1 Dawiti cimida wode ba na7aa Solomone Isra7eele bolla kawothis.

2 Dawiti Isra7eele kaaletheyisata ubbaa, kahinetanne Leeweta issife shiishis. 3 Laythi hastamanne iyape bolla gidida Leeweti taybetidi kumethi 38,000 gididosona. 4 Entafe Godaa keetha aawatethan aysiya 24,000 leeweta kawoy wothis; 6,000 leeweta halaqatanne pirda daynnata oothidi wothis. 5 4,000 leeweta penge naageysata oothidi wothis. Qassi Godaa galatanaw Dawiti giigisida yetha miishen Godaa galatiya 4,000 leeweta wothis.

6 Dawiti Leewe adde nayta Gedisoona, Qahaatanne Maraara enta yaran yaran heedzu cugan shaakis.

7 Gedisoona adde nayti La7idanenne Sam7a. 8 La7idane heedzu adde nayti Yi7eela, Zetaamanne Iyyu7eela. 9 Same7a heedzu adde nayti Salomoota, Hazi7eelanne Harana; haysati La7idane yaraa halaqata. 10 Sama7a oyddu adde nayti Yahaata, Ziiza, Usanne Bar7a. 11 Usi bayraa, Ziizi kaalo. Shin Usasinne Bar7as nayti daronna gisho enti issi yarada taybetidosona.

12 Qahaata oyddu adde nayti Anbaraama, Yisihaara, Kebroonanne Uzi7eela. 13 Anbaraama adde nayti Aaronanne Muse. Aaroninne iya kochay ubbaafe geeshshi gidana mela dummatidosona. Enti Godaa sinthan ixaane cuyisanaw, Godaas oothanawunne Godaa sunthan asaa anjanaw merinaw dummatidosona. 14 Xoossa ase gidida Muse nayta Leewe kochatara gathidi taybidosona. 15 Muse nayti Gedisoona Alaazara. 16 Gedisoona nayta giddofe halaqay Sabu7eela. 17 Alaazara na7ay Rahaaba. Alaazaras hara na7i baawa; shin Rahaabas nayti daro.

18 Yisihaara nayta halaqay Salomita. 19 Kebroona na7ay bayray Yiriya; kaaloy Amaare; heedzanthoy Yahazi7eela; oyddanthoy Yaqim7aama. 20 Uzi7eela bayra na7ay Mikiyaasa; kaaloy Yishiya.

21 Maraara nayti Mahilanne Musa. Mahila nayti Alaazaranne Qiisa. 22 Alaazari macca na7ape attishin, adde na7a yelonna hayqis. Hessa gisho, enta aawa ishaa Qiisa nayti enta machidosona. 23 Musa heedzu nayti Mahila, Ederanne Yiremoota.

24 Leewe yeletan banta kochaaninne soo asan banta sunthan mazgabetida Leewe kochati haysata. Laythi laatamanne iyape bolla gidida Leewe kochati ubbay Godaa Xoossaa keethan oothidosona. 25 Dawiti, “Goday, Isra7eele Xoossay ba asaa shempisis. Goday Yerusalaamen merinaw daana. 26 Leeweti Dunkaaniyanne iya giddon go7etiya miisheta hizape guye tookanaw bessenna” yaagis. 27 Dawita wursetha kiitan, laythi laatamanne iyape bolla gidida Leeweti taybetidosona. 28 Enti Godaa Xoossa keethan oothiya Aarona kochata maaddoosona. Godaa Xoossa keethan kareranne soora oothosona; geeshsha miishe ubbaa tunonna mela naagoosona. 29 Enti Xoossa sinthan wothiya uythaa, katha yarshos shiishiya dhiilliya, irshoy bayna uythaanne zaytera munuqetiya dhiilliya aawatethan aysoosona; Xoossa keethan maketiyabanne likeyabaa ubbaa aawatethan xeelloosona. 30 Qassi enti ubba gallas wontanne omarsi Godaa galatanawunne sabbanaw eqoosona. 31 Sambaata gallas, ageena xeeron, wogay kiittiya hara ba7aale gallasay gakiya wode Godaas xuussa yarsho yarshoosona. Entaw imetida taybuwadanne kiitaada ubba wode Godaa sinthan oothosona. 32 Dunkaaniyanne Godaa Xoossa keetha naagana melanne banta isha gidida, Aarona adde nayta, maaddana mela aawatethi Leewetas imetis.