1 Issi ageenape guye,*Girike birshethay issi ageenape guye gidi gujees Amoone kawoy Na7oosi dendidi, Galadan de7iya Yaabesa katamaa teqis. Yaabesa asay, “Neeni nuura caaqa; nuuni new haaretana” yaagidosona.

2 Na7oosi, “Taani hintera caaqanay hinte ushacha ayfiya wooca kessada Isra7eele kawshidaape guyena” yaagis.

3 Yaabesa cimati Naa7osako, “Isra7eele biitta ubbaa nuuni kiita yeddana mela laapun gallas taka; nuna ashshiya asi dhayiko nuuni new kushe immana” yaagidosona.

4 Kiitetida asay Saa7oli de7iya bessaa Gib7a gakidi ha odaa asaas odidosona; asa ubbay banta qaala dhoqu oothidi yeekidosona. 5 He wode Saa7oli ba boorata laaggidi goshshafe yishe, “Asay waanidee? Ayis yeekona?” yaagidi oychis. Enti Yaabesa asay gidaba iyaw odidosona.

6 Ha qaala Saa7oli si7ida wode Xoossa Ayyaanay iya bolla wolqan wodhis; Saa7oli shene eexis. 7 Saa7oli waaxa boorata muxerethidi, “Saa7olanne Sameela kaallidi, keyonna asa boorati haysada muxetana” yaagidi kiitetida asata bolla Isra7eele biitta ubba yeddis.

He wode asa ubbay Godaas yayyidosona; enti issi asada hanidi keyidosona. 8 Saa7oli Beezeqan enta shiishidi taybida wode Isra7eele asay heedzu xeetu mukulu; Yihuda asay hastamu mukulu gidis. 9 Kiitetida asay, “Bidi Yaabesa Galada asaas, ‘Wonto xalqey michiya wode nuuni hintena ashshana yaagidi odite’ ” yaagidosona. Kiitetida asay bidi, Yaabesa asaas hessa odin, enti daro ufaytidosona.

10 Yaabesa asay Amoonetako, “Nuuni wonto hintew kushe immana; hinte nu bolla dosidaba oothite” yaagidosona.

11 Wontetha gallas Saa7oli ba asaa heedzu cugan shaakis. Enti sa7i wontiya wode Amoone asay dunkaanida gutaa gelidi, xalqey michana gakanaw Amooneta goyridosona. Goyretethaafe attidaysati nam7u asi issife doonnaada baw baw baqaatis.

12 Isra7eele asay Sameelako, “Saa7oli nu bolla kawotane yaagida asati oonantee? Enti ooneko kessite; nu enta wodhana” yaagis.

13 Shin Saa7oli, “Hachi Goday Isra7eele ashshida gisho issi asika hayqenna” yaagidi zaaris.

14 Sameeli, “Haayite; Galgala bidi, yan Saa7oli kawo gideysa zaaridi erisoos” yaagis. 15 Hessa gisho, asa ubbay Galgala bidi, Godaa sinthan Saa7oli kawo gideysa erisidosona. Yan issifetetha yarsho Godaa sinthan yarshidosona. Saa7olinne Isra7eele asa ubbay he bessan ba7aale ufaysan bonchidosona.