1 Dawiti ba gadhon uttidaape guye nabiya Naatanako, “Taani zigape keexetida keethan de7ayis; shin Godaa caaqo Taabotey dunkaane giddon de7ees” yaagis.

2 Naatani Dawitako, “Goday neera de7iya gisho ne wozanay qopidaba ubbaa ootha” yaagis.

3 Shin he qamma Godaa qaalay Naatanako haysada yaagishe yis; 4 “Bada ta aylliya Dawitako haysada yaaga; ‘taani daana keethe keexanay nena gidaka. 5 Taani Isra7eele Gibxefe kessida wodepe doomada hachi gakanaw keethan de7abike; taani dunkaanepe dunkaane, bessafe bessi yuuyashe de7as. 6 Taani Isra7eele asa ubbaara yuuyida bessa ubban, ta asaa heemmana mela taani shuumida asaape oona Taw ziga keethi ayis keexabikii?’ gada oychabike” yaagees.

7 “Hessa gisho, ta aylliya Dawitako bada Ubbaafe Wolqaama Goday haysada yaagees; ‘Taani nena dorse heemmiya bessape denthada ta asaa Isra7eele kaalethana mela ehas. 8 Neeni bida besse ubban taani neera gidas; ne morketa ubbaa ne sinthafe diggas. Hiza taani ha sa7an eretida gita asaada ne sunthaa gitayana. 9 Taani ta asaa Isra7eeles besse immada, enta he bessan tokana. Hessa gisho, enti banta bessan de7ana; enti zaaridi waabaqokona. Kase taani ta asaa Isra7eele bolla daynnata shuumada wode morketi naaqidaysada, 10 zaaridi iita asati enta naaqokona. Taani ne morketa ubbaa new haarsana.

“ ‘Hessa bolla Goday ba huuphen new keethe keexanaysa odees. 11 Ne hayqada ne mayzatan gahetiya wode taani neepe guye ne naytape issuwa denthada iya kawotethaa minthana. 12 Taw keethe keexanay*Keethe keexanay: Ha bessan keethe keexanay geetetiya soo asaa woyko sheesha woyko yeletetha dichanay iya guussu. Paydo 17, 23, 24, 25, 27 xeella iya; taani iya araata merinaw mintha essana. 13 Taani iyaw aawa gidana; ika taw na7a gidana. Neepe sinthe kawotida Saa7olape ta maarotetha†Maarotetha: ha bessan odetida maarotethay duuxonna siiqo woyko merinaw aggonna siiqo woyko laametonna siiqo guussu. ekidaysada taani iyape ekike. 14 Taani iya ta asaa bollanne ta kawotethaa bolla merinaw shuumana; iya araatay merinaw minni eqana’ ” yaagis.

15 Naatani Xoossay iyaw qoncisida qaala ubbaa Dawitas odis.

16 Hessafe guye, kawoy Dawiti dunkaaniya giddo gelidi, Godaa sinthan uttidi, haysada yaagidi woossis; “Abeeti Godaw, Xoossaw neeni haysa ubbaa taw oothanaw taani oonee? Ta soo asayka aybee? 17 Abeeti Godaw, hessi ne ayfiya sinthan guutha daanin, ne aylliya soo asaas sinthafe hananaba odadasa. Neeni tana gita asi oothada xeelladasa. 18 Neeni tana ne aylliya bonchida gisho, Dawiti ay gaanaw danda7ii? Neeni tana ne aylliya eraasa. 19 Abeeti Godaw, ne aylliya gishonne ne wozanaa qofaada ha gitaba ubbaa oothada, ha gita ufaysa qaala ubbaa tana erisadasa. 20 Abeeti Godaw, ne meli oonika baawa. Nuuni nu haythan si7idaysada neepe attishin, hara xoossi baawa. 21 Neeni ne ase oothanaw wozida ne asaa Isra7eele daaniya hara kawotethi sa7a bolla baawa. Neeni oothida gitanne malaalsiya oosota gaason ne sunthay biittan eretis. Neeni Gibxefe wozida ne asaa sinthafe kawotethata goodda kessadasa.Zaare 4:7. 22 Neeni ne asaa Isra7eele merinaw nebaa oothadasa. Abeeti Godaw, neeni enta Xoosse gidadasa.

23 “Abeeti Godaw, neeni ne aylliyasinne iya soo asaas odidabay merinaw minnidi de7o; neeni oothana gidaysada ootha. 24 ‘Ubbaafe Wolqaama Goday, Isra7eele Xoossay tuma Isra7eele Xoosse’ asay gaanada ne sunthay merinaw minnidi daananne gita gidana. Ne aylliya Dawita soo asay ne sinthan minnidi daana.

25 “Abeeti ta Xoossaw, neeni ne aylliyas keethe keexana gada qoncisadasa. Hessa gisho, taani ne aylley ha woosa woossanaw minnas. 26 Abeeti Godaw, neeni Xoosse! Neeni ha lo77o ufaysa qaala taw ne aylliyas oothana gadasa. 27 Ne sinthan merinaw daana mela ne aylliya soo asaa anjanaw koyadasa. Abeeti Godaw, ne anjidaysi merinaw anjetidaysa gidana” yaagidi woossis.