1 Xiroosa kawoy Kiraami Dawitas gadho keexana mela kiitetiya asata, shuchu masseysatanne anaaxeta ziga mithara yeddis. 2 Goday Isra7eele bolla iya kawo oothidi minthidaysanne ba asaa Isra7eele gisho iya kawotethaa bonchidaysa Dawiti eris.

3 Hessafe guye, Dawiti Yerusalaamen hara macho ekidi adde naytanne macca nayta yelis. 4 Dawiti Yerusalaamen yelida adde nayti Samuusa, Sobaaba, Naatana, Solomone, 5 Yibhaara, Elisu7a, Elfalaxa, 6 Noga, Nafega, Yafaya, 7 Elisaama, Eldaana, Elfalaxa.

8 Dawiti Isra7eele ubbaa bolla kawo gididi tiyetidaysa Filisxeemeti si7ida wode ubbay Dawita olidi oykanaw keyidosona. Dawiti hessa si7idi entara oletanaw keyis. 9 Filisxeemeti Raafayme zangaara yidi oykidosona. 10 Dawiti, “Taani Filisxeemeta olo? Neeni enta taw aatha immanee?” yaagidi Xoossaa oychis.

Goday, “Bada ola; taani enta new aatha immana” yaagis.

11 Dawitinne iya asay Ba7al-Parasime geetetiya bessaa bidi yan enta xoonidosona. Dawiti, “Haathi dhuusidi keyeysada Xoossay ta morketa giddora tana kanthisis” yaagis. He bessaa sunthay Ba7al-Parasime geetetis. 12 Filisxeemeti banta eeqata he bessan yeggidi bin, Dawiti kiittidi enta eeqata xuugisis.

13 Filisxeemeti zaari he zangaara yidi olidosona. 14 Dawiti Xoossaa zaaridi oychis. Xoossay, “Enta guyera yuuya aadhada wolaa matan eqada olape attishin, sintha baggara keyopa. 15 Wola huuphen salpe girsi neeni si7iya wode olanaw keya. Hessi Filisxeeme olanchota shocanaw Xoossay neepe sinthe aadhidaysas malla” yaagis. 16 Xoossay kiitidaysada Dawiti oothis. Gaba7oonape Gezera gakanaw Isra7eele asay Filisxeeme olanchota wodhidosona. 17 Dawita sunthay biitta ubbaa gakis. Kawotetha ubbay Dawitas yayyana mela Goday oothis.