1 Derey dariya Efreema biittan, Rama kataman de7iya, Efreema kochenne Zuufa koche gidida, Hilqaana geetetiya issi addey de7ees. I Yirohaama na7a; Yirohaami Elihu na7a; Elihu Toohu na7a; Toohuy Zuufa na7aa. 2 Hilqaanas nam7u macheti de7oosona; issinne sunthay Haanno; hankoori sunthay Pinaano. Pinaanis nayti de7oosona, shin Haannas na7i baawa.

3 Hilqaani laythan laythan Ubbaafe Wolqaama Godaa goyinnanawunne iyaw yarshanaw Seelo bees. Eeli nayti nam7ay, Afnaninne Finihaasi Godaa kahine gididi Seelon haggaazosona. 4 Hilqaani yarsho yarshiya wode ubban ashuwape issi issi kushe ba mache Pinaanis, ba adde naytasinne macca naytas huuphen huuphen immees. 5 Goday Haanno yelo diggikoka, Hilqaani iyo dosiya gisho, iw nam7u kushe immees. 6 Goday Haanno yelo diggida gisho, I dawuthiya iyo toochada yiloyawusu. 7 Hessi laythan laythan ubba wode haniyaba. Haanna Godaa keethi bida wode ubban I dawuthiya iya yeekana gakanawunne kathi ixana gakanaw yiloyawusu. 8 I azinay Hilqaani, “Haanne, ne ayis yeekay? Ayis kathi miikii? Ne wozanay ayis azzanii? Taani new tammu naytape aadhikinayee?” yaagees.

9 Issi gallas enti Seelon midaapenne uyidaape guye, Haanna denda eqasu. Kahiney Eeli Godaa keetha pengiya matan ba uttiya bessan uttis. 10 Haanna daro azzanida gisho cametada yeekashe Godaa woossasu. 11 Iya haysada yaagada qangetasu; “Ubbaafe Wolqaama Godaw, tana ne aylliw be7a. Ta metuwa be7ada, tana hassaya; tana ne aylliw dogopa. Neeni taw ne ayllees adde na7a immiko, iya de7o laytha ubban taani iya new immana; iya huuphey polo meedetenna” yaagasu.

12 Haanna Godaa woosa adussida wode Eeli I doona be7ees. 13 Haanna ba wozanan Xoossaa woossiya wode I mettershay qaaxees, shin I qaalay si7etenna; hessa gisho, Eeli iyo mathotidaada qopis. 14 I, “Neeni awude gakanaw mathotay? Woyne ushsha neepe digga” yaagis.

15 Haanni zaarada, “Ta Godaw, gidenna; taani daro azzanida maccas; taani ta shempuwafe Godaa woossaysipe attishin, woyne woyko mathoyiya ushshu uyabike. 16 Taani metoynne azzanoy darida gisho woossayis. Tana ne aylliw pathenna maccas oothada qopofa” yaagasu.

17 Eeli zaaridi, “Saro ba; neeni woossiyaba Isra7eele Xoossay new immo” yaagis.

18 Haanna, “Ne aylliya ne sinthan saba demmo” yaagasu. Hessafe guye, iya ba ogiya bada kathi masu; hessafe simmada iya azzanabuuku.

19 Wontetha gallas guura dendidi, Hilqaaninne iya soo asay Godaa goynidaape guye, Rama kataman de7iya banta soo simmidosona. Hilqaani ba mache Haannira aqis; Goday iyo qopis. 20 Iya qanthatada adde na7a yelasu. Haanna, “Taani Godaa woossin I tana si7is” gada iya sunthaa Sameela sunthasu.

21 Hilqaani ba soo asa ubbaara laytha yarsho Godaas yarshanawunne qangetha gathanaw Seelo bis. 22 Shin Haanna babuku. Iya ba azinaako, “Na7ay dhanthi duuthidaape guye, iya efada, Godaas immana; I merinaw yan daana” yaagasu.

23 Hilqaani, “Nena lo77idaba ootha; I dhanthi duuthana gakanaw son gam7anaw danda7aasa; Goday ba gelida qaala new polo” yaagis. Haanna ba na7aa dhanthi duuthana gakanaw son gam7asu.

24 Haanna na7ay dhanthi duuthidaape guye, na7aanne heedzu laytha wofaano*Meedzu laytha wofaano: Ibraawetho birshethay heedzu wofaano gees; qassi Girike birshethay heedzu laytha wofaano gees. laatamu kilo giraame dhiillenne ogoro kumetha woyne ushshu ekada Seelon de7iya Godaa keethi basu; he wode na7ay guutha. 25 Enti wofaanuwa shukidaape guye na7aa Eeliko efidosona. 26 Haanna, “Ta godaw, ne shempoy ero; ne sinthan eqada Godaa woossida maccasiya tana. 27 Ha na7aa immana mela woossin, Goday ta woossidaba immis. 28 Hessa gisho, taani iya Godaas immas; I ba de7o laytha ubban Godaas imetis” yaagasu. Enti yan Godaa goyinnidosona.