1 Dawita wodhana mela Saa7oli ba na7aa Yoonatanasinne ba oosanchotas odis. Shin Saa7ola na7ay Yoonataani Dawita daro dosees. 2 Hessa gisho, Yoonataani Dawitako, “Ta aaway Saa7oli nena wodhanaw koyiya gisho wonto wonta nena naaga; issi bessan qosetada de7aasha. 3 Taani ta aawara bada, neeni qosetida gadiyan eqana; taani nebaa iyaw odada, iyape si7iyaba new odana” yaagidi kiittis.

4 Yoonataani Dawita nashshidi, ba aawa Saa7olako haysada yaagis; “Kawoy ba aylliya Dawita qohidi nagara oothofo; I nena qohibeenna; I oothidabay nena daro go77is. 5 I Filisxeeme addiya wodhida wode ba shempuwas qadhetibeenna. Goday Isra7eele ubbaas gita xoono immis; hessa be7ada neka ufaytadasa. Yaatin, neeni geeshsha asi qohanaw ayis qopay? Gaasoy bayna Dawita wodhanaw ayis koyay?” yaagis.

6 Saa7oli Yoonataani odidaba si7idi, “De7o Xoossi eriya mela, taani Dawita wodhike” yaagidi caaqis.

7 Yoonataani Dawita xeegidi enti odetidaba ubbaa iyaw odis. Yaatidi Dawita Saa7olako ehin Dawiti kaseysada Saa7olara de7is.

8 Filisxeemetara zaaridi hara oli dendis; Dawiti keyidi Filisxeemetara oletidi, enta gita shochu shocin, enti iya sinthafe baqatidosona.

9 Hessafe simmin, Saa7oli toora oykidi ba son uttidashin, iita ayyaani Godaape kiitetidi iya oykis. Yaatin, Dawiti diithi diixishin, 10 Saa7oli Dawita godaara gathidi sikanaw toora xongis; Shin Dawiti iyape deesh gidi attin, tooray godan toketis. He qamma Dawiti kessi ekidi baqatis.

11 Dawita keethan naagidi wonta wodhana mela Saa7oli ase kiittis.

Dawita machiya Melkoola, “Hachi qamma neeni ne shempuwa ashshona ixiko, wonto hayqaasa” yaagada Dawitas odasu. 12 Milkoola Dawita maskootera kessin, Dawiti kessi ekidi baqatis. 13 Hessafe guye, Melkoola eeqa misile ekada arsan zin7isasu; huupheson deesha ikise wothada afila mayzasu.

14 Dawita oykidi ehana mela Saa7oli ase kiittin Milkoola, “Dawiti saketis” yaagasu.

15 Dawita be7ana mela Saa7oli he asata guye kiittidi, “Taani Dawita wodhana mela iya algara tookidi eki yiite” yaagis. 16 Shin asati soo geliya wode eeqa misiley arsan zin7idaysanne iya huupheson deesha ikisey de7eysa demmidosona.

17 Saa7oli Melkoolo, “Neeni ayis haysada oothada tana cimmadii? Ta morkey kessi ekana mela ayis oothadii?” yaagis.

Milkoola zaarada, “I taako, ‘Tana kessada yedda; ixiko ta nena wodhana’ yaagis” yaagasu.

18 Dawiti kessi ekidi Raman de7iya Sameelako bidi Saa7oli bana oothida ubbaa iyaw odis. Dawitinne Sameeli Nayoota bidi yan uttidosona. 19 Saa7oli Dawiti Raman de7iya Nayootan de7eysa si7is. 20 Dawita oykidi ehana mela ase yaa kiittis. Shin nabe cugay Sameela kaalethuwan tinbite odishin be7ida wode Saa7oli yeddida asata bolla Xoossa Ayyaanay wodhin, entika tinbite odidosona. 21 Saa7oli hessa si7ida wode hara asi yeddis; entika qassi tinbite odidosona. Saa7oli heedzantho ase yeddin entika tinbite odidosona. 22 Wursethan, Saa7oli ba huuphen Rama bidi, Seekun de7iya gita ollaa gakidi, “Sameelinne Dawiti awun de7oona?” yaagidi oychis.

Enti, “Hinin Raman de7iya Nayootan de7oosona” yaagidi zaaridosona.

23 Hessa gisho, Saa7oli Raman de7iya Nayoota bis; qassi Xoossa Ayyaanay iya bollaka wodhin, Raman de7iya Nayoota gakanaw tinbite odishe bis. 24 I ba ma7uwa qaaridi, Sameela sinthan tinbite odis; gallasinne qamma kumethi kallo zin7is. Asay, “Saa7olika nabetape issuwa gidideye” geysi hessasa.