1 Taani yeda de7iya asi gidikina? Ta hawaare gidikina? Taani nu Godaa Yesuus Kiristoosa be7abikina? Hinte Godan ta daabura ayfe gideketii? 2 Hinte Godaaba gidiya gisho, ta haratas hawaare gidonna ixikoka, hintew hawaare gideysas hinte marka.

3 Tana hawaare gidenna geysatas taani immiya zaaroy haysa. 4 Nu hintefe maanawunne uyanaw tuma nuus maati baawee? 5 Hanko hawaaretada, Godaa ishatadanne Phexroosada, ammaniya nu macheta ekidi hemetanaw nuus maati baawee? 6 Woyko oothidi aqanaw bessey taaranne Barnabaasa xalaalee? 7 Ba miishen wotaadaretathi oothey oonee? Woyko woyne tokidi, iyape ayfe moonnay oonee? Woyko wude heemmishe, he wudiyape maathi uyonnay oonee?

8 Taani hessa asa qofatho gaynayee? Muse higgey hessa geeneyee? 9 Muse Higgiyan, “Wuduman kathi yedhiya boora doona qachofa” geetetidi xaafetis. Yaatin Xoossay hessa booras qopidi odidee?Zaare 25:4; 1 Ximo 5:18. 10 Xoossay hessa giday nuus qopidi gidennee? Ee, nu gishosa. Biitta goyeysinne katha geeshsheysi bana gakeysa ekana gidi ufaysan oothanaw bessees geetetidi tuma nu gisho xaafetis. 11 Nuuni hinte giddon ayyaana zerethi zerida gidiko, ashos koshshiyaba nu hintefe ekiko, hessi gitabayee?Roome 15:27. 12 Harati hessa hintefe ekanaw entaw maati de7iko, nuus entafe aadhiya maati deennee?

Shin nuuni Kiristoosa wongelas dhube gidonna mela, ubbaba gencosipe attishin, he maatan go7etibooko. 13 Xoossa keethan oothiya asati banta katha xoossa keethafe ekeysa ereketii? Qassi yarsho bessan oothiya asati yarshuwafe ekeysa ereketii?Zaare 25:4; 1 Ximo 5:18. 14 Hessadaka, wongela markateysati duussas koshshiyaba wongelape ekana mela Goday kiittis.Maato 10:10; Luqa 10:7.

15 Shin taani ha maata ubban aykoka go7etabike. Taani hessa xaafiday ta maata bonchisanaw koyada gidenna. Oonika ta ceequwa hada oothanaape hayqoy taw lo77o. 16 Taani wongela odey kiitetida gishosafe attishin, tana ceeqisiyaba gidenna. Wongela odonna ixiko, tana ayye! 17 Taani wongela dosada odiko, taw woytoy de7ees. Shin taani wongela dosonna odiyaba gidiko, hessa Xoossi taw hadara immis. 18 Yaatin, ta woytoy aybee? Taani wongela odiya wode ta maatan go7etonna, wongela gatey bayna odeysi taw woyto.

19 Taani oodeska aylle gidike, shin darota maaddanaw ubbaas aylle gidas. 20 Taani Ayhudeta maaddanaw entara enta gidas. Ta huuphen higgefe garsan de7ike, shin higgefe garsan de7eyisata maaddanaw higgefe garsan de7iya asi gidas. 21 Xoossa higgiyafe kare keyonna, Kiristoosa higgiyas kiitetashe, higgey baynayisata maaddanaw higgey bayna asada hanas. 22 Taani daaburanchota maaddanaw daaburancho gidas. Taani issota issota maaddanaw ubbaara ubbaba hanas. 23 Taani wongela anjuwa shaaketanaw, wongela gisho, ha ubbaa hanas.

24 Wothan gaaddetiya ubbay woxees, shin issuwa xalaali woyto ekeysa ereketii? Hessada hinteka woyto ekanaw woxite. 25 Gaaddetiya asa ubbay ubbaban bantana haarees. Enti hessa daaburey dhayiya woyto ekanaasa. Shin nuuni daaburey merina woyto ekanaasa. 26 Hessa gisho, taani qofi bayna asada woxike. Carko yimpiya asada coo kushe yeddike. 27 Shin taani haratas wongela odidaape guye, taani ta huuphen yegetida asi gidonna mela ta asatethaa wolqan haarada taw kiitetana mela oothayis.