1 Hessafe guye, Dawiti, “Godaa Xoossaa keethaynne Isra7eele asay xuussa yarsho bessay haysan gidana” yaagis.

2 Dawiti Isra7eele biittan de7iya bete asata shiishana mela kiittis. Xoossa keetha keexanaw shuchu masseysati massidi loythana mela enta giddofe dooris. 3 Dawiti, dirsa pengiya giigisanaw misimaarenne maxaafe qoxanaw daro biratanne zawi bayna naase birata giigisis. 4 Sidoonanne Xiroosa asati Dawitas ziga ehiya gisho Dawiti, tayboy bayna ziga giigisis. 5 Dawiti, “Ta na7ay Solomoney yooganne eratethan loohibeenna. Godaas keexetiya keethay biitta ubban eretidanne bonchetida lo77o keethe gidanaw bessees. Hessa gisho, iyaw koshshiyaba taani giigisana” yaagis. Dawiti hayqanaape sinthe darobaa giigisidi wothis.

6 Hessafe guye, Dawiti ba na7aa Solomone xeegidi, Godaas Isra7eele Xoossaas keethe keexana mela kiittis. 7 Dawiti Solomoneko, “Ta na7aw, taani Godaa ta Xoossaa sunthaas keethi keexanaw ta wozanan qopas. 8 Gidoshin, Godaa qaalay, ‘Neeni daro suuthi gussadasa; daro ola oletadasa. Neeni ha sa7aa bolla ta sinthan daro suuthi gussida gisho ta sunthaas keethe keexaka. 9 Gidoshin, saronne shempo gidida na7i yeletana; Iya yuushuwan de7iya morketape taani iya shempisana. Iya sunthay Solomone; taani iya kawotetha laythan Isra7eele asaas sarotethinne wopa immana. 10 I ta sunthaas keethe keexana. I ta na7a gidana; taani iyaw aawa gidana. Iya araata Isra7eelen merinaw minthada essana’ ” yaagis.

11 “Hiza ta na7aw, Goday neera gido. Godaa ne Xoossaa keetha keexana mela Goday kase odidaysada nena poliso. 12 Goday nena Isra7eele asaa bolla kawo oothiya wode, Godaa ne Xoossaa higgiya naagana mela Goday new cincatethinne akeeka immo. 13 Goday Muse baggara Isra7eele immida wogaanne kiitaa neeni naagiko ubbay new hanana. Minna; yayyofa; dagammofa, ufaysi qanxofa! 14 Taani taw danda7etida mela Godaa keetha keexanaw 3,400 kilo giraame worqa, 34,000 kilo giraame bira, zawi bayna naasenne birata shiishas; hessadaka mithinne shuchu giigisas. Neka ne baggara hessa bolla haraa gujanaw koshshees. 15 Ne matan daro oosanchoti shuchu qoo7eysatinne masseysati, anaaxetinne ubba ooso oothanaw danda7iya hiillanchoti de7oosona. 16 Worqa, bira, naasenne birata oothiya asaas zawi baawa. Hiza neeni oosuwa dooma; Goday neera gido” yaagis.

17 Isra7eele kaaletheysati ubbay ba na7aa Solomone maaddana mela Dawiti haysada yaagidi kiittis; 18 “Goday, hinte Xoossay ha77i gakanaw hintera de7eneyee? I hintena ubba baggara shempisibenneyee? Ha biittan de7iya asaa I ta kushen aathidi immida gisho ha biittay Godaasinne iya asaas haaretis. 19 Hiza Godaa hinte Xoossaa koyanaw hinte wozanaanne hinte shempuwa immite. Godaa sunthaas keexetida keethaa giddon Godaa caaqo Taabotiyanne Xoossaa geeshsha miisheta ehidi wothana mela dendidi Godaa Xoossaa keethaa keexite” yaagis.