1 Isra7eele asay Gibxe biittafe keyida 480 laythan, Solomoney Isra7eele bolla kawotida oyddantho laythan, Ziifa geetetiya nam7antho ageenan, Solomoney Godaa Xoossaa keethi keexanaw doomis. 2 Solomoney keexida Xoossa keethay adussatethay usupun tammu wadha; gompay laatamu wadha; geesay hastamu wadha. 3 Xoossa keethi geliya bessan de7iya barandaa gompay Xoossaa keethaa gompaa mela laatamu wadha; keetha adussatethay Xoossa keetha geliya bessa gakanaw tammu wadha. 4 Xoossa keethaas soo baggara dalga, kare baggara xuuntha maskooteti de7oosona. 5 Xoossa keethaa matan, Geeshsha Bessaanne Ubbaafa Geeshsha Bessaa yuushuwan hara pooqe keexis; he yuushuwan kifileta keexis. 6 Koyro pooqiya gompay ichashu wadha; nam7antho pooqiya gompay usupun wadha; heedzantho pooqiya gompay laapun wadha. Issi issi pooqiya goday garsa baggara de7iya godaape lee7o. Geeshsha bessaa kanthidi gelonna mela xoossa keethaa godaas kare baggara teqe wothis.

7 Xoossa keethay shucha qoo7iya bessan masetida shucha xalaalan gimbetis; Xoossa keethay gimbetiya wode naariqa, kalta, woyko hara ay birata girsi Xoossa keethan si7etibeenna.

8 Garsara de7iya pooqiya geliya pengey Xoossa keethaafe dugeha baggara de7ees; he bessaafe nam7antho pooqiyanne heedzantho pooqiya baanaw yedhidi keyiya dethati de7oosona. 9 Hessada oothidi, Solomoney keetha keexidi wursis; kornisiya masetida ziga mithan kammis. 10 Xoossa keetha yuushuwan pooqeta keexidi ongis; enta issuwa issuwa geesay ichashu wadha gididi, godaara ziga mithan oyketis.

11 Goday Solomoneko, 12 “Ha neeni keexiya Xoossa keethan, neeni ta awaajuwa kaalliko, ta wogaa oothiko, ta kiita naagikonne ta kiitaa kiitetiko, taani ne aawa Dawitas immida ufaysa qaala ne baggara polana. 13 Taani Isra7eele asaa giddon daana; taani ta asaa Isra7eele aggike” yaagis. 14 Solomoney Xoossa keetha keexidi ongis.

15 Xoossaa keetha gaatha bagga godaa, wuygepe bidi kaara gakanaw masetida ziga mithan kammis; wuygiyan masetida xiidda mithi hiixis. 16 Xoossa keetha giddon Ubbaafe Geeshsha Bessaa medhanaw guye baggara laatamu wadha gidiya besse shaakidi, wuygepe kaara gakanaw masetida ziga godaa essis. 17 He Ubbaafe Geeshsha Bessaafe sintha baggara de7iya wuygiya adussatethay oytamu wadha. 18 Xoossa keetha soo baggay gosenne ciishsha misiliya medhida masetida ziga mithan kametis; ubbay zigape oosetis; ay shuchika bentenna.

19 Solomoney Godaa caaqo taabotiya wothanaw Xoossa keetha giddon Ubbaafe Geeshsha Bessaa giigisis. 20 Ubbaafe Geeshsha bessay laatamu wadha adusse, laatamu wadha dalganne laatamu wadha dhoqa. Solomoney he Ubbaafe Geshsha bessaa gaatha baggaa walahi bayna worqen lanxis; yarsho bessay masetida ziga mithan kametis. 21 Solomoney Xoossa keetha gidduwa walahi bayna worqen lanxis; worqan lanxetida qol7a geliya pengiya bolla yaanne haanne gakiya worqa santhalaata tolidi alleeqisis. 22 Keetha giddo baggaa worqan lanxis; Ubbaafe Geeshsha Bessaa sinthan de7iya yarsho bessa worqan lanxis.

23 Ubbaafe Geeshsha bessan wothanaw issoy issoy tammu wadha aduqiya shamahope oosetida nam7u kiruube misileta massidi giigisis. 24 Koyro kiruubiya qefey, issoy ichashu wadha; nam7anthoy ichashu wadha; koyro qefiya xeerape bidi nam7antho qefiya xeera gakanaw tammu wadha. 25 Nam7antho kiruubey tammu wadha; nam7u kiruubeta hanotaynne medhoy issi mela. 26 Issi kiruubiya geesay tammu wadha; nam7antho kiruubiya geesay hessa mela. 27 Solomoney Xoossa keethan de7iya Ubbaafe Geeshsha bessan kiruubeta wothis. Enta qefey micetidi uttis; issi kiruubiya qefey issi bagga godaa bochiya wode, hanko kiruubiya qefey hanko bagga godaa bochees; enta nam7aa qefey soo giddon issoy issuwa bochoosona. 28 Solomoney kiruubeta worqan lanxis.

29 Qol7anne wuyge godaa ubbaa kiruubeta, zambanne ciishsha misilen alleeqisis. 30 Xoossa keetha giddo kifiliya wuygiya kare bagga kifiliya wuygiya worqan lanxis.

31 Ubbaafe Geeshsha bessa geliya pengiyan shamaho mithafe sanqa giigisis. Penge gobanetas ichashu baggara maazaney de7ees. 32 Shamaho mithafe oosetida nam7u sanqata bolla kiruubeta, zambanne ciishsha misile giigisidi sanqata, kiruubetanne zamba worqan lanxis. 33 Hessadaka, Xoossa keethaa geliya pengiya shamahope oosetida oyddu maazanera de7iya sanqa giigisis. 34 I he pengiya issi issi sanqay giddon dakotidi dooyetiya nam7u sanqata kessis. 35 Kiruubeta, zambanne ciishsha misileta enta bolla wothis; enta bolla worqa issi gina oothidi lanxis.

36 Soo baggara de7iya dabaaba gimbis; he gimbiya bolla masetida heedzu shuchu, issuwa issuwa bolla wothidi, issi masetida ziga enta bolla wothidi gimbis.

37 Xoossaa keethaa baasoy Solomoney kawotida oyddantho laythan, Ziifa geetetiya nam7antho ageenan baasetis. 38 Solomoney kawotida tammanne issintho laythan, Bula geetetiya hospuntho ageenan Xoossa keethay halchidaysa mela keexetidi wuris. Solomoney Xoossa keethaa laapun laythan keexidi wursis.