1 Ta ishato, hintefe daroti astamaare gidopo. Nu, astamaareti haratape aadhiya pirdaa ekanaysa hinte ereeta. 2 Nu ubbay daroban baletoos. Ba odan baletonna oonika banatetha naaganaw danda7iya polo asi. 3 Parati nuus kiitetana mela bixaala barsidi nuuni koyiya bessi ubbaa efoos. 4 Markabey hessa mela gita gidishe wolqaama carkuwan sugetikoka, enta laaggeysi ba koyiya bessi zaaridi laagiya guutha mithan laagetidi bees. 5 Hessada inxarsi asatethaa giddon guutha gidikoka daro gitaban ceeqetees.

Guutha tami daro gita wora xuuggees. 6 Inxarsi tama mela. Inxarsi nu asatethaa giddon iitan kumida alame; asatethaa ubbaa tunisees. Gaannamepe keyiya tamada nu de7uwa wotha ubbaa xuuggees. 7 Do7atanne kafota, ulora goosheteysatanne abban de7iya medhetethata ubbaa asi haarees; entika haaretidosona. 8 Shin oonika inxarsi haaranaw danda7ibeenna. Inxarsi wodhiya marzey kumida haaretonna iita medhetethi. 9 Nu inxarsan, nu, Godaanne Xoossaa galatoos. Qassi iyara Xoossaa leemison Medhetida asaa baaddoos. 10 Issi doonape galatinne baadethi keyees. Ta ishato, hessada hananaw bessenna.Medhe 1:26. 11 Pultoy issi ollafe mal7iya haathinne cammiya haathi pultanaw danda7ii? 12 Ta ishato, balase mithi shamaho ayfanaw danda7ii? Woyko woyne mithi balase mitha ayfe ayfanaw danda7ii? Camo haathaafe mal7o haathi keyanaw danda7enna.

13 Hinte giddon cincinne akeekanchoy oonee? Ba lo77o de7uwa, ashketethaninne cincatethan oosetida ooson besso. 14 Shin hinte wozanan cammiya qinaateynne bana dosoy de7iko ceeqetofite; tumaa bolla wordotopite. 15 Hessa mela cincatethay salope yidaba gidonashin, hessi asaba, alameba, xalaheba. 16 Qinaateynne bana dosoy de7iya son ooshshinne iita ooso ubbay de7oosona. 17 Shin bollafe yaa cincatethay ubbaafe sinthe geeshshi. Qassi sarotethi, aadatethi, si7idi ekeysa, qadheteysa, lo77o ayfey kumidaysa, ase shaakonnaysanne cubbotethi baynaysa. 18 Sarotethaa doseysati sarotethi zeridi xillotethi buucosona.