5
Duretas Imetida Zore
1 Hinteno, dureto, hinte bolla iita metoy yaa gisho yeekitenne zeleelite. 2 Hinte shaloy buuqis; hinte afilayka bilan meetetis.Maato 6:19. 3 Hinte worqaynne hinte biray shi7is. He shi7ay hinte bolla marka gidana. I hinte asatethaa tamada maana. Hinte ha wurida qammatan hintew shalo dagayeeta. 4 Hinte gaden oothi pee7ida asaa une miishiya qanxibeketa. Hessi hinte bolla waassees. He asata waasoy wolqaama Godaa haythan si7etis.Zaare 24:14-15. 5 Ha sa7an hinte ulo xalaalas qopidi, injen de7ideta. Shukas giigetida meheda hintena dhiikideta. 6 Hintera eqetanaw danda7onna xillo asa bolla pirdideta iya wodhideta.
Gencanne Woosa
7 Ta ishato, Goday yaana gakanaw gencite. Goshshanchoy torche iraynne sila iray yaana gakanaw gencidi al7o kathaa naagidi waati gathi ekiyako qopite. 8 He goshshanchuwada hinteka gencite. Godaa yuussay matatida gisho ufaysan naagite.
9 Ta ishato, Xoossay hinte bolla pirdonna mela issoy issuwa bolla zuuzumofite. Pirdeysi pengen eqis. 10 Ta ishato, waayan gencida, Godaa sunthan odida nabeta leemiso oothidi ekite. 11 Danda7an gencidaysata nuuni anjetidaysata goos. Iyyobi waanidi gencidaako hinte si7ideta. Goday wursethan iya waati maaddidaako be7ideta. I maarotinne qadhey kumida Godaa gidiya gisho hessa oothis.Iyyo 1:21-22; 2:10; Maz 103:8.
12 Shin ubbaafe sinthe, ta ishato, saluwan gidin woyko sa7an gidin woyko hara aybinka caaqofite. Xoossaa pirdan hinte gelonnaada hinte oday ee gidiko, “Ee” giite; akay gidiko, “Akay” giite.Maato 5:34-37.
13 Hinte giddon meto ekiya oonika de7iko Xoossaa woosso. Ufaytiya oonika de7iko galatan yexo. 14 Hintefe hargetiya oonika de7iko woosa keetha cimata xeego. Enti Godaa sunthan shamaho zayte tiyidi iyaw Xoossaa woosso.Maato 5:34-37. 15 Ammanon woossida woosay harganchuwa pathana. Goday iya, hargiyafe denthana; I nagara oothidaba gidikoka Goday iya maarana. 16 Hessa gisho, hinte paxana mela hinte nagara issoy issuwas paaxitenne issoy issuwas woossite. Xillo asa woosay wolqaama ooso oothees. 17 Eeliyaasi nu mela ase. Iri sa7an bukonna mela minthidi Xoossaa woossin heedzu laythinne usupun ageena sa7an iri bukibeenna.1 Kawo 17:1; 18:1. 18 Zaaridi I Xoossaa woossin salope iri bukis; sa7ika kathi dolisees.1 Kawo 18:42-45.
19 Ta ishato, hintefe oonika tuma ogiyape buutiko, haray iya tumaako zaariko, 20 nagaranchuwa iya bala ogiyape zaariya oonika, iya shempuwa hayqope ashsheysanne iya daro nagaraas maarota immeysa ero.Leemi 10:12; 1 Phex 4:8.