3
Woosa Keethan De7iya Shaaketethi
1 Ta ishato, hinte Kiristoosan buroo yooganne ammanonna asatho de7iya gisho, taani ayyaanaba hintew odanaw danda7abike. 2 Hinte mino kathi maanaw danda7iboona gisho, taani hintena maathi paahas; ha77ika danda7ibeeketa.Ibra 5:12-13. 3 Ha77ika hinte ammanonna asada de7eeta. Hinte giddon de7iya qanaateynne ooshshi hinte ammanonna asada de7eysa erisennee? Hinte ammanonna asada haneeta. 4 Hintefe issoy, “Taani Phawuloosasa” haray qassi, “Taani Aphiloosasa” giiko, ammanonna asa mela gideketii?2 Qoro 1:12.
5 Yaatin, Aphiloosi oonee? Phawuloosi oonee? Nuuni hintena ammanthida Xoossaa oosanchota. Xoossay issuwas issuwas immida imota mela oothiya oosanchota gidokonaayee? 6 Taani tokas; Aphiloosi haathe ushshis, shin dichey Xoosse.Hawa 18:4-11, 24-28. 7 Hessa gisho, dichiya Xoossafe attishin, tokeyka haathe ushsheyka aykoka gidenna. 8 Tokeynne haathe ushshey woli mela, shin issoy issoy ba oosuwa mela Xoossay immiya woytuwa ekana. 9 Nuuni issife Xoossas oothiya iya oosanchota gidiya gisho, hinte Xoossa shooqa; Xoossa keethi. 10 Xoossay taw immida aadho keehatetha mela hiillancho anaaxeda baaso yeggas. Hara asi iya bolla keexees. Shin iya bolla keexiya oonika waatidi keexiyako, baw naageto. 11 Issi toho yegetida baasope hara baaso yegganaw oonika danda7enna. He baasoyka Yesuus Kiristoosa. 12 Shin ha baasuwa bolla oonika worqan woyko biran gidin, al7o shuchan woyko mithan gidin, maatan woyko maqan keexiko, 13 issi issi asi he baasuwa bolla aybin keexidako pirda gallas taman paacetidi qoncana. 14 Oonika he baasuwa bolla keexida keethay taman xuugetonna attiko, ba woytuwa ekana. 15 Shin oodde oosoyka taman xuugetiko, he uraas woytoy baawa. Gidoshin, I ba huuphen tamape kessi ekida asada attana.
16 Hinte Xoossa keethi gideysanne Xoossa Ayyaani hintenan de7eysa ereketii? 17 Oonika Xoossaa keethi laalliko, Xoossi iya laallana. Xoossa keethi geeshshi; he keethayka hintena.
18 Oonika bana cimmofo. Ha sa7aa cincatethan bana cinca oothidi ekiya oonika Xoossaa sinthan cinca gidanaw eeya gido. 19 Ha sa7a cincatethay Xoossa sinthan eeyatethi. Geeshsha Maxaafan,
“Xoossay cincata enta gene qofan oykees” yaagees.Iyyo 5:13.
20 Qassi, “Cincata qofay maaddonnaba gideysa Goday erees” yaagees.Maz 94:11.
21 Hessa gisho, ubbay hintebaa gidiya gisho, oonika asan ceeqetofo. 22 Phawuloosi, Aphiloosinne Phexroosi, ha alamey, de7oy, hayqoy, ha77i de7ey, sinthafe yaanaysi, ubbay hintesa. 23 Hinte Kiristoosassa; Kiristoosi Xoossasa.