3
Azinabanne Machiba
1-2 Hessadaka, macheto, hinte azinatape Xoossaa qaalas kiitetonaysati de7ikoka aykoka odetonashin, hinte yashshatethaanne hinte geeshsha de7uwa be7idi ammanana mela entaw haaretite.Efe 5:22; Qola 3:18. 3 Hinte, hinte huuphe pixoninne worqa alleeqon woyko lo77o ma7on hinte bolla asatethaa loyson gidopo.1 Ximo 2:9. 4 Shin hinte wozanaa giddon de7iya yegelsatethay Xoossaa sinthan hintew daro al7o gididi dhayonna, ashkenne wopu gida ayyaana gido. 5 Xoossay immana gidaysa ammanida geeshsha maccasati beni wode banta azinatas haaretidi, bantana hessada daro loythidosona. 6 Hessada Saara Abrahaame, “Ta godaw” yaagada xeegashe, iyaw kiitetasu; hinteka aykoka yayyonna lo77oba oothiko I nayta.Medhe 18:12.
7 Azinatoo, hinte macheti hintefe daaburancho medheta gideysa eridi, entana bonchite; hinte woosa dhubonna mela Xoossay immida de7uwa enti hintera issife laattiya gisho enta bonchite.Efe 5:25; Qola 3:19.
Lo77o Oothidi Meto Eko
8 Wursethan, ubbay issi qofan de7ite. Issoy issuwas qadhetishe, ishada siiqetite; qassi issoy issuwas keehatanne ashketa gidite. 9 Iita gisho iita woyko cashsha gisho cayidi zaaropite; hessa aggidi, Xoossay hintew anjuwa immanaw hintena xeegida gisho anjite. 10 Ayis giiko, Geeshsha Maxaafay,
“De7o doseynne lo77o wode
be7anaw koyey oona gidikoka
ba inxarsan iitabaanne wordo odeteysa aggo.Maz 34:12-16.
11 Iitabaa ootheysa aggidi lo77oba ootho;
sarotethaaka keehi koyonne kaallo.
12 Godaa ayfey xillotako xeellees;
qassi I ubba wode enta woosa hayzees.
Shin Goday iitabaa ootheyisata ba hanqo som7uwan xeellees”
yaagees.
13 Hinte lo77oba oothanaw amotiko hintena qohanay oonee? 14 Hari attoshin, xillotetha gisho hinte waayetiko anjetidaysata. Asas yayyofitenne hirgofite.Maato 5:10; Isa 8:12-13. 15 Kiristoosa hinte wozanan bonchitenne godayite. Xoossay hintew immida ufaysas gaaso oychiya oodeska zaaro immanaw ubba wode giigidi uttite, shin hessa ashketethaninne yashshan oothite. 16 Qassi Kiristoosan hinte de7iya lo77o de7uwa iitabaa oothidabaada, hintena cayiya asay zigiryaban yeellatana mela hinte kahay geeshshi gido. 17 Xoossay gidaba gidiko iitabaa oothida gisho waaye ekeysafe lo77oba oothida gisho waaye ekeysi lo77o. 18 Kiristoosi nuna Xoossaako shiishanaw baw xillo gididi de7ishe, nagaranchota gisho issi toho nagara ubbaas hayqis; I ba asatethan hayqis, shin ayyaanan paxis. 19 Qassi he ayyaanan I bidi qashon de7iya shempotas qaala odis. 20 Nohey markabiya keexiya wode he shempoti Xoossaas kiitetonna ixidosona, shin Xoossay entana danda7i gam7is. Hospun asa xalaali markabiyan gelidi, dhayo haathaafe attidosona.Medhe 6:1—7:24. 21 He dhayo haathay ha77i hintena ashshiya xinqate leemiso gidis. Ha xinqatey bolla qita meecco gidonashin, lo77o kaha Xoossaafe ekanaw iya woossiya oge gididi, Kiristoosa denduwa baggara hintena ashshees. 22 I salo bidi Xoossaa ushachan uttidi, kiitanchota, maata aawatanne wolqaamata haarees.