1 Biniyaame koche gidida issi Qiisa geetetiya addey de7ees; I eretida asi. I Abi7eela na7a; Abeeli Xaroora na7a; Xaroori Bakoraate na7a; Bakorati Biniyaame koche gidida Afeeqa na7a. 2 Iyaw Saa7ola geetetiya issi mala lo77o gidida pantha na7i de7ees. Isra7eeleta giddon iya mela mala lo77oy baawa; I asi ubbay iya hashepe garsan attiya adussa asi.

3 Issi gallas Saa7ola aawa Qiisa hareti dhayidosona; Qiisi ba na7aa Saa7olako, “Oosanchotape issuwa ekada hareta koyanaw ba” yaagis. 4 Enti derey dariya Efreema biittaranne Shalisha biittara koyishe aadhidosona, shin hareta demmibookona. Qassi Sha7alima biittara koyishe aadhidosona, shin yanka hareti dookona. Biniyaame biittara aadhidosona, shin yanka demmibookona.

5 Enti Zuufa biitta gakida wode Saa7oli baara de7iya oosanchuwako, “Haaya; ane guye simmoos; aaway haretaba qopeysa aggidi, nuus hirgana” yaagis.

6 Shin oosanchoy, “Heko, issi bonchetida Xoossa asi ha kataman de7ees; I odiya ubbay poletees. Ane ha77i yaa boos; ooni eri nu baana ogiya I nuus odaneko” yaagis.

7 Saa7oli, “Nu biyaba gidiko iyaw ay immanee? Nu oykida kathay wuris; nu Xoossa asas immiyabay baawa. Nuus aybi de7ii?” yaagis.

8 Oosanchoy zaaridi, “Ta kushen guutha bira santimey de7ees; nu baana ogiya nuus odana mela Xoossa uraas hanno immana” yaagis.

9 (Beni wode Isra7eele biittan issi asi Xoosse oychanaw bishe, “Ane qoncethi be7iya asako boos” yaagees. Ha77i nabe geeteteysi he wode qoncethi be7iya asi geetetees.) 10 Saa7oli zaaridi, “Lo77o; yedha” yaagin, Xoossa uray de7iya katamaa bidosona. 11 Enti pude katamaa keyishin, haathe tikanaw yaa geela7otara ogen gahetidi, “Qoncethi be7iya asi haysan de7ii?” yaagidi oychidosona.

12 Enti, “Ee de7ees; I hintefe sinthan de7ees; ellesidi biite. Hachi asay dhoqa goyinno bessan yarsho yarshiya gisho, I nu katamaa yis. 13 Hinte katamaa geliya wode I maanaw dhoqa goyinno bessaa keyonna de7ishin hinte iya demmana. I yarshuwa anjanaw koshshiya gisho I gakonna de7ishin asay kathaa meenna. I anjidaape guye xeegetidaysati maana. Elle keyite; hinte iya ha77i demmana” yaagidosona. 14 Enti katamaa geliya wode Sameeli goyinno bessaa keyanaw bishe entara gahetis.

15 Saa7oli yaanape kase gallas Sameelas Goday haysada yaagidi qoncisis; 16 “Wonto hannoode Biniyaame biittafe issi asi ta neeko yeddana; I ta asaa Isra7eele kaalethana mela tiya. I ta asaa Filisxeeme kushepe ashshana; ta asa waasoy taako gakida gisho ta enta be7as” yaagis.

17 Sameeli Saa7ola be7ida wode Goday, “Taani new odida uray haysa; I ta asaa kaalethana” yaagis.

18 Saa7oli gimbe dirsa pengiya matan de7iya Sameelako shiiqidi, “Qoncethi be7iya ura soy awuneko taw odarkii?” yaagis.

19 Sameeli zaaridi, “Qoncethi be7ey tana. Hachi hinte taara miya gisho taape sinthatidi goyinno bessaa biite. Taani nena wonto guura yeddana; ne wozanan de7iya ubbaa ta new odana. 20 Heedzu gallasape sinthe dhayida haretaba gidiko enti bentida gisho hirgofa. Isra7eele asa ubbaa amoy oonee? Nenanne ne aawa soo asaa gidennee?”*Isra7eele ubban koyetey nena gidikii? yaagis.

21 Saa7oli zaaridi, “Shin taani Isra7eele zare ubbaafe laafa gidida Biniyaame koche gidikina? Ta soo asay Biniyaame kochaa giddon guutha gidennee? Neeni ayis taw haysa melaba oday?” yaagis.

22 Hessafe guye, Sameeli Saa7olanne iya oosanchoy efidi, dalga keethi gelsidi he bessaa xeegetida hastamu gidiya asaa giddon boncho bessan utisis. 23 Sameeli kathi katheysako, “Ne matan dumma wothashsha gada taani new immida ashuwa hamma” yaagis.

24 Kathi katheysi missa ashuwa ehidi, Saa7ola sinthan wothis. Sameeli Saa7olako, “Ta new dumma shaakada wothida ashoy haysa; ekada ma. Taani imathata xeegida wodepe doomada haysa new ashshas” yaagis. He gallas Saa7oli Sameelara mis. 25 Enti goyinno bessaafe duge katama wodhin, keetha bolla de7iya bessan Sameeli Saa7olara odetis.

26 Sa7i wontin, Sameeli Saa7ola keetha bollafe xeegidi, “Denda; ta nena moyzana” yaagis. Saa7oli dendin, nam7ay oge bolla keyidosona. 27 Enti katama gaxa gakishin, Sameeli Saa7olako, “Ne oosanchoy sinthe baana mela oda” yaagis. Oosanchoy sinthe aadhidi bin, Sameeli Saa7olako, “Xoossi gidaba ta new odana mela haysan guuthu gam7a” yaagis.