1 Dawiti Raman de7iya Nayootape baqatidi, Yoonatanako bidi, “Taani ay oothadina? Ta balay aybee? Ne aaway tana wodhanaw koyey taani iya ay qohinee?” yaagidi oychis.

2 Yoonataani, “Hessi neepe haako; neeni hayqaka. Guuthaba gidin, gitaba gidin, ta aaway taape qosidi aykoka oothenna. Ta aaway taape ayis hessa qosidee? Hessi hanenna” yaagidi zaaris.

3 Shin Dawiti, “Ne tana doseysa ne aaway loythi erees. I ba wozanan, Yoonataani ha oda eropo; I eriko azzanana” yaagis. Shin, “De7o Xoossi eriya mela, ne shempoy ero; taapenne hayqope giddon issi tango xalaali attis” yaagidi caaqis.

4 Yoonataani, “Neeni ootha gidaba aybaka taani new oothana” yaagis.

5 Dawiti zaaridi, “Wonto ageena xeero ba7aale bonchiya gallas; taani kawuwara kathi maanaw koshshees. Shin wonti pee7in omarsi gakanaw taani gaden qosetana. 6 Ne aaway tana koyiko, neeni, ‘Dawiti ba asaara laytha yarsho yarshiya wode gidiya gisho ba soo Beeteleme baanaw tana oychidi bis’ yaaga. 7 I, ‘Yaako lo77o’ giiko, taw ne aylliyas saro; shin I hanqetiko, I tana qohanaw ba wozanan qopidaysa hessan era. 8 Shin neeni taw ne aylliyas lo77oba ootha; Neeni taara ne aylliyara Godaa sinthan caaqadasa. Taani bala gidiko, tana ne wodha; ne aawas tana aathada immofa” yaagis.

9 Yoonataani, “Hessi neepe haako; ta aaway nena qohanaw qopidaba ta eridaako, new odikina?” yaagis.

10 Dawiti “Ne aaway new iita zaaro zaariko, taw odanay oonee?” yaagidi oychis.

11 Yoonataani, “Haaya; gade boos” yaagin, nam7ay gade bidosona.

12 Yoonataani Dawitako, “Goday Isra7eele Xoossay ero, taani wonti pee7in ta aaway nebaa giyaba si7ada new I qopiya qofay lo77o gidiko taani kiittada nena erisana. 13 Shin ta aaway nena qohanaw koyaba gidiko, hessa taani nena erisonnanne neeni saron kessa ekana mela oothonna ixiko, Goday tana pirdo; Goday ta aawara gididaysada neera gido. 14 Ta de7o laytha ubban ta hayqonna mela Godaa siiquwa tana bessa. 15 Goday Dawita morketa ubbaa biittafe dhaysiya wodeka ne siiquwa ta soo asaas bessa” yaagis.

16 Hessa gisho, Yoonataani, “Goday Dawita morketa pirdo” yaagidi Dawita soo asaara caaqis. 17 Yoonataani Dawita ba huupheda dosiya gisho, “Neeni tana tuma doseysa qoncisanaw taw ane nam7antho caaqa” yaagis.

18 Hessafe guye, Yoonataani, “Wonto ageena xeero ba7aale bonchiya gallas; neeni uttiya bessay mela attiko ne baynaysi eretana. 19 Wonti pee7in omarsi bada, ha metoy doomida gallas neeni qosetida bessan, Exela zaallafe guyera qosetta. 20 Taani issiba bolla xongiya asada hanada heedzu donge toorata he zaalla miye yeddana. 21 Hessafe guye, ‘Bada donge toorata koya’ yaagada issi na7a kiittana. Taani iyako, ‘Donge toorati neepe ha baggara de7oosona; haa ekada ya’ giyaba gidiko, haaya; de7o Goday eriya mela, new sa7i saro; nena aykoyka bochenna. 22 Shin taani na7aako, ‘Donge toorati neepe hini baggara de7oosona’ giyaba gidiko, neeni aggada ba; Goday ne baana mela koyiya gisho ba. 23 Neera taara odetida odaas Goday nu giddon merinaw marka” yaagis.

24 Hessa gisho, Dawiti gaden qosetis. Ageena xeero ba7aale bonchiya gallas gakida wode kawoy Saa7oli gibira bolla uttis. 25 Kawoy ba uttiya bessan godaa matan uttis; Yoonataani iyape sintha baggan, Abeneeri Saa7ola matan uttis; shin Dawita bessay mela de7ees. 26 Saa7oli he gallas aykoka gibeenna. Saa7oli ba wozanan, “Dawiti wogaada geeyonna mela issibay iya gakis; I geeybeenna” yaagidi qopis. 27 Shin wontetha gallas, ageenay xeerin nam7antho gallas Dawita bessay mela de7ees. Saa7oli ba na7aa Yoonataana xeegidi, “Isseye na7ay zineka hachika gibira maanaw ayis yibennee?” yaagidi oychis.

28 Yoonataani, “Dawiti Beeteleme baana gidi tana minthidi oychis. 29 I taako, ‘Nu soo asay kataman yarsho yarshiya gishonne ta yan bentana mela ta ishay tana kiitida gisho tana yeddarki. Ta ne sinthan saba demmidaba gidiko taani ta ishata be7ana mela tana yedda’ yaagidi oychis. Kawa gibiraape maanaw I yoonnay hessa gishosa” yaagidi zaaris.

30 Saa7oli Yoonataana bolla shene eexi keyidi, “La, geellanne makallancho maccase na7aw, neeni new kawushe, ne aayes yeella ehanaw Isseye na7aara laggeteysa ta erikinayee? 31 Isseye na7ay ha sa7a bolla de7ida peeshan ne woyko ne kawotethay eqenna. Ha77i kiittada elle ehisa; I hayqanaw bessees” yaagis.

32 Yoonataani ba aawa, “I ayis hayqii? I ay iitabaa oothidee?” yaagidi oychis.

33 Saa7oli Yoonataana wodhanaw toora iya bolla xongis. Hessa gisho, Yoonataani ba aawa Saa7oli, Dawita wodhanaw qopidaysa geeshshidi eris. 34 Yoonataani shenetidi gibira bollafe dendis; ba aaway, Dawita kawushida gisho Yoonataani azzanidi, ageena xeero ba7aale bonchiya nam7antho gallas kathi mibeenna.

35 Yoonataani baara issi na7a ekidi wonta guura Dawitara gahetanaw gade bis. 36 Yoonataani, “Taani dukiya donge toorata woxa bada ekada ya” yaagis. Na7ay woxiya wode issi donge toora hefinthi dukis. 37 Na7ay Yoonataana donge tooray wodhida bessaa gakiya wode Yoonataani na7aa xeegidi, “Donge tooray neepe hini baggara de7ennee?” 38 Yoonataani na7aa, “Ellesa; ba; eqofa” yaagidi ba qaala dhoqu oothidi odis. Na7ay donge toora maxidi ba godaas ehis. 39 Yoonatanapenne Dawitape attishin, na7ay he xuura erenna. 40 Yoonataani ba ola miishiya na7aas immidi, “Haysa katama ekada ba” yaagis.

41 Na7ay bidaape guye, Dawiti he zaalla guyepe keyidi Yoonataana sinthan gulbatidi, ba som7uwa sa7a gathidi heedzu toho ziggis. Hessafe guye, issoy issuwara yeeretidi yeekidosona, shin Dawiti Yoonatanape aadho yeekis.

42 Yoonataani, “Saro ba; ‘Ne giddoninne ta giddon, ne kochaa giddoninne ta kochaa giddon, Goday merinaw marka gido’ yaagidi nu nam7ay Godaa sunthan caaqida” yaagis. Hessafe guye, Dawiti dendidi bis; Yoonatanika katamaa guye simmis.