1 Filisxeemeti Qa7ila olidi, wudumman de7iya kathaa bonqidaysa Dawiti si7is.

2 Dawiti, “Taani bada Filisxeemeta olo?” yaagidi Godaa oychis.

Goday, “Ba; Filisxeemeta ola; Qa7ila ashsha” yaagis.

3 Shin Dawita kaalleysati, “Nuuni haysan Yihuda biittan de7ishe daroban yayyoos. Filisxeemetara oletanaw Qa7ila nu biiko nuna ubbaa sa7i metana” yaagidosona.

4 Dawiti zaaridi Godaa oychin Goday, “Filisxeemeta taani new aatha immana; dendada Qa7ila ba” yaagis. 5 Dawitinne iya kaalleysati Qa7ila bidi, Filisxeemetara oletidi enta mehiya di77idosona. Entafe daro asaa wodhidi, Dawiti Qa7ila asaa ashshis.

6 Abimeleke na7ay Abyataari Dawitako Qa7ila baqatida wode efuude ma7uwa ekidi bis.

7 Dawiti Qa7ila bidaysa Saa7oli si7idi, “Xoossay Dawita ta kushen aathidi immis; Dawiti gimben diretida katama gelidi bana baw qachis” yaagis. 8 Qa7ila bidi, Dawitanne iya asaa teqana mela Saa7oli ba olanchota ubbaa xeegis.

9 Saa7oli ba bolla iitaba oothanaw maqidaysa Dawiti eridi kahiniya Abyataarako, “Efuudiya haa eka ya” yaagis. 10 Dawiti, “Abeeti Godaw, Isra7eele Xoossaw, ta gaason Saa7oli Qa7ila dhaysanaw maqidaysa taani ne aylley si7as. 11 Qa7ila asay tana Saa7olas aathidi immanesha? Taani ne aylley si7idaysada Saa7oli tumaka haa yaaneshsha? Abeeti Godaw, Isra7eele Xoossaw, taw ne aylliyas oda” yaagis.

Goday Dawitako, “Ee; Saa7oli yaana” yaagidi zaaris.

12 Dawiti, “Qa7ila asay tananne ta asaa Saa7olas aathidi immanesha?” yaagidi zaaridi Godaa oychis.

Goday, “Ee; enti hintena aathidi immana” yaagis. 13 Dawitinne usupun xeetu gidiya addeti Qa7ilape keyidi, issi bessafe hara bessi yuuyidosona. Dawiti Qa7ilape baqatidaysa Saa7oli si7ida wode baanaw qopidaysa aggaagis.

14 Dawiti bazzo miixataninne Ziifa mela biittan de7iya zumata bolla de7is. Saa7oli iya demmanaw ubba gallas koyees, shin Xoossay iya Saa7ola kushen aathidi immibeenna. 15 Dawiti Ziifa mela biittan de7iya Horesan de7ishin, Saa7oli iya wodhanaw keydaysa Dawiti eris. 16 Saa7ola na7aa Yoonataani dendidi, Dawitako Horesa bidi Dawiti Godaa wolqan minnanaada zoridi, 17 “Yayyofa; ta aawa Saa7oli nena kusheraka bochenna; neeni Isra7eele bolla kawotana; taanika neepe garsara haarana; ta aaway Saa7oli hessa loythidi erees” yaagis. 18 Enti nam7ay Godaa sinthan issoy issuwara caaqidosona; Dawiti Horesan gam7in Yoonataani ba soo bis.

19 Ziifa asay Saa7olako Gib7a bidi, “Dawiti Yasmoonape dugeha baggan, Hakila zuma bolla Horesa miixatan nu matan qosetidi de7ees. 20 Kawaw, ha77ika ne dosida wode duge wodha; nuuni iya ne kushen aathidi immana” yaagidosona.

21 Saa7oli, “Hinte taw qopida gisho hintena Goday anjo. 22 Bidi ane gujidika geeshshite; Dawiti daro toho awu biyakoka ooni iya be7idaako, shaakidi erite; I gene asi gideysa ta si7as. 23 Dawiti qosetiya bessata ubbaa be7idi, muruuta oda ekidi taako simmidi yiite. Hessafe guye, taani hintera baana; I he heeran de7iko, taani iya Yihuda biitta ubban demmana gakanaw koyana” yaagis.

24 Hessa gisho, enti Saa7olape sinthatidi Ziifa bidosona. He wode Dawitinne iya asay Yasmoonape dugeha baggara de7iya Ma7oona mela biittan Araba gadhan de7oosona. 25 Saa7olinne iya asay Dawita koyanaw bidosona. Dawita hessa si7ida wode zaallako wodhidi, Ma7oona bazzuwan uttis. Saa7oli hessa si7ida wode Ma7oona bazzuwan Dawita koyishe bis. 26 Saa7oli zumaape issi bagga miyiyara bees; Dawitinne iya asay hanko bagga miyiyara boosona. Enti Saa7olape baqatanaw eesotoosona; Saa7olinne iya asati, Dawitanne iya asata oykanaw mati uttidosona. 27 Shin, “Ellesada haaya; Filisxeemeti nu biitta olanaw yidosona” giya hara kiiti Saa7ola gakis. 28 Saa7oli Dawita koyeysa aggidi, Filisxeemetara oletanaw bis. Hessa gisho, he bessay “Kessi ekidi attiya zaalla” geetetis. 29 Dawiti he bessaafe keyidi, Engaada matan de7iya miixatan uttis.