1 Godaa Taabotey Filisxeeme biittan laapun ageena uttis. 2 He wode Filisxeeme asay banta kahinetanne marota xeegidi, “Godaa Taabotiya nuuni waatino? Nuuni guye iya bessaa iya waati yeddaneeko nuus odite” yaagidosona.

3 Enti zaaridi, “Isra7eele Xoossaa Taabotiya guye yeddishe mela kushe yeddofite. Ay hanidika nagara yarshora yeddite. Hessa oothiko hinte paxana; iya kushey hinte bollafe ayis kichiboonako hinte erana” yaagidosona.

4 Filisxeeme asay, “Nuuni yeddanaw bessiya nagara yarshoy aybee?” yaagidi oychidosona.

Enti, “Hintenanne hinte halaqata gakida gadoy issino gidiya gisho, Filisxeeme halaqata taybon ichashu worqa kixatanne ichashu worqa ecereta yeddite. 5 Hinte he kixatanne hinte biitta dhaysiya he ecereta misileta medhidi, Isra7eele Xoossaas boncho immite. Ooni eri I hinte bollafe, hinte xoossata bollafenne hinte biitta bollafe ba kushiya denthana. 6 Gibxe asaynne enta kawoy zore ekonna ixidaysada hinte ayis zore ekeketii? Goday enta daro seerin Isra7eeleti banta ogiya baana mela yeddibookona? 7 Ha77i issi ooratha gaare giigisite; qambara wothiboona nam7u dhanthiya miizata he gaariyan waaxite; shin marata entafe duuthidi son ashshite. 8 Godaa Taabotiya gaariya bolla wothite; nagara yarshos giigisida worqa kixatanne worqa ecereta saaxinen yeggidi Godaa Taabotiya matan wothidi I baana mela yeddite. 9 Shin I biya bessa be7ite; I ba zawa oykidi, Beet-Sameesa simmidi biyaba gidiko, ha gaduwa nu bolla ehiday Godaa gideysa bessees. Shin I hara soo biiko haysi nu bolla coo gakisipe attishin, nuna dechiday Godaa kushe gidonnaysa erana” yaagidi zaaridosona.

10 Enti geetetidaysada oothidosona; nam7u dhanthiya miizata ekidi, gaaren waaxidosona; marata soo zaaridi gordidosona. 11 Enti Godaa Taabotiya, worqa kixanne ecere misileti de7iya saaxiniya gaaren wothidosona. 12 Hessafe guye, miizati Beet-Sameesa efiya ogiya oykidi gede haa goonna “Himbaa” gidi waassishe bidosona. Filisxeeme halaqati miizata geedo kaallidi, Beet-Sameesa zawa gakanaw bidosona.

13 Beet-Sameesa asay he wode zangaaran giste cakoosona; enti dhoqu gidi xeellidi, Taabotiya be7idi ufaytidosona. 14 Gaarey Beet-Sameesan de7iya Iyyasu geetetiya uraa gade gakidi, issi gita shuchaa matan eqis. Enti gaariya mithaa qeridi, xuussa yarsho oothidi he miizata Godaas yarshidosona. 15 Leeweti Godaa Taabotiyanne worqa miisheti de7iya saaxiniya gaariyape wodhisidi, gita shucha bolla wothidosona. He gallas Beet-Sameesa asay Godaas xuussa yarshonne hara yarshota yarshidosona. 16 Ichashu Filisxeeme halaqati hanidaba ubbaa be7idi he gallas Eqroona simmidosona.

17 Worqa kixati Filisxeeme halaqati nagara yarsho oothidi Godaas kiitida Ashdooda, Gaaza, Asqaloona, Gaatenne Eqroona geetetiya ichashu katamata sunthan issuwa issuwa immidosona. 18 Worqa ecereta tayboy Filisxeeme halaqata ichashay de7iya gimbetida katamatanne heeran de7iya gutata taybuwa mela. Beet-Sameesan de7iya Iyyasu geetetiya uraa gaden Godaa Taabotiya wothida gita shuchay hachi gakanaw marka gididi de7ees.

19 Shin enti Godaa Taabotiyas giddo baggaa be7ida gisho Goday Beet-Sameesa asaape laapun tammu asata wodhis. Goday entafe daro asaa wodhida gisho asay yeekidosona. 20 Hessa gisho, Beet-Sameesa asay, “Godaa sinthan, ha geeshsha Xoossaa sinthan ooni eqanaw danda7ii? Taabotey nuupe keyidi oodeko baanee?” yaagidosona. 21 Qiriyat-Yi7aariman de7iya asaako kiita yeddidi, “Filisxeeme asay Godaa Taabotiya zaaridosona; yidi iya hinteko ekite” yaagidosona.