haysati kase Minaase biittan shaalaqa. 21 Enti ubbay minonne wolqaama asi gidiya gisho Dawita zugidi oliya asaa olidi iya maaddidosona. 22 Dawita olanchoti, Xoossa olanchoda darana gakanaw iya maaddiya asay gallas gallas guzhetees.

23 Goday iyaw gidaysada Saa7ola kawotethaa Dawitako zaaranaw dancetidi Dawitako Kebroona bida olanchota tayboy haysafe kaallidi xaafetidaysata. 24 Gondallenne toora oykidi olas giigida Yihuda kochay 6,800. 25 Simoona kochaafe olas giigida minonne wolqaama olanchoti 7,100. 26 Leewe kochaafe 4,600. 27 Aarona kochaa halaqay Yoodahe; Yoodahera issife 3,700 asati de7oosona. 28 Saadoqi na7atethi, minonne wolqaama asi; Saadoqa soo asaape laatamanne nam7u halaqati iyara de7oosona. 29 Biniyaame koche gidida Saa7ola dabboti 3,000. Shin Biniyaame kochaafe dariya baggay Saa7ola soo asaas he wode gakanaw ammanetidosona. 30 Efreema kochaafe banta soo asan eretida minonne wolqaama asati 20,800. 31 Dawita kawoyanaw baanaw dooretida Minaase kochaafe baggati 18,000. 32 Isra7eele asay ay oothanaw bessiyako wodiyaba shaakidi eriya akeekancho asati, Yisakoora kochaa halaqati, nam7u xeeta; enta dabboti ubbay entaw kiitetoosona. 33 Ola miishe ubbaa oykidi banta kumetha wozanan Dawita maaddanaw giigida olanchotan Zabloona kochay 50,000. 34 Niftaaleme kochaafe 1,000 halaqatinne gondallenne toora oykiya 37,000 asati entara de7oosona. 35 Daane kochaafe olas giigida asati 28,600. 36 Olas keyanaw Aseera kochaafe giigida asati 40,000. 37 Yordaanose shaafape hefintha doloha baggan de7iya Robeela kochaafe Gaade kochaafenne Minaase koche baggaafe ola miishe ubbaa oykidi yida asati 120,000.

38 Ha ubba olanchoti Dawita Isra7eele bolla kawothanaw banta qofaa qachidi, Kebroona katamaa yidosona. Qassi Isra7eelepe attidaysati Dawita kawothanaw issi wozanan gididosona. 39 Enta dabboti entaw koshshiyaba giigisida gisho mishenne uyishe Dawitara heedzu gallas uttidosona. 40 Isra7eele asaas ufaysi gidiya gisho, pudeha baggan de7iya Yisakoorape, Zabloonapenne Niftaalemepe daro asay dhiille, balase nuka, woyne teera, woyne ushshunne zayte haren, baqulon, gimaleninne booran caanidi ehidosona; qassi enti mehenne dorse shukidi maanaw ehidosona.