2
1 Ta ishato, taani koyro Xoossa qaala hintew odashe yida wode, doona bilatethaninne cincatethan yabiike. 2 Taani hintera de7iya wode masqaliya bolla kaqetida Yesuus Kiristoosape attishin, haraba eranaw koyke gada qofa qachas. 3 Ta hintera de7iya wode daaburan, yashshaninne daro kokorsan de7as.Hawa 18:9. 4 Ta kiitaynne ta timirtey doona bilatethaninne cincatethan gidonashin, Geeshsha Ayyaana wolqa qoncisethaana. 5 Hessika, hinte ammanoy Xoossaa wolqaanape attishin, asa cincatethan zemponna melasa.
Xoossa Cincatethi
6 Ayyaana de7on diccidaysatas nuuni cincatetha qaalan odoos. Shin he cincatethay, ha sa7a cincatethi woyko dhayanaw de7iya ha sa7a haareyisata cincatethi gidenna. 7 Shin nuuni odiya cincetethay, daro wodepe sinthe Xoossay nu bonchuwas giigisidaysanne geemmidi de7iya xuura cincatethi. 8 Ha sa7aa haareysatape oonika ha cincatetha eribookona. Enti eridaba gidiyako, boncho Godaa masqaliya bolla kaqokona. 9 Shin Geeshsha Maxaafan,
“Ayfey be7iboonaba,
haythi si7iboonaba,
wozani qopiboonnaba,
Xoossay bana doseysatas giigisis” yaagees.Isa 64:4.
10 Xoossay ba xuura ba Ayyaana baggara nuus qoncisis. Geeshsha Ayyaanay hari attoshin, geemmida Xoossa xuura ubba pilgees. 11 Asan de7iya asa ayyaanape attishin, asaba oonika erenna. Hessadaka, Xoossaba, Xoossa Ayyaanape attishin, oonika erenna. 12 Xoossay nuus coo immidaba nu erana mela Xoossa Ayyaana ekidaape attishin, ha sa7a ayyaana ekibooko.
13 Nuuni ayyaanaba, ayyaana asatas asa cincatethan gidonashin, Xoossa Ayyaanay immiya cincatethan tamaarsoos. 14 Geeshsha Ayyaani bayna asi Xoossa Ayyaana imotata ekenna. Hessi iyaw eeyatethi; ubbay Geeshsha Ayyaanan pilgetiya gisho, I eranaw danda7enna. 15 Geeshsha Ayyaani de7iya asi ubbaba pilgees, shin iya oonika pilgenna. 16 Geeshsha Maxaafan,
“Godaa wozana erey oonee?
Iya zoranaw danda7ey oonee?”
geetetidi xaafetidaysa mela. Shin nuus Kiristoosa wozani de7ees.Isa 40:13.