1 Sameeli odida qaalay Isra7eele ubbaa gakis. Isra7eeleti Filisxeematara oletanaw keyidosona; Isra7eeleti Aben7ezeran dunkaanin, Filisxeemeti Afeeqan dunkaanidosona. 2 Filisxeemeti cugan cugan gididi, Isra7eeletara oletanaw dendidosona; olay minnida wode Filisxeemeti Isra7eeleta xoonidi oyddu mukulu gidiya asaa wodhidosona. 3 Olanchoti dunkaanida gutaa simmida wode Isra7eele cimati, “Hachi Goday nuna Filisxeemeta kushen ayis aathidi immidee? Nuura baana melanne nu morketa kushepe nuna ashshana mela Godaa Taabotiya Seelope ane ehoos” yaagidosona. 4 Hessa gisho, asay Seelo kiittin, kiruubeta giddon araatan uttiya Ubbaafe Wolqaama Godaa Taabotiya ehidosona. Eeli nayti nam7ay Afnaninne Finihaasi caaqo Taabotiyara yan de7oosona.

5 Godaa Caaqo Taabotey asay dunkaanida gutaa gakida wode Isra7eele ubbay biitti qaaxana gakanaw banta qaala dhoqu oothidi, “Godaa Caaqo Taabotey gakis” yaagidi waassidosona.

6 Isra7eeleta waasuwa Filisxeemeti si7idi, “Ibraaweta gutan si7etiya wolqaama waasoy aybee?” yaagidosona.

Godaa Taabotey enta gutaa yidaysa Filisxeemeti erida wode, 7 Yayyidi haysada yaagidosona; “Xoossay enta gutaa yis; nuna ayye! Haysa melabay haysafe kase hani erenna. 8 Nuna ayye! ha wolqaama Xoossaa kushepe nuna ashshanay oonee? Ha Xoossay Gibxeta mela biittan dumma dumma gadon shocis. 9 Hinteno Filisxeemeto, minnite! Adde gidite! Hessi hanonna ixiko, hinte enta kase aylletethan haaridaysada enti hintena haarana. Adde gidite; oletite” yaagidosona.

10 Filisxeemeti oletidi, Isra7eeleta xoonin Isra7eeleti banta soo soo baqatidosona. He olan daro asay hayqidosona; Isra7eele toho olanchotape hastamu mukulu asay hayqidosona. 11 Xoossaa Taabotey di7etis; Eeli nayti nam7ay, Afnaninne Finihaasi hayqidosona.

12 He gallas Biniyaame koche gidida issi addey ola dembafe woxishe yidi Seelo gakis. Ba azzanuwa erisanaw I ba ma7uwa daakidi, ba huuphen biitta qolis. 13 He addey gakiya wode Eeli ba wozanan Xoossa Taabotiyas hirgida gisho naagishe oge doonan de7iya ba oydiyan uttis. Addey katama gelidi, hanidaba odin, katama ubbay waaso goochi aggis.

14 Eeli he waasuwa si7idi, “Haysi aybi waaso?” yaagis.

Addey ellesi bidi Eelis odis. 15 Eeli uddufun tammanne hospun laythi gidida cima; iya ayfey daaburidi xeelo aggis. 16 Addey Eeliko, “Ola dembafe yiday tana; taani hachi yaape baqatada yas” yaagis.

Eeli, “Ta na7aw, yaatin waanidee?” yaagidi oychis.

17 Addey, “Isra7eeleti Filisxeemeta sinthafe baqatidosona; daro asi wuris; ne nayti nam7ay Afnaninne Finihaasi hayqidosona; Xoossaa Taabotey di77etis” yaagis.

18 Addey Xoossa Taabotiyabaa odida wode pengiya matan de7iya ba oydiyape Eeli guye kundis. I cimanne moollo gidiya gisho morgey meqin hayqis. Eeli Isra7eele biitta oytamu laythi haaris.

19 Eeli na7aa Pinihaasa machiya yelanaw wodey wurida qanthe. Xoossaa Taabotey di7etetha, ba bolluwanne ba azinaa hayquwa si7ida wode qoponna iqethi iyo oykin yelasu. 20 I shempoy keyiya wode yeliseysati, “Adde na7a yeladasa; yayyofa” yaagidosona. Shin entaw aykoka zaarabuuku; enti giyabaka si7abuku. 21 Iya ba na7aa Ikabooda*Ikabooda: Ibraawetho doonan ha suntha birshethay “Bonchoy baawa” guussu. gada sunthasu; Xoossaa Taabotey di7etida gishonne ba bolloynne ba azinay hayqida gisho, “Bonchoy Isra7eelepe shaaketis” yaagasu. 22 Iya, “Xoossaa Taabotey di7etida gisho bonchoy Isra7eelepe shaaketis” yaagasu.