1 Dawiti Gaatepe baqatidi, Adulaama matan de7iya gongoluwa bis. Iya ishatinne iya aawa soo asa ubbay hessa si7ida wode yaa iyako bidosona. 2 Metootiday, acotidaynne sa7i iitida ubbay Dawitako shiiqin, enta tayboy oyddu xeetu gidis; I enta halaqa gidis.

3 Dawiti yaape dendidi Moo7aben de7iya Mixipha bidi Moo7abe kawa, “Xoossay taw oothanaba ta erana gakanaw ta aawanne aayiw ne matan wotharki” yaagidi woossis. 4 Dawiti enta Moo7abe kawa matan wothis; Dawiti qosetida bessan de7iya wode ubban enti kawa matan de7idosona.

5 Hessafe guye, nabey Gaadi Dawitako yidi, “Qosetida bessan gam7ofa; haysafe dendada Yihuda biitta ba” yaagis; Dawiti yaape keyidi Hereta wora bis.

6 Dawitinne iya asay bentidaysa Saa7oli si7is. Saa7oli Gib7a matan de7iya dere bolla, tamarsike mitha garsan toora oykidi uttis; iya moorinnati iya yuushuwan eqidosona. 7 Saa7oli entako, “Hinteno, Biniyaame asaw, si7ite; Isseye na7ay gadenne woyne tokiya bessi hinte ubbaas immanee? Shaalaqatanne mato halaqata oothidi hintena shuumanee? 8 Hinte ubbay ta bolla maqetideta; ta na7ay Isseye na7aara caaqidaba taw oonika odibeenna. Hintefe issi asika taw qadhetenna; hachi hanidaysada ta na7ay ta aylliyan tana wodhisanaw denthethidaysa taw oonika odibeenna” yaagis.

9 Saa7ola moorinnatara eqida Edoome addey Doyqi, “Isseye na7ay Akxuuba na7aa Abimelekeko Nooba bidaysa taani be7as. 10 Dawiti ay oothaneko Abimelekey Godaa oychis; yaatidi Dawitas shinqenne Filisxeeme addiya Gooliyada mashshaa iyaw immis” yaagidi Saa7olas odis.

11 Hessafe guye, Akxuuba na7aa kahiniya Abimelekenne Nooban kahine gididi de7iya iya aawa soo asa ubbaa kawoy xeegisin, enti kawako yidosona. 12 Saa7oli, “Akxuuba na7aw, si7a” yaagis.

Abimelekey, “Ero ta godaw” yaagis.

13 Saa7oli, “Neera Isseye na7aara ta bolla ayis maqetidetii? Neeni iyaw uythinne mashshe immada, I tana wodhanaw dendana mela iya gisho Xoossaa ayis oychadii?” yaagis.

14 Abimelekey, “Ne oosanchota ubbaa giddon Dawita mela ammanetey, kawa bolloy, nena naageysata kiitteynne ne soo asaa giddon daro bonchetey iya meli oonee? 15 Taani iya gisho Xoossaa oychishin, haysi taw koyro? Gidenna, kawaw, tana ne aylliya woyko ta aawa soo asa ubbaa aykoka mootopa. Taani ne aylley ha odabaa guutha gidin woyko gita gidin erike” yaagis.

16 Kawoy, “Abimeleke, nenne ne aawa soo asa ubbay hayqana” yaagis. 17 Saa7oli ba matan eqidi naageysata, “Godaa kahineta wodhite; enti Dawita maaddidosona. Dawiti baqatidaysa erishe taw odibookona” yaagis. Shin kawa naageysati Godaa kahineta bolla banta kushiya denthonna ixidosona.

18 Kawoy Doyqa, “Enta ne wodha” yaagidi kiittis. Edoome addey Doyqi kahineta shocidi, he gallas efuude ma7ida hospun tammanne ichashu kahineta wodhis. 19 Qassi Doyqi kahineta katamaa, Nooba mashshan wursis; he kataman de7iya addenne macca, naytanne yooga nayta, meheta, haretanne dorsata mashshan wodhis.

20 Shin Akxuuba na7aa Abimeleke naytape Abyataara geetetiya issi na7ay kessi ekidi, Dawitako baqatis. 21 I, Saa7oli Godaa kahineta wodhidaysa Dawitas odis. 22 Dawiti Abyataara, “Edoome addey Doyqi he bessan de7eysa taani be7ida wode I Saa7olas odanaysa he gallas eras. Ne aawa soo asa ubbaa hayqos gathiday tana. 23 Hiza neeni taara de7a; yayyofa. Nena wodhanaw koyiya uray tana wodhanaw koyees; neeni ta matan saro daana” yaagis.