15
Saa7oli Boretis
1 Sameeli Saa7olako, “Ba asaa Isra7eele bolla neeni kawotanaada tiyana mela Goday kiittiday tana. Hessa gisho, Godaa qaala si7a. 2 Ubbaafe Wolqaama Goday haysada yaagees; ‘Isra7eeleti Gibxefe keyidi yaa wode Amaaleqati ogen entara eqetidaKessa 17:8-14; Zaare 25:17-19. gisho taani Amaaleqata seerana. 3 Ha77i bada Amaaleqata shoca; entaw de7iyaba ubbaa polo dhaysa. Enta ashshofa; Maccanne adde, naytanne yooga nayta, miizinne dorse, gimalenne hare ubbaa wodha’ ” yaagis.
4 Saa7oli asaa xeegidi, Xelaame geetetiya bessan taybis. Taybiya wode Isra7eelepe nam7u xeetu mukulu toho olanchota; Yihudape tammu mukulu asi demmis. 5 Saa7oli Amaaleqata katamaa bidi issi shaafan qosetidi uttis. 6 Saa7oli, “Isra7eeleti Gibxefe keyiya wode hinte entaw keehida gisho taani hintena Amaaleqatara issife dhaysona mela dendidi enta giddofe keyite” yaagidi Qeena asaas odis. Yaatin Qeena asay Amaaleqata giddofe keyidi bidosona.
7 Saa7oli Amaaleqata Hawilape doomidi, Gibxefe doloha baggan de7iya Shuura gakanaw shocis. 8 Amaaleqata kawa Agaaga paxa di77is; iya asa ubbaa mashshan wodhidi wursis. 9 Shin Saa7olinne iya olanchoti, Agaaganne lo77o dorsata, miizata, anqara maratanne marazeta, hessadaka hara lo77obata ubbaa ashshidosona. Enti haysata polo wodhanaw koybookona; shin enti laafatanne pathonayisata dhaysidosona.
10 Goday Sameelako, 11 “Saa7oli tana kaalleysa aggidi, ta kiita naagiboonna gisho, taani Saa7ola kawothidaysan qiirotas” yaagis. Sameeli hessa si7ida wode un7etidi qamma kumethi Godaako waassis.
12 Sameeli wonta guura dendidi, Saa7olara gahetanaw bis. Shin asay, “Saa7oli Qarmeloosa katamaa bidi, yan bana hassaysiya hawulte essidaape guye, Galgala wodhis” yaagidi odidosona.
13 Sameeli Saa7ola demmida wode Saa7oli Sameelako, “Goday nena anjo; taani Godaa kiitta polas” yaagis.
14 Shin Sameeli Saa7olako, “Yaatin, ha taani si7iya dorsa waasoynne mehe waasoy aybee?” yaagis.
15 Saa7oli, “Olanchoti haysata Amaaleqatape ehidosona; enti Godaas, ne Xoossaas yarshanaw, ubbaafe lo77iya dorsatanne meheta ashshidosona, shin harata ubbaa dhaysida” yaagis.
16 Sameeli, “Ane aggaaga; Goday zine qamma taw odidaba ta new odana” yaagis.
Saa7oli, “Ero oda” yaagis.
17 Sameeli zaaridi, “Ne ayfe sinthan ne guutha gidikoka, Isra7eele zerethaas kawo gidabikii? Isra7eele bolla kawotana mela Goday nena tiyis. 18 Goday, ‘Neeni bada iita gidida Amaaleqata kumethi dhaysa; enti wurana gakanaw wodha’ yaagidi kiittis. 19 Yaatin, ayis Godaas kiitetabikii? Di7os yaaretada Godaa sinthan ayis iitabaa oothadii?” yaagis.
20 Saa7oli, “Taani Godaas kiitetas; I tana kiittidaysada bada Amaaleqata wodha wursas; enta kawa Agaaga ehas. 21 Shin olanchoti di7uwape lo77iya dorsenne mehiya Godaas, ne Xoossaas, Galgalan yarshanaw ehidosona” yaagis.
22 Sameeli, “Goday ba qaalas kiiteteysan ufayteysa mela xuussa yarshoninne hara yarshon ufaytii? Heko, kiitetethi yarshofe aadhees; iya sissi dorsa modho yarsheysafe aadhees. 23 Geellatethi marotho nagara mela; qassi otoroy iita eeqa goyinno mela. Neeni Godaa qaala ixida gisho Goday ne kawo gidonna mela ixis” yaagis.
24 Saa7oli, “Taani nagara oothas; Godaa kiitaanne ne qaala toochas. Taani asaas yayyida gisho enti gidaba oothas. 25 Ha77i ta nagaraa atto garki; taani Godaa goyinnana mela taara yedharki” yaagis.
26 Sameeli, “Taani neera simmada biike; neeni Godaa qaala ixida gisho ne Isra7eele bolla kawo gidonna mela Goday ixis” yaagis.
27 Sameeli baanaw dendin, Saa7oli iya ma7uwa macaraa oykin, ma7oy daaketis. 28 Sameeli, “Goday hachi Isra7eele kawotethaa neepe daakidi neepe lo77iya hara asas immis. 29 Isra7eele bonchoy, Xoossay wordotenna woyko ba qofaa laammenna; ba qaala laammanaw I asi gidenna” yaagis.
30 Saa7oli, “Taani nagara oothas; shin ta biitta cimata sinthaninne Isra7eele asaa sinthan tana boncha. Taani Godaa, ne Xoossaa goyinnana mela taara yedharki” yaagidi woossis.
31 Hessa gisho, Sameeli iyara issife bin, Saa7oli Godaa goyinnis.
32 Sameeli, “Amaaleqata kawa Agaaga taako ehite” yaagis.
Agaagi kokorishe*Kokorishe: Woyko qashetidi Sameelako yidi, “Tuma hayqoy haysada cammii?” yaagis.†Tuma hayqoy haysada cammii: Tuma ta hayqanaw bessenna
33 Sameeli Agaagako, “Ne mashshay maccasa naytape mela ashshidaysada ne aayaka maccasa giddon naytape mela attana” yaagis. Sameeli Agaaga Godaa sinthan Galgalan qanxerethis.
34 Sameeli dendidi, Rama bis; Saa7olika ba soo Gib7a bis. 35 Sameeli hayqana gakanaw Saa7ola be7anaw simmidi bibeenna, shin Sameeli Saa7ola gisho yeekis. Saa7ola Isra7eele bolla kawo oothidaysas Goday azzanis.