1 Hessafe guye, Dawiti Filisxeemeta xoonidi haaris; Geete katamaanne iya gutata Filisxeemeta kushepe ekis. 2 Dawiti Moo7abe asaa xoonin, enti iyaw haaretidi giiridosona.

3 Hamaata katamaa matan de7iya Suubba kawoy Adraazari, ba kawotetha Efraxiisa shaafa gakanaw aassanaw bishin Dawiti iya olis. 4 Dawiti Adraazarape issi mukulu para gaareta, laapun mukulu para asatanne laatamu mukulu toho asata di77is. Dawiti xeetu gaaretas gidiya parata ashshidi hara parata ubbaas gedaa xaphuwa qanxis.

5 Damasqo kataman de7iya Sooreti Suubba kawa Adraazara maaddanaw yida wode Dawiti entafe 22,000 asaa wodhis. 6 Hessafe guye, Soore biittan Damasqo kataman ola miixa medhis. Soore asati Dawitas haaretidi giiridosona. Dawiti bida bessa ubban Goday iyaw xoono immis.

7 Dawiti Adraazara oosanchoti tookida worqa gondalleta ekidi Yerusalaame efis. 8 Qassi Dawiti Adraazari haariya Xebahanne Kuna katamatape daro naase birata ekis. Hessafe guye, Solomoney he naase biratape oosetida kereta, tuussatanne dumma dumma miisheta oothis.

9 Dawiti Suubba kawa Adraazara olanchota ubbaa xoonidaysa Hamaata kawoy Toyi si7is. 10 Toyi Adrazaarara oletishe gam7ida gisho Dawiti Adraazara olidi xoonida gisho iya hashshu gaanawunne sarothanaw ba na7aa Hadoraama kawa Dawitako kiittis. Hadoraami worqafe, birapenne naase biratape oosetida miisheta imota ekidi bis. 11 Kawoy Dawiti Edoomepe, Moo7abepe, Amoonepe, Filisxeemetapenne Amaaleqatape di77idi ekida biraanne worqa ha miishetara gathidi Godaas dummayidi wothis.

12 Xaruya na7ay Abisi Edoome asaape 18,000 asaa, Maxine Zangaaran wodhis. 13 Dawiti Edoomen ola miixa medhis; yaatin, he biitta asa ubbay Dawitas haaretis. Dawiti bida bessa ubban Goday iyaw xoono immis.

14 Hessada oothidi, Dawiti Isra7eele ubbaa bolla kawotidi ba asa ubbaa xillotethaninne suure pirdan aysis. 15 Xaruya na7ay Iyo7aabi toora mocona; Ahiluda na7ay Iyosaafexi taarike xaafe. 16 Ahixuuba na7ay Saadoqinne Abyataara na7ay Abimelekey kahine; Sarayi waanna xaafe. 17 Yoodahe na7ay Banayi Dawita naagiya asaa halaqa; Dawita adde nayti iya kawotethan dhoqa bessa oykida halaqata.