1 Filisxeemeti Xoossa Taabotiya di77idaape guye Aben7ezerape Ashdooda efidosona. 2 Xoossa Taabotiya efidi, Daagone eeqa keethan gelsidi, Daagone misiliya matan wothidosona. 3 Ashdooda asay wontetha gallas guura dendidi be7iya wode Godaa Taabotiya sinthan Daagoni gufannidaysa be7idosona. Daagone denthidi, kase bessan essidosona. 4 Qassi wontetha gallas guura dendidi be7iya wode Godaa Taabotiya sinthan Daagoni sa7an gufannidaysa be7idosona. He wode Daagone huupheynne iya nam7u kushey meqidi pengiya bolla de7ees; hanko asatethay dumma attis. 5 Hachi gakanaw Daagone kahinetinne Ashdoodan de7iya Daagone keetha geliya asati ubbay Daagone pengiya yedhonna xambaali aadhey hessa gishosa.

6 Ashdooda katamaa bollanne iya heeran de7iya asaa bolla Godaa kushey deexis; Goday kixa harge yeddidi enta seeris.

7 Ashdooda katamaa asay hanidaba be7ida wode, “Isra7eele Xoossaa kushey nu bollanne nu xoossaa Daagone bolla deexida gisho, Isra7eele Xoossaa Taabotey nu matan gam7ofo” yaagidosona. 8 Hessa gisho, ichashu Filisxeeme halaqata ubbaa xeegidi, “Isra7eele Xoossaa Taabotiya waatino?” yaagidi oychidosona.

Halaqati, “Isra7eele Xoossaa Taabotey Gaate katamaa boo” yaagidi zaaridosona. Isra7eele Xoossaa Taabotiya Gaate efidosona.

9 Shin Taabotey Gaate gakidaape guye, Godaa kushey he katamaa bolla deexidi, daro daganthis. Kataman de7iya asaa na7ape cima gakanaw kixa hargen shocis. 10 Hessa gisho, Xoossaa Taabotiya Eqroona katama yeddidosona.

Xoossaa Taabotey Eqroona geliya wode, Eqroona asay, “Nunanne nu asaa dhaysanaw Isra7eele Xoossaa Taabotiya nuuko ehidosona” yaagidi waassidosona. 11 Hessa gisho, enti Filisxeeme halaqata xeegidi, “Nunanne nu asaa dhaysanaape sinthe Isra7eele Xoossaa Taabotiya haysafe diggite; iya iya bessaa guye zaarite” yaagidosona. Godaa kushey katamaa bolla deexida gisho Katama ubbay hayqo dagaman oyketis. 12 Hayqope attida asaa kixa hargey un7ethida gisho he katamaa asaa yeehoy salo gakis.