1 Issi gallas Saa7ola na7ay Yoonataani ba ola miishiya tookiya panthaako haysada yaagis; “Haaya; hefinthan de7iya Filisxeemeti dunkaanida gutaa ane boos” yaagis. Shin ba aawas hessa odibeenna.

2 He wode Saa7oli Gib7a matan Migroonan, oromaane mitha garsan de7ees. Iyara usupun xeetu asati de7oosona. 3 Seelon Godaa kahine gidida Eeli na7ay, kahiney Finihaasi yelida Ikabooda ishay, Akxuuba na7ay, Akiyi efuude ma77idi, enta giddon de7ees. Yoonataani enta giddon baynaysa oonika eribeenna.

4 Yoonataani Filisxeemeti dunkaanida gutaa pinnanaw biya ogiya bolla ushacha bagganinne haddirsa baggan, issoy Boxexa, hankoy Sana geetetiya nam7u pooxetida gita zaallati de7oosona. 5 Zaallatape issoy pudeha baggan Mikmaasa sinthan de7iya wode, issoy qassi dugeha baggan Gib7a sinthan de7ees.

6 Yoonataani ba ola miishiya tookiya panthaako, “Haaya; ha qaxaretiboona asay dunkaanida gutaa ane boos. Goday nu gisho oletonna aggenna; daro asan gidin guutha asan, ashshanaysi Godaa xoonenna” yaagis.

7 Iya ola miishiya tookeysi, “Neeni qopidaba ubbaa ootha; guye goopa; ta wozanay neera de7ees” yaagis.

8 Yoonataani, “Yaako haaya; hefinthi pinnidi asaas bentoos. 9 Enti, ‘Nuuni hinteko yaana gakanaw yan naagite’ giiko, nuuni de7iya bessan naaganaape attishin, entako booko. 10 Shin enti, ‘Nuuko haa yiite’ giiko, nuuni entako keyana. Hessi Goday enta nu kushen aathidi immidaysas malla gidana” yaagis.

11 Enti nam7ay keyidi Filisxeemetas bentida wode Filisxeemeti, “Heko, Ibraaweti banta qosetida ollafe zuumidi keyoosona” yaagidosona. 12 Filisxeeme olanchoti, Yoonatananne ola miishiya tookeysa xeegidi, “Haa nuuko keyite; nuuni hintena issiba bessaana” yaagidosona.

Hessa gisho, Yoonataani ba ola miishiya tookeysako, “Tana kaallada ha keya. Goday enta Isra7eele kushen aathidi immis” yaagis.

13 Yoonataani ba ola miishiya tookeysa kaalethidi, tohoninne kushen zuumidi keyis. Filisxeemeta Yoonataani shocidi yeggin, iya ola miishiya tookeysi kaallidi enta wodhis. 14 He koyro olan Yoonataaninne iya ola miishiya tookeysi bagga boora soo gaden laatamu gidiya asi wodhidosona. 15 Hessafe guye, gutanin goshshan, olas keyida asatinne naagon de7iya Filisxeemeti dagammidosona. Biitti qaaxis; he dagamay Xoossafe kiitetis.

16 Saa7oli Biniyaame biittan, Gib7an wothida wochiya asati, Filisxeeme olanchoti yaara haara piski gidi laaleteysa be7idosona. 17 Yaatin, Saa7oli baara de7iya asaako, “Ane olanchota shiishidi nu giddofe ooni bidaako be7ite” yaagis. Enti shiishidi taybiya wode Yoonataaninne iya ola miishiya tookeysi baynaysa be7idosona.

18 Saa7oli kahiniya Akiya, “Xoossaa Taabotiya haa ekada ya” yaagis. He wode Taabotey Isra7eelera de7ees*“Efuudiya haa ekada ya” yaagis. He wode Akiyi efuude ma7idi Isra7eele asaa sinthan de7ees 19 Saa7oli kahiniyara haasayishin, Filisxeemeti dunkaanida gutan wocamay dari dari bis. Hessa gisho, Saa7oli kahiniya, “Taabotiyape ne kushiya kessa” yaagis.

20 Hessafe guye, Saa7olinne iya olanchoti shiiqidi olaa bidosona. Filisxeeme asa ubbay hanana ba dhayidi, banta mashshan issoy issuwa buthidosona. 21 Kase Filisxeeme asaara wolla olla bessa bida Ibraaweti enta aggidi, Saa7olaranne Yoonatanara de7iya Isra7eele asaara walaketidosona. 22 Derey dariya Efreema biittan qosetida hara Isra7eeletika Filisxeemeti baqateysa si7idosona. Entika Isra7eeletara walaketidi yedetho oykidosona. 23 Goday he gallas Isra7eele asaa ashshis. Beet-Aweenape hefinthi gakanaw olay kanthis.

24 He gallas Isra7eele asay koshan labbanidosona. Saa7oli, “Sa7i qammanaape sinthe taani ta morketa halo keyonna de7ishin, kathi miya oonika baadetidaysa gido” yaagidi asaa caaqisidi wothis. Hessa gisho, olanchotape kathi doonako shiishida asi oonika baawa.

25 Olanchoti ubbay wora giddo geliya wode mitha bolla eessi de7ees. 26 Enti wora giddon eessi xokeysa be7idosona; shin caaquwa yayyida gisho, issi asika ba kushiya doonako shiishibenna. 27 Shin Yoonataani iya aaway asara oda qachidaysa si7ibeenna. Hessa gisho, ba kushen de7iya xam7a xeeraa ililo eessan yeddi kessidi, laacin iya ayfey xeellis. 28 Hessafe guye, olanchotape issoy, “Ne aaway olanchota ubbaa, ‘Hachi kathi miya asi baadetidaysa gido’ yaagidi, caaqisidi wothis; asa ubbay labbaniday hessasa” yaagis.

29 Yoonataani, “Ta aaway biittas meto medhis. Taani ha eessaafe guuthara laaccida ay mela minnidaako be7a. 30 Asay ba morketape di77ida kathaafe hachi midaba gidiyako lo77oshin; enti wodhana Filisxeemeta tayboyka ay mela daraneshin” yaagis.

31 He gallas Isra7eele asay Mikmaasape Eloona gakanaw Filisxeemeta shoci simmidi daaburidosona. 32 Enti di77ida dorsata, miizatanne marata shukidi suuthaa gussonna midosona. 33 Issi asi Saa7olako, “Heko, asay suuthara de7iya asho midi, Godaa sinthan nagara oothosona” yaagis.

Saa7oli, “Hinte nagara oothideta; gita shuchu gondorsidi elle taako haa shiishite” yaagis. 34 Hessafe guye, “Asaa giddo bidi, ‘Hinte issoy issoy hinte mehetanne dorsata taako haa ehite; haysan wogaada shukidi miite. Suuthara de7iya asho midi, Godaa sinthan nagara oothopite’ yaaga” yaagis.

Hessa gisho, he qamma issoy issoy ba boora ehidi yan shukidosona. 35 Saa7oli he bessan Godaas yarsho bessi gimbis; Godaas yarsho bessi gimbishin haysi iyaw koyro.

36 Saa7oli, “Hachi qamma Filisxeemeta kaalli, bidi sa7i wontana gakanaw entaba ubbaa bonqos; entafe issuwaka ashshona wodhoos” yaagis.

Enti, “Ero, nena lo77idaba ootha” yaagidi zaaridosona.

Shin kahiney, “Ane Xoossaa sheney aybeko oychoos” yaagis.

37 Hessa gisho, Saa7oli, “Filisxeeme asaa kaallada boo? Neeni enta Isra7eele kushen aathada immanee?” yaagidi Xoossaa oychis. Shin he gallas Xoossay iyaw zaaro immibeenna.

38 Saa7oli, “Kaaletheyisata xeegidi, ubbay haayite; hachi ayba nagari oosetidaako ane qoridi demmoos. 39 Isra7eele ashshiya de7o Goday eriya mela. Ta na7a Yoonataana gidikoka, hayqanaw bessees” yaagis. Shin asaape issi asika doona pogibeenna.

40 Hessafe guye, Saa7oli Isra7eele asaako, “Hinte ubbay ya baggan eqite; taaninne ta na7aa Yoonataani ha baggan eqana” yaagis.

Asay, “Ero, nena lo77idaba ootha” yaagidosona.

41 Hessafe guye, Saa7oli, “Taw like zaaro imma” yaagidi Godaa Isra7eele Xoossaa woossis. Saamay Saa7ola bollanne Yoonataana bolla wodhin asay geeyis. 42 Qassi Saa7oli, “Ta bollanne ta na7aa Yoonataana bolla saama yeggite” yaagis. Saamay Yoonataana bolla wodhis.

43 Saa7oli Yoonataana, “Ane neeni oothidaba oda” yaagis.

Yoonataani, “Taani guutha eessa ililo ta xam7aa xeeran bochada laacas. Heko taani haysan de7ayis; hayqos giigetas” yaagis.

44 Saa7oli, “Yoonataana, neeni hayqonna ixiko, Xoossi tana pirdo” yaagis.

45 Shin asay Saa7olako, “Yoonataani, Isra7eeles hessa mela gita xoonuwa ehidaysi hayqanee? Hessi polo hanenna! De7o Xoossi eriya mela! Iya huuphiyape issi binaanika biittan wodhenna. I hachi haysa Xoossa maadon oothis” yaagidosona. Yaatidi asay Yoonataana ashshin, I hayqope attis.

46 Hessafe guye, Saa7oli Filisxeeme asaa yedetheysa aggin enti banta biitta simmidosona.

47 Saa7oli Isra7eele bolla kawotidaape guye, ubba baggara de7iya ba morketa olis. Hessatika, Moo7abeta, Amooneta, Edoometa, Suubba kawotanne Filisxeemeta. Olanaw bida bessa ubban xoonis. 48 I minnidi oletis; Amaaleqata xoonis; Isra7eele asaa bonqeyisata kushepe ashshis.

49 Saa7ola adde nayti Yoonataana, Yesuwanne Malkisa; iyaw bayra na7e sunthay Meraabo; kaalo na7e sunthay Melkoolo. 50 Iya machiya, Akmaasa na7iya Aknahoomo. Iya tora moconay iya aawa ishaa Neera na7aa Abeneera. 51 Saa7ola aawa Qiisinne Abeneera aawa Neeri Abi7eela nayta.

52 Saa7oli de7ida laytha ubban Filisxeemetara morketethan oletida mela de7is. Mino asi woyko xaala asi demmida wode ubban I he uraa ba olanchotan gujees.