Phexroosi Xaafida
Koyro Kiita
Gaatha Qofa
Hawaariya Phexroosi xaafida koyro kiitay, “Dooretida Xoossa Asata” geetetidi xeegetidaysatasinne Guutha Iisen pudeha baggan laaletida ammaniya asaasa. Ha kiitay xaafetida gaasoy, ammano gaason metoynne waayey gakida asaa minthethanaasa. Ha maxaafa xaafey, iya hayquwa, iya denduwa, iya nam7antho yuussaa odiya Yesuus Kiristoosa wongela qaala enta akeekisees. Yesuus Kiristoosa de7uwa leemiso oothi xeellidi, meto danda7an kanthana mela enta qofisees. Hessara gathidi, metoy enta ammanuwa paaceysanne Yesuus Kiristoosi qonciya gallas bessiya woyto enti ekanaw de7eysa hassaysees.
Xaafey, enti meto danda7ana mela minthethi simmidi, Kiristoosa kaalliya asati de7eysada enti daana mela qofisees.
Maxaafa Ayfe Qofata
Sarotho (1:1-2)
Xoossay nuus immida atotetha (1:3-12)
Geeshshatethan duussu (1:13—2:17)
Kiristoosa waayiya leemiso (2:18-25)
Meto wode ammaniya asa hanota (3:1—4:19)
Cimatasinne na7atethatas imetida zore (5:1-11)
Moyzo Sarotho (5:12-14)
1
1 Taani, Yesuus Kiristoosa hawaarey Phexroosi; Phanxoosan, Galatiyan, Qaphadooqan, Iiseninne Bitaanen betanchoda laaletidi de7iya Xoossay doorida, asaas ha dabdaabiya xaafas. 2 Yesuus Kiristoosas hinte kiitetana melanne iya suuthan geeyana mela, Xoossaa Aaway ba kase eran dooridaysatasinne Geeshsha Ayyaanan geeyida, hintew aadho keehatethaynne sarotethay gido.
Dhayona Ufaysi
3 Yesuus Kiristoosa hayqope denthidi ba gita maarotethan nam7antho yeletethaanne dhayonna ufaysaa immida nu Godaa Yesuus Kiristoosa Aaway, Xoossay galatetto. 4 Qassi Xoossay hintew dhayonna, iitonnanne buuqonna laata salon giigisis. 5 He laatay wode wursethan qoncanaw de7iya atotethas Xoossaa wolqan ammanon hintew naagetidi de7ees.
6 Ha77i guutha wodes hinte dumma dumma paacen un7etikoka hessan ufaytite. 7 He paacey hintena gakiday, taman yeggin dhayiya worqafe hinte ammanoy aadhonne tuma gideysa bessanaasa. He paacetida ammanuwan Yesuus Kiristoosi qonciya wode galataa, bonchonne saba hinte ekana. 8 Hinte Yesuusa be7ibeeketa, shin iya siiqeta. Hinte ha77i iya be7iboonaba gidikoka, iya ammaneta. Qassi odan qoncisanaw danda7etonna ufaysaninne bonchon kumideta. 9 Hinte ammanon naagiya hinte shempuwa atotetha ekana.
10 Aadho keehatetha baggara hintew giigida ha atotethaaba nabeti eranaw gita koshshaninne naagon koydosona. 11 Entan de7iya Kiristoosa Ayyaanay iya waayabanne hessafe guye, yaana bonchuwaba kasetidi markatishe, awude woyko waanidi hananeeko akeekan pilgidosona. 12 Nabeti odida tinbitey bantaw gidonashin, hintew gideysa Xoossay hintew qoncisis. Ha77i asay hintew odida Wongela salope kiitetida Geeshsha Ayyaana wolqan hintew odidosona. Kiitanchotika hessa be7anaw amotidosona.
Geeshshatethan De7ite
13 Hessa gisho, oosos hintena giigisite; hintena haarite. Yesuus Kiristoosi qonciya wode hinte ekana aadho keehatetha ufaysan naagite. 14 Xoossaa naytada iyaw kiitetite; hinte kase eronna oothida iita amuwa kaallopite. 15 Shin hintena xeegida Xoossay geeshshi gididaysada hinteka hinte duussa ubban geeshshi gidite. 16 Geeshsha Maxaafan, “Taani geeshshi gidida gisho hinteka geeshshi gidite” geetetidi xaafetis.Leewe 11:44-45; 19:2.
17 Asa som7o be7onna iya oosuwada pirdiya Xoossaa, “Nu Aawaw” gidi xeegiyaba gidiko, ha sa7aa imathatetha duussaa yashshan de7ite. 18 Hinte, hinte aawatape laattida pathonna de7uwape wozetidaysi, dhayiya biran woyko worqan gidonnaysa ereeta. 19 Borey woyko borsoy bayna dorsa suuthada al7o gidida Kiristoosa suuthan wozetideta. 20 Xoossay alamey medhetanaape kase Kiristoosa dooris, shin ha wursetha wodiyan Kiristoosi hinte gisho qoncis. 21 Hinte ammanoynne hinte ufaysay Xoossan gidana mela iya hayqope denthidi, bonchida Kiristoosa baggara Xoossan ammaneta.
22 Hinte tumatethaas kiitetidi hintenatethaa geeshshideta. Hinte issoy issuwa wozanape siiqeta, shin ha77ika tuma wozanape minthidi siiqite.
23 Hinte nam7antho yeletiday dhayiya zerethafe gidonashin, merinaw de7iya Xoossaa qaalan dhayonna kochaafe yeletideta. 24 Xoossaa qaalay,
“Asi ubbay maata mela;
iya boncho ubbay ciishsha mela.
Maatay melees, ciishshayka qoletees.Isa 40:6-8.
25 Shin Godaa qaalay merinaw de7ees”
yaagees. Hintew odetida Wongela qaalay haysa.