1 He wode Sameeli tigiyabara zayte ekidi, Saa7ola huuphen tiyis. Saa7ola yeeridi, haysada yaagis; “Ba asaa Isra7eele kaalethana mela Goday nena tiyis.*Girike birshethay, “Neeni iya asaa kaalethada enta yuushuwan de7iya morketa kushepe enta ashshana. Iya laata neeni kaalethana mela Goday nena tiyidaysas haysi malla” yaagidi gujis. 2 Neeni hachi taape shaaketada biya wode Raheeli duufuwa matan Biniyaame zawan de7iya Xalxaha geetetiya bessan nam7u asatara gahetana. Enti nena, ‘Ne koyanaw bida hareti bentidosona; ha77i ne aaway hareta qopeysa aggidi, ta na7ay waanidesha?’ yaagidi new hirgees” yaagidi odana.

3 Neeni he bessaafe dendada, Taabore gita mithaa gakanaw baana. Xoossaako Beetele biya heedzu asati yan neera gahetana. Entafe issoy heedzu deesha mari tookis; nam7anthoy heedzu uythi tookis; heedzanthoy ogoro kumitha woyne tookis. 4 Enti nena sarothana; new nam7u uythu immana; ne enta kushepe he uythaa ekanaw koshshees.

5 “Hessafe guye, neeni Filisxeeme olanchota cugay de7iya Xoossa deriya Gib7a baana. Neeni he katamaa gakiya wode diithara karaabora, suusul7enne zaye punnidi kaa7ishenne tinbite odishe, goyinno bessaafe wodhiya nabe cugara gahetana. 6 Godaa Ayyaanay ne bolla wolqan wodhana; neeni entara tinbite odana; neeni laametada hara asi gidana. 7 Ha mallati poletiya wode Xoossay neera de7iya gisho ne oothanaw danda7iyaba ubbaa ootha.

8 “Neeni taape sinthatada Galgala wodha. Taani xuussa yarshonne sarotetha yarsho yarshanaw neeko baana. Ta neeko bada ne oothanaba odana gakanaw laapun gallas gam7a” yaagis.

9 Saa7oli Sameelape shaaketida wode Xoossay Saa7ola wozanaa laammis; Sameeli odida mallati ubbay he gallas hanidosona. 10 Saa7olinne iya aylley Gib7a gakiya wode nabe cugay iyara gahetis. Xoossa Ayyaanay iya bolla wolqara wodhin I enta giddon tinbite odetis. 11 Saa7ola kase eriya ubbay I nabetara tinbite odeteysa be7ida wode, “Qiisa na7ay waanidee? Saa7oli nabe yaree?” yaagidosona. 12 He bessan de7iya issi uray, “Nu enta aaway ooneko eriw?” yaagidi oychis. Hessa gisho, “Saa7oli nabe kochee?” geysi hayse gidis. 13 Saa7oli tinbite odeysa wursidaape guye goyinno zumaa bolla keyis.

14 Saa7ola aawa ishay Saa7olanne iya aylliya, “Awu bidetii?” yaagis.

Saa7oli, “Hareta koyanaw bida; hareti bentonna ixin Sameela oychanaw bida” yaagis.

15 Saa7ola aawa ishay, “Hayyana Sameeli new gidaba taw odarkii” yaagis.

16 Saa7oli, “Hareti bentidaysa nabey Sameeli nuus geeshshidi odis” yaagis. Shin “Ne kawo gidana” gidi Sameeli iyaw odidaysa ba aawa ishas odibeenna.

17 Hessafe guye, Sameeli Mixiphan Isra7eele asaa Godaa sinthan shiishis. 18 Enta, “Goday, Isra7eele Xoossay haysada yaagees; ‘Taani Isra7eele Gibxefe kessas; Gibxe asaa kushepenne hintena un7ethiya kawotethata ubbaa kushepe ashshas.’ 19 Shin hachi hintena hinte metuwapenne waayiyape ashshiya tana hinte Xoossaa ixideta. ‘Akay, nuus kawo kawotha’ yaagideta. Hessa gisho, ha77i hinte, hinte kochan kochan gididi Godaa sinthe shiiqite” yaagis.

20 Sameeli Isra7eele zare shiishin, Biniyaame kochay dooretis. 21 Biniyaame kochaa shiishin, Maxira kochay dooretis. Wursethan Qiisa na7ay Saa7oli dooretis; enti iya koydosona, shin I bentibeenna. 22 Hessa gisho enti, “Addey ha bessaa yidee?” yaagidi Godaa oychidosona.

Goday, “Ee, Saa7oli miishe giddon qosetidi uttis” yaagis.

23 Enti woxi bidi, qosetida bessaafe kessi ehidosona. Asaa giddon I eqiya wode asi ubbay iya hashepe garsara attiya adussa asi. 24 Sameeli asaako, “Goday doorida addiya be7itee? Iya daaniya asi ha asa giddon oonika baawa” yaagis.

Asa ubbay banta qaala dhoqu oothidi, “Kawoy birata tuussi gido” yaagis.

25 Hessafe guye, Sameeli kawotetha wogaa asaas odis; xaatha maxaafan he wogaa xaafidi Godaa sinthan wothis. Yaatidi Sameeli asa ubbaa ba soo soo moyzis.

26 Saa7oli ba soo Gib7a bis; Xoossay enta wozanaa bochida mino asati Saa7olara bidosona. 27 Shin issi issi pathonna asati, “Ha addey nuna waatidi ashshanee?” yaagidosona. Enti iya kadhidi, iyaw ay imotaka immibookona. Shin Saa7oli si77i gis.