1 Sameeli cimida wode ba nayta Isra7eele bolla daynna oothidi shuumis. 2 Iya bayra na7aa sunthay Iyyu7eela; kaalo na7a sunthay Abiya; enti Barsaaben pirdoosona. 3 Shin iya nayti banta aawa ogiya kaallibookona. Enti bessonna go77a demmanaw guye simmidosona; wodhaafe ekidosona, suure pirda wobbisidosona.

4 Hessa gisho, Isra7eele cimati issife shiiqidi, Sameelako Rama yidi, 5 “Heko neeni cimadasa; ne nayti ne ogiya kaallokona; hara kawotethati ootheysada nuna aysiya kawo ha77i nuus shuuma” yaagidosona.

6 Enti, “Nuna aysiya kawo nuus imma” gidi oychidaysi Sameela ufaysibeenna. Hessa gisho, Sameeli Godaa woossis. 7 Goday Sameela, “Taani enta bolla kawotonnaada nena gidonashin tana ixida gisho asay neeko giyaba ubbaa si7a. 8 Enta taani Gibxefe kessida wodiyape doomidi hachi gakanaw tana aggidi, hara xoossata goyinnishe de7idosona. Ha77i enti ta bolla oothida ubbaa ne bolla oothosona. 9 Ha77i enti giyaba si7a; shin enta bolla kawotana kawa wogaa entaw minthada oda” yaagis.

10 Kawo oychida deriyas Goday odida qaala ubbaa Sameeli yaagidi odis. 11 “Hinte bolla kawotana kawoy oothanabay haysa; I hinte adde nayta ekidi, para gaare asatanne para asata oothana; enti iya gaariya sinthan woxana. 12 Entafe attidaysata shaalaqatanne hamsalaqata, harata iya biitta goyeyisata iya kathaa cakeyisata, qassi harata iya ola miishenne para gaare miishe ootheyisata kessana. 13 Hinte macca naytaka efidi, baw shitto giigiseyisata, katheysatanne uukeyisata oothana. 14 Hinte goshshaafe, woyne gadepenne shamaho gadepe lo77o bessata ekidi, ba moorinnatas immana. 15 Kathaafenne woyniyape tammaafe issi kushiya ekidi ba shuumatasinne ba moorinnatas immana. 16 Hinte adde aylletape, macca aylletape, hinte na7atethatafenne hinte hariyape lo77eysa baw go7etanaw ekana. 17 Hinte dorsafenne deeshape tammaafe issi kushe ekana; hinte iya oosancho gidana. 18 He gallasay gakida wode hinte doorida kawoy gathiya qohuwa gisho waassana; shin he gallas Goday hinte waasuwa si7enna” yaagis.

19 Gidoshin, asay Sameela qaala si7onna ixidi, “Akay, nuus kawoy de7o. 20 Hara kawotethata mela nuna kaalethiya, nu sinthan biyanne nu olaa oletiya kawoy de7o.”

21 Sameeli asaa qaala ubbaa si7idi, Godaas odis. 22 Goday Sameelako, “Enta qaala si7a; enta bolla kawo kawotha” yaagis.

Sameeli Isra7eele asaako, “Hinte soo soo simmite” yaagis.