1 Saa7oli kawotiya wode iyaw laythi hastama; I Isra7eele bolla nam7u laythi kawotidaape guye, 2 Isra7eeleta giddofe heedzu mukulu asi dooris. Entafe nam7u mukulu asay Mikmaasaninne derey dariya Beetele biittan Saa7olara de7ees. Issi mukulu asay qassi Biniyaamen de7iya Gib7an Yoonatanara de7ees; attida asaa Saa7oli enta soo soo yeddis.

3 Yoonataani Gib7an*Gaba7oonan de7iya Filisxeeme olanchota olis; Filisxeeme asay hessa si7idosona. Hessafe guye, Saa7oli, “Ibraaweti haysa si7o” gidi biitta ubban moyze punisis. 4 Saa7oli Filisxeeme asaa olidi xoonidaysa Isra7eele asay si7idosona; Isra7eele asay Filisxeeme asaa matan ixetidaysata gideysa eridosona. Isra7eele asay Saa7ola kaallanaw xeegetidi Galgalan shiiqidosona.

5 Filisxeeme asay Isra7eele asaa olanaw heedzu mukulu para gaaretara, usupun mukulu para asataranne abba doonan de7iya shafeda darida olanchotara shiiqidosona. Enti bidi, Beet-Aweenape doloha baggara de7iya Mikmaasan zugidi uttidosona. 6 Isra7eele asay sa7i entaw iita gideysanne olanchoti dagammidaysa be7ida wode gongolon, buuren, zaalla giddon, kakan, haatha ollan qosetidosona. 7 Ibraawetape guuthati Yordaanose shaafa pinnidi, Gaadenne Galada biitta bidosona. Shin Saa7oli Galgalan attis; iyara de7iya olanchoti ubbay yashshan kokoridosona.

8 Saa7oli Sameeli keerida laapun gallas gakanaw gam7is; shin Sameeli Galgala yibeenna; yaatin, Saa7olara de7iya olanchoti laaletethi doomidosona. 9 Hessa gisho, Saa7oli, “Xuussa yarshonne issifetetha yarshota taw ehite” yaagidi, xuussa yarsho yarshis. 10 Saa7oli xuussa yarshuwa yarshidi polidaape guye Sameeli yis. Yaatin, Saa7oli Sameela mokanaw kare keyis.

11 Sameeli, “Ha neeni oothidabay aybee?” yaagidi Saa7ola oychis.

Saa7oli, “Asay laaletanaw matidaysa, neka gida wodiyan yaanaw gam7idaysanne Filisxeemeti Mikmaasan shiiqidaysa taani be7as. 12 Hessa gisho, ‘Filisxeemeti taara oletanaw Galgala wodhana hanoosona; taani Godaa maado oychabike’ gada qopas. Yaatin, xuussa yarsho yarshanaysi taw attonnaba gidis” yaagidi zaaris.

13 Sameeli, “Neeni boozaba oothadasa; Goday, ne Xoossay new immida kiitaa naagabaaka. Neeni naagidaako Goday hachi ne kawotethaa Isra7eele bolla merinaw minthanashin. 14 Shin ha77i ne kawotethay gam7enna; neeni Godaa kiita naagaboonna gisho, Goday ba wozanaada oothiya asi demmis; ba asaa kaalethana mela iya dooris” yaagis.

15 Sameeli Galgalape dendidi, Biniyaamen de7iya Gib7a bis. Saa7oli baara de7iya asaa taybin, asay usupun xeetu gidis. 16 Saa7oli, iya na7aa Yoonataaninne entara de7iya asay Biniyaamen de7iya Gib7an gam7idosona; Filisxeeme asay Mikmaasan dunkaanidosona. 17 Filisxeeme olanchoti heedzu cugan shaaketidi keyidosona. Entafe issi cugay Shu7aala biittan de7iya Ofirako simmidi bis; 18 Nam7anthoy Beet-Horonako bis; heedzantho cugay mela biitta sinthan de7iya Saboyma zangaara duge xeelliya zawa ogiya oykidi bis.

19 Filisxeeme asay, “Ibraaweti mashshenne toora qoxofo” gida gisho, Isra7eele biittan birata qoxiya asi baawa. 20 Hessa gisho, Isra7eele asay banta marasha, konte, kaltanne baaca poshisanaw Filisxeeme boosona. 21 Marashanne konte poshisanaw hospun giraame deexiya bira qanxoosona; kaltanne xooxe poshisanaw oyddu giraame qanxoosona. 22 Hessa gisho, ola gallas Saa7olinne iya na7aa Yoonataani attishin, harata kushen toorinne mashshi baawa. 23 Filisxeeme cugay Mikmaasa pinthi baanaw keyis.