1 Ta siiqo ishato, ayyaanata ubbaa ammanopite, shin enti Xoossafe yidaako paacidi be7ite. Ayis giiko, daro wordo nabeti alamen dendidosona. 2 Xoossaa Ayyaana gideysa hinte haysan erana; “Yesuus Kiristoosi ase gididi yidaysa markatayis” giya ayyaana ubbay Xoossafe yees. 3 Kiristoosi ase gididi yidaysa ammanayis goonna ayyaana ubbay Xoossaafe gidenna. Hessi Kiristoosa ixiya ayyaana. Hinte he ayyaanay yaanaysa kase si7ideta; I hari attoshin ha77ika alamen de7ees.

4 Ta nayto, hinte Xoossasa. Hinte giddon de7iya Geeshsha Ayyaanay alamen de7iya ayyaanape daro wolqaama gidiya gisho wordancho nabeta hinte xoonideta. 5 Enti ha alamiya ase gidiya gisho, ha alamiyaba odoosona; ha alamiya asay enta odaa si7oosona. 6 Nuuni Xoossaafe yeletida; Xoossaa eriya oonika nuna si7ees. Xoossaa eronna oonika nuna si7enna. Nuuni tuma ayyaananne wordo ayyaana hessan shaakos.

7 Ta siiqo ishato, siiqoy Xoossafe yaa gisho, ane issoy issuwara siiqetoos. Siiqiya oonika Xoossaa na7a; I Xoossaa erees. 8 Xoossay siiqo gidiya gisho siiqonna oonika Xoossaa erenna. 9 Nuuni Kiristoosa baggara de7uwa demmana mela Xoossay ba issi Na7aa ha alamiya kiittis. Xoossay nuna ba siiquwa hessan bessis. 10 Tuma siiqo guussay haysa: nuuni Xoossaa siiqida gisho gidonashin, Xoossay nuna siiqida gishonne nu nagaraape nuna maaranaw ba Na7aa kiitida gishosa.

11 Ta siiqo ishato, Xoossay nuna haysada siiqiko, nuka issoy issuwa siiqanaw bessees. 12 Xoossaa be7iday oonika baawa. Nuuni issoy issuwa siiqiko Xoossay nunan de7ees; iya siiqoyka nunan polo gidees.Yoha 1:18.

13 Xoossay ba Geeshsha Ayyaana nuus immida gisho, nuuni Xoossan de7eysanne ika nunan de7eysa eroos. 14 Aaway ba Na7aa, ha alamiya ashsheysa gidana mela kiittidaysa nuuni be7idi markatoos. 15 Yesuusi Xoossaa Na7aa gideysa markatiya oodenka Xoossay de7ees; ika Xoossan de7ees. 16 Xoossay nuna siiqeysa nuuni eroosinne ammanoos.

Xoossay siiqo. Siiqon de7iya oonika Xoossan de7ees; Xoossayka iyan de7ees. 17 Nu de7oy ha alamiyan Kiristoosi de7idaysa mela gidiya gisho, pirda gallas yayyonna iya sinthe shiiqanaw iya siiqoy nunan polo gidees. 18 Siiqon yashshi baawa, tuma siiqoy yashshi kessi holees. Yashshinne pirdi issife biya gisho, yayiya uraa siiqoy polo gidenna.

19 Xoossay koyro nuna siiqida gisho nu siiqoos. 20 Oonika, “Xoossaa siiqayis” gishe ba ishaa ixiko, I wordancho. Ayis giiko, be7iya ba ishaa siiqonna oonika be7iboona Xoossaa siiqanaw waanidi danda7ii? 21 Kiristoosi nuus immida kiitay haysa; “Xoossaa siiqiya oonika ba ishaa siiqanaw bessees” yaageysa.