1 Dawiti shaalaqataranne mato halaqatara zoretis. 2 Isra7eele asa ubbaa, “Hintew lo77o daaniyaba gidikonne Godaa nu Xoossaa shene gidiko, Isra7eele biitta gaxan de7iya nu dabboti, hessadaka banta katamataninne hentha bessatan de7iya kahinetinne Leeweti nuuko shiiqana mela ase kiittoos. 3 Saa7ola kawotethaa wode qeli geetetida nu Xoossaa Taabotiya ane zaaridi ehoos” yaagis. 4 Dawita oday lo77o gidida gisho asa ubbay ma7is.

5 Hessa gisho, Dawiti Xoossa Taabotiya Qiriyaat-Yi7aarimepe ehana mela Gibxe zawape doomidi Hamaata Pino gakanaw de7iya Isra7eele asa ubbaa shiishis. 6 Dawitinne Isra7eele asa ubbay kiruubetape giddon ba araata bolla uttida Godaa sunthay xeegetida Xoossa Taabotiya ehanaw Yihuda biittan de7iya Baala geetetiya Qiriyat-Yi7aarima bidosona. 7 Xoossa Taabotiya ooratha para gaaren wothidi, Amnadaabe soope ehidosona; Oozinne Ahiyoy gaariya laaggoosona. 8 Dawitinne Isra7eele asa ubbay diithinne maasinqo kaa7ishe, karaabo baqishe, daala giirsishe, zaye punnishe banta kumetha wolqan Xoossa sinthan ufaytidi, yexishe Xoossaa bonchidosona.

9 Enti Kidoona wudumma gakiya wode boorati dhubetida gisho Oozi Taabotiya oykanaw ba kushiya yeddis. 10 Ooza kushey Taabotiya bochida gisho, Godaa hanqoy Oza bolla eexis. Hessa gisho, Goday iya xadikin, I he bessan Xoossa sinthan hayqis.

11 Goday hanqetidi Ooza wodhida gisho, Dawiti yilotis. Hachi gakanaw he bessay Oozi dhuketida bessaa geetetees. 12 He gallas Dawiti Xoossaa yayyida gisho, “Xoossa Taabotiya taako waata ehanaw danda7iyana?” yaagis. 13 Dawiti Taabotiya Yerusalaame efanaape gidi Gaate addiya Abdaara soo efis. 14 Xoossa Taabotey Abdaara son iya soo asaara heedzu ageena gam7is. Goday iya soo asaanne iyaw de7iya ubbaa anjis.