4
Alamiyara Dabotopite
Ooshshinne oli hinte giddo awupe yii? Enti yey hinte asatethaa haaranaw oletiya hinte asho amuwape gidenneyee? Hinte amotteeta, shin demmeketa; hessa gisho, wodheeta. Minthi koyeeta, shin demmanaw danda7eketa; hessa gisho, ooyeteetanne oleteeta. Hinte Xoossaa woossonna gisho koyaba demmeketa. Hinte woosseta, shin demmeketa. Hinte asho amuwa polanaw wobbe ogen woossiya gisho demmeketa. Hinteno, laymateysato! Ha alamiya dosey Xoossara morke gideysa ereketii? Ha alamiyara dabbotanaw koyey oonika Xoossara morke. Geeshsha Maxaafay, “Xoossay nunan daana mela oothida Ayyaanay, nuuni iyaw buzo gidana mela amottees” gidaysa coo gidaba daanii? Shin Geeshsha Maxaafay, “Xoossay otoranchota ixees, shin bantana ashketas maarotethi immees” giya gisho, Xoossay maarotethi darsidi immees.Leemi 3:34.
Hessa gisho, Xoossaas haaretite; Xalahiyara eqetite; I hintefe haakana. Xoossaako shiiqite; I hinteko shiiqana. Hinteno, nagaranchoto, hinte kushiya meecetite; nam7u qofi de7eysato, hinte wozanaa geeshshite. Kayotite, yeekitenne afuxite. Hinte miichay yeehon, hinte ufaysay azzanon laameto. 10 Godaa sinthan hintenatethaa kawushite; hintena dhoqu dhoqu oothana.
Asa Bolla Pirdofite
11 Ta ishato, issoy issuwa zigiropite. Ba ishaa zigireynne iya bolla pirdey higge zigiresinne higge bolla pirdees. Neeni higge bolla pirdiko higge bolla pirdeysa gidaasape attishin, higge poleysa gidaka. 12 Higge immeynne pirdey Xoossaa xalaala. Ashshanawunne dhaysanaw danda7ey iya. Yaatin, ne asa bolla pirdey neeni oonee?
Ceeqetofite
13 Hinte, “Nuuni hachi woyko wonto ya katamaa woyko ha katamaa baana; yan laythi uttana; zal7idi wodhisana” yaageysato, si7ite.Leemi 27:1. 14 Wonto aybi hananeeko hinte ereketa. Hinte de7oy waananeko erey oonee? Hinte guutha wode bentidi dhayiya aka mela. 15 Hessa aggidi, “Goday giiko nuuni daana; haysa woyko hessa oothana” yaaganaw bessees. 16 Shin hinte ha77i otortetanne ceeqeteta. Hessa mela ceeqo ubbay iita.
17 Hessa gisho, lo77oba oothanaw erishe oothonna uraas hessi nagara.

4:6 Leemi 3:34.

4:13 Leemi 27:1.