1 Sameeli Isra7eele ubbaako, “Hinte taw odida ubbaa si7ada, hinte bolla kawo kawothas. 2 Ha77i hintena kaalethanaw kawoy de7ees. Taani daro cimada puulumas; ta nayti hintera de7oosona. Taani ta na7atethafe doomada hachi gakanaw hintena kaalethas. 3 Heko, taani hinte sinthan eqas; Godaa sinthaninne I tiyida kawa sinthan ta bolla markatite. Taani oodde booru ekadina? Oodde hare ekadina? Oona cimmadina? Oona un7ethadina? Be7ashe be7onnaada hananaw oodefe wodhaafe ekadina? Haysatape issuwa taani oothidaba gidiko taw odite; ta qanxana” yaagis.

4 Enti zaaridi, “Neeni nuna cimmabaaka; woyko nuna un7ethabaaka; ne oodde kushepe aybaka ekabaaka” yaagidosona.

5 Sameeli, “Hinte ta kushen ay balaka demmiboonaysa Godaynne I tiyida kawoy hachi hinte bolla marka” yaagis.

Asay, “Ee, Xoossay marka” yaagidosona.

6 Qassika Sameeli, “Musenne Aarona dooridaynne hinte mayzata Gibxefe kessiday Godaa. 7 Ha77i hintewunne hinte mayzatas Goday oothida xillo ooso ubbaas taani hintenera Godaa sinthan mootetana mela haysan eqite. 8 Yayqoobinne iya soo asay Gibxen de7ishin, Gibxe asay enta un7ethida wode hinte mayzati Godaako waassidosona. Goday Musenne Aarona kiittis; enti hinte mayzata Gibxefe kessidi haysan wothidosona.

9 “Shin Isra7eele asay Godaa banta Xoossaa dogidosona. Goday enta Haxoora tora mocona Sisaara kushen, Filisxeeme asaa kusheninne Moo7abe kawa kushen aathidi immin enta olidosona. 10 Enti, ‘Nuuni nagara oothida; Godaa aggidi, Ba7aalenne Astaroota goyinnida. Shin ha77i ne nuna nu morketa kushepe ashsha; nuuni nena goyinnana’ yaagidi Godaako waassidosona. 11 Goday Gediyoona,*Gediyoona: Ibraawetho doonan Yeruba7aala geetetees Baaraqa,†Baaraqa: Ibraawetho doonan Badaana geetetees Yoftaahenne Sameela kiittidi, hinte yuusho ubban de7iya morketa kushepe hintena ashshis. Yaatin, hinte saro de7ideta.

12 “Amoone kawoy Na7oosi hinteko yidaysa be7ida wode Goday hinte Xoossay hinte kawo gidikoka, hinte, ‘Akay, nuuni kawo koyoos’ yaagideta. 13 Ha77i hinte dooridanne oychida kawoy haysish. Heko, Goday hinte bolla kawothis. 14 Hinte Godaas yayyiko, iyaw kiitetiko, iya qaala si7iko, iya kiitaa bolla makallonna ixiko, hintenne hinte bolla kawotiya kawoy Godaa hinte Xoossaa kaalliko ubbabay suurana. 15 Shin hinte Godaa qaalas kiitetonna ixikonne iya kiitaa bolla makalliko, Godaa pirday kase hinte aawata bolla yidaysada hinte bollaka yaana.

16 “Hiza minnidi eqite; Goday hinte ayfiya sinthan oothana gitaba be7ite. 17 Ha77i giste caka wode gidennee? Goday dadanne ira yeddana mela taani Godaa woossana. Hinte kawo oychidi, Godaa sinthan ay mela iitaba oothidaako hinte akeekana” yaagis.

18 Sameeli Godaa woossis; Goday he gallas dadanne ira yeddis; hessa gisho, asay Godaanne Sameela daro yayyidosona.

19 Asay, “Nuuni kawo oychidi, nu nagara ubbaa bolla ha iitatethaa gujida gisho nuuni ne aylleti hayqonna mela nuus Godaa ne Xoossaa woossarki” yaagis.

20 Sameeli asaako, “Yayyofite; hinte ha iitatetha ubbaa oothideta; shin hinte kumetha wozanan Godaas kiitetite; iya kaalo aggofite. 21 Pathonnaba gidiya gisho maaddonnanne ashshona eeqata kaallopite. 22 Goday ba gita sunthaa gisho ba asaa aggenna; I hintena ba ase oothanaw ufaytees. 23 Hinte gisho woosa aggada Godaa qohoy taape haako; taani hintena lo77onne suure ogiya tamaarsana. 24 Godaa yayyite; hinte kumetha wozanan ammanetidi, iyaw kiitetite; hintew I oothida gitaba hassayite. 25 Shin hinte zaari zaari nagara oothiko, hintenne hinte kawoy dhayana” yaagis.