4
Xoossas Ammaneta
1 Hessa gisho, Kiristoosi ba ashuwan nuus waayetida gisho hinteka he qofan hintena dancisidi minnidi eqite. Kiristoosa gisho gidi ba ashuwan waaye ekida uray nagara oothike gidi qanxida asi. 2 He uray ba attida laythan Xoossaa shene oothanaw koyeesipe attishin, iita asho amon deenna. 3 Kase hinte ammanonna asay de7idaysada de7ideta. Hinte iita amon, laymatethan, mathon, tunatethi denthethiya yethan, pokiya eeqa goyinnon kase de7ida duussay gidana. 4 Ammanonna asaara hinte shori bayna oosuwa oothonna gisho malaaletidi hintena cayoosona. 5 Shin enti paxata bollanne hayqida asaa bolla pirdanaw de7iya Xoossaas zaaro immana. 6 Hayqida asaas Wongelay sabbaketiday haysa gishosa. Enti asatho banta ashuwan pirdetana qassi banta ayyaanan Xoossaatho de7on daana.
7 Hiza, ubbabaas wursethay matatis. Hessa gisho, woossanaw danda7etana mela wopu gida wozani de7o; maarara de7ite. 8 Siiqoy daro nagara kammiya gisho, ubbaafe aathidi issoy issuwara wozanape siiqetite.Leemi 10:12. 9 Zuuzumonna issoy issuwa imathatethan mokite. 10 Hinte Xoossaafe dumma dumma aadho keehatetha imota ekidaysada hinte issoy issoy he imuwa bessiyada oykidi issoy issuwa haggaazite. 11 Yesuus Kiristoosa baggara ubbaban Xoossay galatetana mela oonika odiyaba gidiko Xoossaafe qaala ekidaada odo. Qassi oonika maaddiyaba gidiko Xoossay iyaw immiya wolqaada maaddo. Bonchoynne wolqi merinaape merina gakanaw iyaw gido. Amin7i.
Ammano Gaason Gakiya Waaye
12 Ta ishato, hinte tamada xuuggiya waaye paaciya giddora aadhiya wode oorathabay hanidaada malaaletofite. 13 Shin iya bonchoy qonciya wode hinte ufaysay gita gidana mela Kiristoosa waayiya hinte ekeysan ufaytite. 14 Kiristoosa sunthaa gisho asi hintena cayiya wode, Xoossaa boncho Ayyaanay hinte bolla shempiya gisho hinte anjetidaysata. 15 Hintefe waaye ekiya oonika shempo wodhidaada woyko kaysotidaada woyko iita oothidaada woyko gelsonnaban gelidaada hanidi waayetofo. 16 Gidoshin, kiristaane gidiya gisho waayetiko Kiristoosa sunthaa gisho Xoossaa galatope attishin, yeellatopo.
17 Pirdi Xoossaa asaa bolla doomiya wodey gakis. Hiza, he pirday koyro nu bolla doomiyaba gidiko, Xoossaa Wongelas Kiitetonna asaa wursethay ay gidanee? 18 Xilloy un7an attiyaba gidiko, makallanchoynne nagaranchoy yaatin waananee?Leemi 11:31. 19 Hessa gisho, Xoossa sheneda waaye ekeysati banta shempuwa bantana medhida, ammanthiya Xoossas hadara immishe lo77oba ootho.