5
Alamiya Xoono
1 Yesuusa, I Kiristoosa yaagidi, ammaniya oonika Xoossaa na7a. Aawa siiqiya oonika iya Na7aaka siiqees. 2 Nuuni Xoossaa siiqiya gishonne iya kiitaa naagiya gisho Xoossaa nayta siiqeysa eroos. 3 Nuuni Xoossaa siiqiko, iya kiitata naagoos. Iya kiitati deexo gidokona.Yoha 14:15. 4 Ayis giiko, Xoossaa na7a gidiya oonika ha alamiya xoonanaw danda7ees. Nuuni ha alamiya xoonanay nu ammanuwana. 5 Alamiya xoonanaw danda7ey oonee? Yesuusi Xoossaa Na7aa gideysa ammaniya asa xalaali xoonana.
Kiristoosi Oonee?
6 Yesuus Kiristoosi haatha xinqatiyaranne ba hayquwan gusida suuthara yis. I, haatharanne suuthara yisipe attishin, haatha xalaalara yibeenna. Geeshsha Ayyaanay tuma gidiya gisho, hessi tuma gideysa markatees. 7 Heedzu markati de7oosona. 8 Hessati, Geeshsha Ayyaana, haathaanne suuthaa. Ha heedzata markatethay issino. 9 Nu asay markateysa ammanoos. Shin Xoossaa markatethay asaysafe daro aadhees. Xoossay ba Na7aas markatida markatethay haysa. 10 Xoossaa Na7aa ammaniya uraa wozanan ha markatethay de7ees. Xoossaa ammanonna oonika Xoossay ba Na7aas markatida markatethaa ammanibona gisho, Xoossaa wordancho oothees.
11 Hiza, markatethay haysa; Xoossay nuus merinaa de7o immis; he de7oyka iya Na7an de7ees yaageysa.Yoha 3:36. 12 Xoossaa Na7ay de7iya oodeska de7oy de7ees. Xoossaa Na7ay bayna oodeska de7oy baawa.
Merina De7o
13 Xoossaa Na7an ammaniya hintew merinaa de7oy de7eysa hinte erana mela haysa hintew xaafas. 14 Xoossaa sheniyada aybibaaka iya woossiko, I si7eysa nuuni eriya gisho iyan ammanetoos. 15 Nuuni woossiya ubbaa I si7eysa eriko, nuuni woossiyaba I immanaysa eroos.
16 Oonika ba ishay hayqo bessonna nagara oothishin be7iko, Xoossaa iyaw woossanaw bessees. Hayqo bessonna nagara oothidaysatas Xoossay de7o immana. Hayqo bessiya nagari de7ees. Taani hintena hessas Xoossaa woossite giike. 17 Iita ooso ubbay nagara, shin hayqo bessonna nagari de7ees.
18 Xoossaa Na7ay iya naagiya gisho, Xoossaa na7a gidida oonika nagaran ubba wode de7onnaysa nuuni eroos. Xalahey iya qohanaw danda7enna. 19 Nuuni Xoossasa gideysanne ha kumetha alamey Xalahen haareteysa eroos.
20 Nuuni tuma Xoossaa eranaada Xoossaa Na7ay yidaysanne nuus akeeka immidaysa eroos. Nuuni iya na7a, Yesuus Kiristoosa baggara tuma Xoossan de7oos. Yesuusi tuma Xoossaanne merinaa de7uwa.
21 Ta nayto, eeqatape hinte haakite.