1 Siiqo kaallite. Ayyaana imotata minthidi koyite; ubbaafe aathidi, tinbite imota minthidi koyite. 2 Dumma dumma doonan odetiya asi Xoossaas odeesipe attishin, asas odenna. Shin asas qonciboonna xuuraa Ayyaana wolqan odetiya gisho, oonika I odeteysa akeekenna. 3 Shin tinbite odeysati ase dichanaw, minthethanawunne minthanaw asas odees. 4 Dumma dumma doonan odiya asi bana dichees. Shin tinbite odiya asi woosa keethaa dichees.

5 Hinte ubbay dumma dumma doonan odetiyako ta dosayis, shin tinbite odanaysa aathada dosayis. Dumma dumma doonan odeteysa woosa keethi dichanaw birshiya asi dhayiko, dumma dumma doona odeteysafe tinbite odeysi aadhees.

6 Shin ta ishato, taani hinteko bada, qoncethan woyko eratethan woyko tinbite odon woyko timirten gidonashin, dumma dumma doonan odetiko hintena ay maaddanee? 7 Dumma dumma yetha miishetas issi qommo girsi de7iko, suusul7e girsinne diitha girsi waatidi shaaki eranee? 8 Qassi moyze punoy geeyidi eretonna ixiko olas giigetey oonee? 9 Hessadaka, dumma dumma doonan hinte odeteysi qonce gidonna ixiko hinte odeysa ooni eranee? Hessi carkos odiya mela.

10 Ha alamiyan daro doonati de7oosona; he ubbaas birshethi de7ees. 11 Shin issi asi odetiya doona taani eronna ixiko I taw imathe gidees; taka iyaw imathe gidayis. 12 Hessadaka, Geeshsha Ayyaana imota hinte ekanaw minthidi koyko, woosa keethi dichanaw ubbaafe aadhiya imota koyite.

13 Dumma dumma doonan odetiya asi ba odaa birshanaw birshetha imotay imetana mela Xoossaa woosso. 14 Taani dumma dumma doonan Xoossaa woossiko, ta ayyaanay woossees, shin ta wozanay aykoka go7etenna. 15 Yaatin, ta ay oothanaw koshshii? Taani ta ayyaanan woossayis; ta wozananka woossayis. Taani ta ayyaanan yexayis; ta wozananka yexayis. 16 Hessa gidonna ixiko neeni ne ayyaanan Xoossaa galatiya wode he bessan neeni geysa eronna asi ne galateysa woygidi, “Amin7i” gaanee? 17 Neeni Xoossaa galateysi lo77o, shin hara asi maaddenna.

18 Ta hinte ubbaafe aathada dumma dumma doonan odetiya gisho Xoossaa galatayis. 19 Shin taani woosa keethan harata tamaarsanaw dumma dumma doonan tammu mukulu qaala odetanaape ichashu qaala eretiya doonan odetanaw dosayis.

20 Ta ishato, hinte qofan naytada hanopite. Hinte iitabas naytada hanitepe attishin, hinte qofan kahaamata gidite. 21 Goday, Geeshsha Maxaafan,

22 Hiza, dumma dumma doonan haasayoy, ammanonna asaas malla gideesipe attishin, ammaniya asaasa gidenna. Tinbitey ammaniya asaas malla gideesipe attishin, ammanonna asaasa gidenna.

23 Woosa keethaa asay issife shiiqiya wode, ubbay dumma dumma doonan odetiko eronna woyko ammanonna asay hinte shiiquwa yidi, “Haysati gooyosona” gookonayee? 24 Shin eronna woyko ammanonna asay woosa keethi yaa wode asay tinbite odishin, si7iko ba nagaraa akeekana; qassi I si7ida qaalan pirdetana. 25 Enti iya wozanan geemmida qofaa qoncisana. Hessadaka, “Tuma Xoossay hinte giddon de7ees” yaagidi markatidi, gufannidi Xoossaas goyinnana.

26 Ta ishato, nu woygino? Hinte issife shiiqiya wode issuwas mazmurey de7ees; issuwas tamaarso imoti de7ees; issuwas qoncethi de7ees; issuwas dumma dumma doonan haasayoy de7ees; issuwas birshetha imoti de7ees. He ubbay woosa keethi dichiyaba gidanaw bessees. 27 Dumma dumma doonan odetiya asati de7iko, nam7a woyko dariko heedza gididi maaran maaran odetanaw bessees. Enti odeteysa hara asi birsho. 28 Shin birshiya asi dhayiko, dumma dumma doonan odeteysi woosa keethan si77i go. Bawunne ba Xoossaas odo.

29 Tinbite odeysati nam7a woyko heedza gididi odo. Qassi harati enti giyaba pirdona. 30 He shiiquwan de7iya hara asas issibay qonciko kase odeteysi si77i go. 31 Ubbay tamaarana melanne ubbay minnana mela maaran maaran tinbite odanaw danda7eeta. 32 Nabeta ayyaanay nabetas kiitetees. 33 Geeshshata woosa keetha ubbay meezetidaysada Xoossay sarotetha Xoossaafe attishin, buqethi medhiya Xoossi gidenna.

34 Maccasi woosa keethan si77i go. Muse higgey geysada enti haaretofe attishin, woosa keethan odanaw entaw maati baawa. 35 Maccasi woosa keethan haasayoy borso gidiya gisho issiba eranaw koyko son banta azinata oychonna.

36 Xoossaa qaala koyro hinte ehidetii? Woyko Xoossaa qaalay hinte xalaalako yidee? 37 Oonika bana nabe woyko bana Xoossaa asi gidi qopiko, taani hintew xaafeysi Godaa kiitta gideysa akeeko. 38 Shin oonika akeekona ixiko ika akeeketofo.

39 Hessa gisho, ta ishato, tinbite odanaw minthidi amotite; qassi dumma dumma doonan odeteysaka diggofite. 40 Shin ubbayka woganinne maaran gido.