1 Dawiti kahiniya Abimelekeko Nooba bis. Abimelekey Dawitara gahetanaw kokorishe yidi, “Neeni nerka waanada yadii? Neera asi waanidi baawee?” yaagidi oychis.

2 Dawiti kahiniya Abimeleke, “Kawoy taako, ‘Taani nena kiitida kiitaanne ta new odidaba oonika eropo’ yaagidi tana kiittis. Ta asati issi bessan taara gahetana mela oda wothas. 3 Ha77i ne kushen aybi de7ii? Ichashu uythi woyko new de7iyaba taw imma” yaagis.

4 Kahiney zaaridi, “Coo asi miya uythi taw baawa; shin ne asati bantana maccasape naagidaba gidiko, enti maanaw danda7iya geeshsha uythi de7ees” yaagis.

5 Dawiti zaaridi, “Tuma nuuni ha kiita ekidi keydaape doomidi, maccasape naagetida; hari attoshin hara kiittaka ekidi keyiya wode enti banta geeshshatetha naagoosona. Shin hachi waanidi geeyanaw koshshennee?” yaagis. 6 Hessa gisho, kahiney Dawitas geeshsha uythaa immis. Kahiniyas de7iya uythay, Godaa sinthan wothanaw he gallas ho77o uythara laametida uythaafe attishin, hari baawa.

7 Saa7ola aylletape issoy, iya mehiya heemmeyisata halaqay, Doyqa geetetiya Edoome addey, he gallas Godaa sinthan naagishe de7ees.

8 Dawiti Abimelekeko, “Toori woyko mashshi new dandeesha? Kawa kiitay eesoya gisho taani ta mashshaa woyko hara ola miishe ehabike” yaagidi oychis.

9 Abimelekey, “Neeni Ela Zangaaran wodhida Filisxeeme addiya Gooliyada mashshay haysan de7ees; curqara xaaxetidi, efuude ma7uwape guye baggara de7ees. Neeni koyaba gidiko iya eka; iyape attishin, hara mashshi haysan baawa” yaagis.

Dawiti, “Iya mela mashshi baawa; iya taw hamma” yaagis.

10 He gallas Dawiti Saa7olape baqatidi, Gaate kawa Ankusako bis. 11 Shin Ankusa moorinnati, “Haysi Dawiti ba biittan kawo gidennee? Maccasay yexishenne durishe, ‘Saa7oli mukulu wodhis; Dawiti tammu mukulu wodhis’ yaagidi sabbida addiya gidennee?” yaagidosona.

12 Dawiti enta haasaya ba wozanan si7idi, Gaate kawa Ankusa daro yayyis. 13 Hessa gisho, Dawiti enta sinthan gooshshu daanis. Enti iya oykana haniya wode gooshshada penge ibitha qaacethi oykis; buuchaara saasso qolis. 14 Ankusi ba oosanchotako, “Heko, ha addey gooyees; hinte ayis iya taako ehidetii? 15 Ha addey ta sinthan gooyanaada hinte ehiday, ta matan hari gooyey dhayineyee? Ha addey ta soo gelanaw bessii?” yaagis.