18
Dawitanne Yoonataana
1 Dawiti Saa7olara haasaya wursidaape guye, Saa7ola na7ay Yoonataani Dawitara daro mata dabbotethi medhis; Yoonataani Dawita ba shempuwada dosis. 2 He gallasape doomidi, Saa7oli Dawita baara wothis; ba aawa soo guye simmonna mela diggis. 3 Yoonataani Dawita ba huupheda dosiya gisho iyara caaqis. 4 Yoonataani ba ma7ida kaaba, ba ola ma7uwa, ba mashshaa, ba dongiyanne ba saqiya kessidi Dawitas immis.
5 Saa7oli kiitida ubbaa Dawiti naagetidi oothiya gisho, Saa7oli Dawita ba olanchota giddon halaqa oothidi shuumis. Hessi asa ubbaanne iya moorinnata ufaysis.
6 Dawiti Filisxeeme addiya Gooliyada wodhin, asay soo simmiya wode maccasay ufaysa yethi yexishenne durishe, karaabo baqishenne diithi diixishe, kawa Saa7ola mokanaw Isra7eele katamata ubbaafe keyidosona. 7 Maccasati durishe,
“Saa7oli mukulata wodhis;
Dawiti tammu mukulata wodhis”
yaagidi yexidosona. 8 Saa7ola ha yethay shaatin, daro hanqetis. Saa7oli ba qofan, “Dawita, ‘Tammu mukulata wodhadasa gidi, tana mukulata wodhadasa’ gidoosona. Yaatin, kawotethaafe attishin hari aybi attidee?” yaagis. 9 He wodepe doomidi Saa7oli Dawita qanaate ayfen xeellees.
10 Wontetha gallas iita ayyaani Xoossafe kiitetidi Saa7ola oykin, Saa7oli ba son elmotees. Dawiti kaseysada diithi diixishin Saa7oli toora ba kushen oykidi uttis. 11 I, “Dawita godaara gathada sikana” yaagi qopidi toora xongis. Shin Dawiti nam7u toho iyape attis.
12 Goday Saa7ola aggidi Dawitara de7iya gisho Saa7oli Dawita yayyis. 13 Saa7oli Dawita ba sinthafe haassanaw koyidi mukulu olanchotas halaqa oothis. Yaatin, Dawiti ba cugaa olas kaalethis. 14 Goday Dawitara de7iya gisho I oothiyabay ubbay iyaw injetees. 15 Dawiti oothiyaba ubbay injeteysa Saa7oli be7idi iyaw daro yayyis. 16 Shin Dawiti enta olan kaalethiya gisho Isra7eele asaynne Yihuda asa ubbay iya dosoosona.
17 Saa7oli Dawitako, “Ta na7a bayriya Meraaba hannashu; taani iyo new macho immana; neeni mino asi gida; Godaa olaa oleta” yaagis. Saa7oli ba wozanan, “Taani iya bochike; Filisxeemeti iya wodho” yaagidi qopis. 18 Shin Dawiti, “Kawora bollotanaw taani oonee? Ta soo asay aybee? Woyko ta aawa yaray Isra7eele asaa giddon aybee?” yaagis. 19 Shin Saa7ola na7iya Meraaba Dawitas imetiya wodey gakin, Mahoola addiya Adri7eelas imetasu.
20 Gidoshin, Saa7ola na7iya Melkoola Dawita dosasu; Saa7oli hessa si7idi ufaytis. 21 I ba wozanan, “Iyaw xihe gidana melanne Filisxeemeti iya wodhana mela taani Milkoolo Dawitas immana” yaagidi qopis. Hessa gisho, Saa7oli Dawita, “Neeni taara bollotanaw nam7antho qaada new immas” yaagis.
22 Saa7oli ba oosanchota xeegidi, “ ‘Kawoy nenan ufaytis; iya aylleti ubbay nena dosoosona; ha77i neeni kawuwara bollota’ yaagidi dumma Dawitas odite” yaagidi kiittis.
23 Saa7oli gidaysada enti Dawitas odidosona. Shin Dawiti, “Kawora bollotanaysi hintew laafaba daaniyee? Taani manqonne eretonna asi” yaagidi zaaris.
24 Saa7ola moorinnati Dawiti gidaba Saa7olas odidosona. 25 Saa7oli ba aylletako, “Dawitas haysada yaagidi odite; ‘Kawoy ba morketa halo keyanaw xeetu Filisxeeme asata qaaratidi ehana melape attishin, neepe hara koyta koyenna’ yaagite” yaagis. Saa7oli hessa giday Dawiti Filisxeemeta kushen hayqana mela qopida gishosa.
26 Saa7ola aylleti Saa7oli gidaba Dawitas odidosona; kawuwara bollotanaysi Dawita ufaysis. Wodey aadhanape sinthe, 27 Dawitinne iya asay dendi bidi Filisxeemetape nam7u xeetu asaa wodhidosona. Dawiti kawuwara bollotanaw he asata qaarati ehidi, kawas kumethi taybidi sheedhis. Saa7oli ba na7iw Melkoolo Dawitas immis.
28 Saa7oli Goday Dawitara de7eysanne iya na7iya Milkoola Dawita doseysa eris. 29 Saa7oli Dawitas kaseysafe aathidi yayyis. Saa7oli ba de7o laytha ubban Dawitas morke gidis.
30 Filisxeeme olanchoti olas kessi aggibokona. Shin olas keyida wode ubban Saa7ola toora moconatape aathidi xoonoy haney Dawitasa; hessa gisho, I eretida asi gidis.