1 Qiriyat-Yi7aarima asay yidi, Godaa Taabotiya efidi dere huuphen de7iya Amnadaabe son wothidosona. Godaa Taabotiya naagana mela Amnadaabe na7aa Alaazara dummayidi sunthidosona.

2 Taabotey Qiriyat-Yi7aariman daro wode gam7is; yan laatamu laythi uttis. Isra7eele asa ubbay azzanidi Godaa koydosona.

3 Sameeli Isra7eele asaako, “Kumetha wozanape hinte Godaako simmidaba gidiko, allaga xoossatanne Astaroote eeqa hinte giddofe diggite. Hintenatethaa Godaas sheedhite; iya xalaalas kiitetite; I hintena Filisxeemeta kushepe ashshana” yaagis. 4 Hessa gisho, Isra7eele asay Ba7aalenne Astaroote eeqa banta giddofe diggidi, Godaa xalaala goyinnidosona.

5 Hessafe guye, Sameeli, “Isra7eeleta, ubbay Mixipha shiiqite; taani yan hintew Godaa woossana” yaagis. 6 Enti Mixipha shiiqidi haathe duuqidi, Godaa sinthan gussidosona; he gallas xoomidosona; he bessan, “Nuuni Godaa bolla nagara oothida” yaagidi paaxidosona. Mixiphan Sameeli Isra7eele asaa bolla daynnatis.

7 Isra7eeleti Mixiphan shiiqidaysa Filisxeeme asay si7ida wode enta olanaw keyidosona. Isra7eeleti hessa si7idi, Filisxeemetas yayyidosona. 8 Isra7eele asay Sameelako, “Filisxeeme asaa kushepe nuna ashshana mela neeni Godaa, nu Xoossa woosa aggofa” yaagidosona. 9 Sameeli issi dhammiya dorsa na7a ekidi, kumethi xuussa yarsho oothidi Godaas yarshis; Isra7eele asaa gisho Godaa woossis; Goday iya woosa si7is.

10 Sameeli xuussa yarsho yarshiya wode Filisxeemeti Isra7eeleta olanaw shiiqidosona. Shin he gallas Filisxeemeta bolla Goday gita dada gunthidi daganthin, enti Isra7eeleta sinthafe baqatidosona. 11 Isra7eeleti Mixiphafe keyidi, Filisxeemeta yedethidi, Beet-Kaarape garsa baggara de7iya bessaa gakanaw oge bolla wodhidosona.

12 Hessafe guye, Sameeli issi shuchu ekidi, Mixiphafenne Shenape giddon essis; “Ha77i gakanaw Goday nuna maaddis” yaagidi he bessaa Aben7ezera gidi sunthis.*Aben7ezera: Ha sunthaa birshethay “Maado shuchu” guussu. 13 Filisxeeme asay xoonetidosona; enti Isra7eele biitta bolla nam7antho dendibookona. Sameeli de7ida laytha ubban Godaa kushey Filisxeeme asaa bolla deexis. 14 Filisxeeme asay Eqroonape Gaate gakanaw Isra7eelepe di77ida katamati Isra7eeles simmidosona. Isra7eele asay banta kase zawa Filisxeeme asaa kushepe wothi ekidosona. Isra7eele asaynne Amoore asay saro de7is.

15 Sameeli ba de7o laytha ubban Isra7eele bolla pirdees. 16 Sameeli laythan laythan Beetele, Galgalanne Mixipha yuuyidi Isra7eele bolla pirdees. 17 Iya keethay Raman de7iya gisho yaa simmidi he bessanka Isra7eele bolla pirdees. I Raman Godaas yarsho bessi keexis.