1 Xiroosa kawoy Kiraami Dawitara sigan gam7ida gisho, Solomoney ba aawa Dawita bessan kawotanaw tiyetidaysa si7idi, ase Solomoneko kiittis. 2 Solomoney zaaridi, 3 “Goday iya morketa iya tohuwape garsan haarisana gakanaw, ta aawa Dawita bolla dendida olaa gaason, Godaa ba Xoossaa sunthaas Xoossa keethi keexiboonnaysa ne eraasa. 4 Shin ha77i Goday ta Xoossay taw shempo immis; taw ayba morkey woyko iitabaa oothey baawa. 5 Goday ta aawa Dawitas, ‘Taani ne bessan, ne araatan kawothiya ne na7ay ta sunthaas keethe keexana’ gidaysada taani Godaa ta Xoossa sunthaas keethi keexanaw halchas. 6 Hessa gisho, Libaanosepe ziga massiya asata yedda; ta asati ne asatara oothana. Ne asatas ne qanxa gidaba ta qanxana. Sidoona asatada mithaa masetha hiilla nu asay eronnaysa ne eraasa” yaagis.

7 Kiraami Solomone kiitaa si7idi daro ufaytis; “Ha gita kawotethaa haarana mela Dawitas ha cinca na7aa immida Goday galatetto” yaagis.

8 Hessafe guye Kiraami Solomoneko haysada yaagidi kiittis; “Ne kiitida kiitay tana gakis. Neeni koydaba taani oothana; ziganne xiidda ta new shiishana. 9 Ta asay duruma ciinetha Libaanosepe abbaako gaazana. Taani qashisada, abba bollara tooketidi ne koyiya bessi gathanaada oothana; yan enti birshidi ne asaas immana. Hessafe guye, neeni ne baggara ta kawo keethan de7iya asaas miyaba kiittada ta amuwa polana” yaagis.

10 Hessada oothidi Kiraami Solomoney koyida keena ziganne Xiidda immis. 11 Solomoney kawo keethan de7iya asay maana mela 20,000 kuntaale gistenne 400,000 litiro shamaho zayte laythan laythan paconna Kiraamas immis. 12 Goday Solomones immana gidaysada, iyaw cincatethi immis. Kiraaminne Solomoney banta giddon saro de7idosona; enti nam7ay banta giddon caaqidosona.

13 Kawoy Solomoney Isra7eele 30,000 madda ootheyisata dooridi kessis. 14 Adonraama geetetiya addiya enta bolla halaqa oothidi shuumis. He oosanchota tammu tammu mukulan shaakidi, heedzu cuga kessis; issi issi cugay taran taran bidi, issi ageena Libaanosen oothanaadanne nam7u ageena banta son daanada oothis. 15 Solomones tooho tookiya 70,000 asatinne shuchu qoo7iya 80,000 asati gezze biittan de7oosona. 16 Enta bolla halaqa gididi oosisiya 3,300 asata shuumis. 17 Kawa Solomone kiitan, Xoossa keethaa baasuwas gidana mela gita shuchata qoo7idi giigisidosona. 18 Solomone asaynne Kiraama asay kushe hiilla ereysati, Gebaala asaara gididi, Xoossa keethaa keexanaw mithi qanxidi, shuchaa qoo7idinne massidi giigisidosona.